Búgin «Ádiletti jáne Progresıvti Qazaqstannyń Halyqtyq Konstıtýsıasy úshin!» jalpyulttyq koalısıasy músheleri Abaı oblysynyń jurtshylyǵymen kezdesti.
Kezdesý barysynda Memlekettik keńesshi Erlan Karın Prezıdenttiń Egemendik jáne Táýelsizdik sózderin nelikten bas árippen jazatynyna toqtalyp ótti.
«Memleket basshysy Qasym-Jomart Kemeluly túrli qujattarmen jumys istegende, óziniń sóıleıtin sózderinde Egemendik jáne Táýelsizdik uǵymdaryn árdaıym bas árippen jazady. Óıtkeni, Prezıdent qoǵamdyq sanada bul sózderdiń erekshe qundylyq retinde ornyqqanyn qalaıdy. Ata Zańnyń jańa mátininde de osy ustanym saqtaldy. Nege?! Sebebi, bular qoǵamdyq sanada qasıetti jáne qasterli uǵymdar bolyp bekitilý úshin. Ásirese, jastardyń sanasynda. Bul maǵynasy jaǵynan mańyzdy áreket», – dedi Erlan Qarın.
Memlekettik keńesshiniń aıtýynsha, jańa Konstıtýsıada bul termınderdiń jıi qoldanylýy onyń memlekettilikti kúsheıtýdegi rólin aıqyndaıdy. Atap aıtqanda, 1995 jyly qabyldanǵan Ata Zańda «Egemendik» sózi 3 jerde kezdesedi. Al jańa Konstıtýsıada 6 jerde qoldanylǵan. Sol sekildi «Táýelsizdik» sózi eski Ata Zańda nebary 1 ret atalsa, jańa Konstıtýsıada 4 jerde qoldanylǵan.
Sondaı-aq, Erlan Karın bul uǵymdardyń memlekettik basqarý júıesindegi quqyqtyq orny men olardy qorǵaý tetikterine basa nazar aýdardy. Onyń sózinshe, Egemendik pen Táýelsizdik Jańa Konstıtýsıada memleket qyzmetiniń eń birinshi negiz quraýshy qaǵıdaty retinde bekitildi.
«Jańa Ata Zańnyń «Konstıtýsıalyq qurylys negizderi» dep atalatyn İ-bóliminiń 3-babynda Qazaqstan Respýblıkasy qyzmetiniń negiz quraýshy qaǵıdaty – «Egemendik pen Táýelsizdikti qorǵaý» dep anyq jazylǵan. Iaǵnı, Egemendik pen Táýelsizdikti damytý nemese nyǵaıtý dep emes, qorǵaý dep aıqyn kórsetilgen. Bul uǵymdy da Jańa Konstıtýsıaǵa Memleket basshysynyń ózi engizdi», – dep naqtylady ol.
Sóz sońynda Memlekettik keńesshi Táýelsizdik pen aýmaqtyq tutastyq máseleleriniń myzǵymastyǵyna jáne bul qundylyqtardyń eshqashan talqylanbaıtyn norma ekenine toqtaldy.
«Buǵan qosa, Jańa Konstıtýsıadaǵy 2-baptyń 2-tarmaǵynda jazylǵandaı, «Qazaqstan Respýblıkasynyń Egemendigi onyń búkil aýmaǵyn qamtıdy. Memleket óz aýmaǵynyń tutastyǵyn, qol suǵylmaýyn, bólinbeýin qamtamasyz etedi». Sonymen qatar, «Qazaqstan Respýblıkasynyń Egemendigi, Táýelsizdigi, ýnıtarlyǵy, aýmaqtyq tutastyǵy men basqarý úlgisi ózgermeıdi». Bul týraly jańa Ata Zańnyń 2-babynyń 7-tarmaǵynda naqty jazylǵan. Iaǵnı, Egemendik, Táýelsizdik, Aýmaqtyq tutastyq qoǵamda másele retinde eshqashan talqylanbaıdy. Tipti, referendýmǵa da shyǵarylmaıdy. Memleket basshysy 2021 jyly óz maqalasynda jazǵandaı, «Táýelsizdik bárinen qymbat». Endi bul sóz bizdiń kúndelikti ómirde ustanatyn uranymyz jáne Ata Zańymyzdaǵy mańyzdy norma bolyp bekitildi», – dep túıindedi Erlan Qarın.