Memlekettik keńesshi Jalpyulttyq koalısıanyń múshelerimen birge Abaı oblysynyń turǵyndarymen birqatar kezdesý ótkizdi
 
Memlekettik keńesshi Erlan Qarın «Ádiletti jáne Progresıvti Qazaqstannyń Halyqtyq Konstıtýsıasy úshin!» Jalpyulttyq koalısıasynyń múshelerimen birge Abaı oblysyna baryp, óńir jurtshylyǵymen birqatar kezdesý ótkizdi.
Memlekettik keńesshimen birge óńirge Jalpyulttyq koalısıa músheleri – Májilis depýtattary Nurtaı Sabılánov, Erlan Saırov, Nartaı Sársenǵalıev, Oqý-aǵartý mınıstri Juldyz Súleımenova, aqyn Muhtar Nıazov, QR Prezıdenti janyndaǵy Jastar saıasaty jónindegi keńestiń múshesi Oljas Súleımen jáne ózge de azamattar bardy.
Sapar aıasyndaǵy negizgi is-shara – Abaı atyndaǵy oblystyq kitaphanada ótken óńir aktıvimen kezdesý. Talqylaý jumysyna 500-ge jýyq adam – máslıhat depýtattary, qoǵamdyq keńes músheleri, saıası partıalardyń, Qazaqstan halqy Assambleıasynyń, ardagerler uıymdarynyń, bıznes, bilim berý, densaýlyq saqtaý, sport salalarynyń, ǵylymı jáne jastar qaýymynyń ókilderi qatysty.
Dıalogtyń ózegi – Jańa Konstıtýsıa jobasynyń erejeleri men aldaǵy 15 naýryzda ótetin respýblıkalyq referendýmnyń mańyzy.
Memlekettik keńesshi Erlan Qarın jobany ázirleý jumysy ashyqtyq jáne keń qoǵamdyq qatysý qaǵıdatyna negizdelgenin, e-Otinish jáne eGov sıfrlyq platformalary arqyly azamattardan kelip túsken usynystar eskerilgenin atap ótti. Onyń aıtýynsha, usynylyp otyrǵan ózgerister memlekettik basqarý júıesiniń turaqtylyǵyn nyǵaıtýǵa, bılik ınstıtýttarynyń ókilettigi men jaýapkershiligi arasyndaǵy teńgerimdi kúsheıtýge, sondaı-aq adam kapıtalyn, bilim men ǵylymdy jáne ınovasıany memlekettiń strategıalyq basymdyqtary retinde damytýǵa baǵyttaldy.
«Jańa Konstıtýsıadaǵy negizgi tujyrymdamalyq erejelerdiń basym bóligi tikeleı Qasym-Jomart Kemelulynyń bastamasymen usynyldy. Máselen, jańa preambýla Prezıdenttiń tujyrymdamalyq tezısteri negizinde ázirlendi. Memleket basshysy – azamattarymyzdyń múddesin qorǵaýǵa baǵyttalǵan birqatar norma men jańashyl bastamanyń avtory», – dedi Erlan Qarın.
Májilis depýtaty Nurtaı Sabılánov menshik nysandarynyń barlyq túrin qorǵaý, ulttyq zańnamanyń basymdyǵy men ulttyq valútanyń rólin bekitý syndy ekonomıkalyq kepildikter kúsheıtilgenin atap ótti. Bul bıznes pen ınvestısıalar úshin turaqty jaǵdaı qalyptastyrady.
Oqý-aǵartý mınıstri Juldyz Súleımenova bilim, ǵylym jáne ınovasıany damytý máselesi strategıalyq basymdyq deńgeıinde bekitilgenin, bul adam kapıtalyn qalyptastyrýǵa baǵyttalǵan memlekettik qoldaýdy kúsheıtetinin málimdedi.
Májilis depýtaty Erlan Saırov zań shyǵarý bılik tarmaǵy jańarǵanyna jáne Quryltaıdyń baqylaý fýnksıalary kúsheıgenine azar aýdarsa, oblystyq ardagerler keńesiniń tóraǵasy Muratqazy Alın Jańa Konstıtýsıanyń ulttyq mádenıet pen dástúrli otbasylyq qundylyqtardy nyǵaıtýdaǵy mańyzyn atap ótti.
Sonymen qatar sapar aıasynda óńirdegi shyǵarmashylyq zıaly qaýym ókilderimen kezdesý ótti.
Talqylaý taqyryptary – mádenıettiń, tarıhı jadynyń jáne ulttyq biregeıliktiń róli. Erlan Qarın Jańa Konstıtýsıa tek quqyqtyq qujat qana emes, qoǵamnyń qundylyq baǵdaryn aıqyndaıtyn zamanaýı qoǵamdyq kelisim retinde qarastyrylatynyn atap ótti. Onyń aıtýynsha, joba negizinde adamǵa baǵdarlanǵan tásil jatyr. Onda memlekettik saıasattyń basty baǵdary – azamattardyń quqyǵy, bostandyǵy men múmkindikteri.
Qatysýshylar memlekettik qyzmet qaǵıdattarynyń tizbesinde tarıhı-mádenı murany saqtaý men ulttyq mádenıetke qoldaý kórsetý normalaryn bekitýge qoldaý bildirdi.
Sapar barysynda Jalpyulttyq koalısıa músheleri kásipodaq uıymdarymen, pedagogtar qaýymymen, mádenıet salasynyń ókilderimen, «SemAZ» JSHS eńbek ujymymen jáne óńir jastarymen de kezdesti. Dıalog aıasynda eńbek adamynyń quqyǵyn qorǵaý, áleýmettik kepildikti qamtamasyz etý, bilim men ǵylymdy damytý, óńirlerdiń ekonomıkalyq turǵyda damýyna turaqty jaǵdaı jasaý jáne jastardyń ózin tanytý múmkindikterin keńeıtý máseleleri talqylandy.
Jalpy, Abaı oblysyndaǵy kezdesýler jergilikti jurtshylyqtyń aldaǵy referendýmǵa erekshe nazar aýdaryp otyrǵanyn kórsetti.