Jemqorlyqqa qarsy is-qımyl jónindegi Ulttyq búro qyzmetkerleri 4 naýryz kúni QR İİM EBK komıtetiniń esirtki bıznesimen kúres jónindegi óńirlik basqarmasynyń burynǵy bastyǵy, polısıa polkovnıgi Serik Begasylovty qamaýǵa aldy, - dep habarlaıdy «Qamshy» portaly Jemqorlyqqa qarsy is-qımyl jónindegi Ulttyq búronyń baspasóz qyzmetine silteme jasap.

Ol 2013 jyldan beri izdeýde bolǵan. Almatyda jezóksheler qyzmetine basshylyq jasaǵany úshin sottalǵan «mama Roza» - Olga Hambýlatova isinde aty atalǵan polkovnık Almaty jezóksheleriniń qyzmetin 2011-2013 jyldar aralyǵynda ózi qorǵashtap kelgen dep aıyptalǵan edi.

«Qylmystyq qýdalaý organynda laýazymdy tulǵa bola tura S. Begasylov 2011-2013 jyldar aralyǵynda jeńgetaılyqpen jáne jezókshelik qyzmet kórsetýmen aınalysatyn qylmystyq top quryp, basqarǵan. S. Begasylov uzaq jyldar quqyqqorǵaý organdarynda túrli laýazymdarda bolǵandyqtan jáne jedel-izdestirý qyzmetiniń qyr-syryn jetik bilgendikten iz kesýshilerden uzaq ýaqyt jasyrynyp keldi», - delingen Ulttyq búro taratqan habarlamada.

2013 jyldan beri izdeýde júrgen S. Begasylov Interpol málimetteri boıynsha Túrkıa aýmaǵynda jasyrynyp kelgen.

«2015 jyly Qazaqstan Bas prokýratýrasy qashqyn polkovnıkti izdeýdi Jemqorlyqqa qarsy qyzmet mamandaryna tapsyrǵan bolatyn. Qazir S. Begasylov ustalyp, Almatydaǵy tergeý ızolátoryna qamaldy», - delingen habaralamada.