Senat Tóraǵasy Máýlen Áshimbaev búgin Jetisý oblysynyń jurtshylyǵyna jańa Konstıtýsıanyń mańyzy men mánin aıtyp berdi. Ol aldaǵy referendýmdy elimizdiń turaqty damýynyń irgetasy dep atady.
Senat Tóraǵasy 15 naýryzda qazaqstandyqtar referendýmda mańyzdy sheshim qabyldaıtynyna nazar aýdardy. Onyń aıtýynsha, konstıtýsıalyq reforma elimizdi turaqty damytý, demokratıalyq qaǵıdattardy nyǵaıtý jáne saıası júıeni keshendi jańartý jolynda tarıhı ári strategıalyq mańyzǵa ıe.
«Jańa Konstıtýsıa jobasyna baılanysty respýblıkalyq referendým – Prezıdentimiz Qasym-Jomart Kemeluly Toqaevtyń eldi aýqymdy ári júıeli jańǵyrtý baǵdaryn iske asyrý jolyndaǵy tarıhı kezeń. Elimizdiń bolashaǵyna qatysty mańyzdy sheshimderdi azamattardyń tańdaýyna súıene otyryp qabyldaý demokratıa qaǵıdattaryna adaldyqtyń aıqyn kórinisi ekeni anyq. Konstıtýsıalyq reformanyń basym mindeti – Táýelsizdikti nyǵaıtý jáne azamattardyń ál-aýqatyn arttyrý. Osyǵan baılanysty jańa Konstıtýsıa jobasynda zań ústemdigi men quqyqtyq tártipti kúsheıtýge, azamattardyń quqyqtary men múddelerin qorǵaýǵa, sondaı-aq, eldiń ornyqty damýyna basymdyq berilgen», – dedi Máýlen Áshimbaev.
Taǵy bir mańyzdy erekshelik retinde damýdyń negizgi baǵdary – adam kapıtalyn jetildirý, memlekettilikti, Táýelsizdik pen egemendikti nyǵaıtý, sondaı-aq, ishki saıası turaqtylyq pen qoǵamdyq kelisimdi saqtaý Konstıtýsıa jobasynda naqty belgilengeni aıtyldy.
«Jańa Konstıtýsıanyń basty ereksheligi onyń adamǵa baǵdarlanýy ekenin aıryqsha atap ótken jón. Azamattardyń quqyqtary men múddelerine nazar aýdarý memlekettik saıasattyń ózegine aınalyp otyr. Ata Zań jobasynda adam quqyqtary deklaratıvti ereje emes, mańyzdy qaǵıdattar jáne naqty mindetter retinde qarastyrylǵan. Bul – sapaly bilimge qoljetimdilik, tıimdi densaýlyq saqtaý júıesi, áleýmettik qorǵaý jáne ár azamattyń óz áleýetin iske asyrýyna múmkindik berý sekildi baǵyttardy qamtıdy. Osy qaǵıdattardy júzege asyrý barlyq ınstıtýttardyń – Quryltaıdyń, Úkimettiń, ákimdikter men máslıhattardyń, sondaı-aq, azamattyq qoǵam ókilderiniń birlesken kúsh-jigerin talap etedi. Mundaı qadamdar – el ıgiligi jolyndaǵy ortaq jaýapkershiliktiń jarqyn kórinisi ekeni anyq», – dedi Palata Tóraǵasy.
Sonymen qatar Parlament depýtattary óńirdiń belsendi jastarymen, zaýyt jumysshylarymen jáne fermerlerimen kezdesti.
«Prezıdentimiz Qasym-Jomart Kemeluly Toqaev aýyl sharýashylyǵyn qarqyndy damytýǵa únemi basa mán berip keledi. Eldiń ál-aýqaty osy saladaǵy tabyspen tyǵyz baılanysty. Bul baǵyttaǵy ilgerileý aýyldardyń, óńirlerdiń, jalpy, tutas eldiń damýyna serpin beredi. Búginde osy jáne basqa da salalarda júıeli jańǵyrtýlar júrgizilýde. Usynylyp otyrǵan ózgerister Qazaqstannyń turaqty damýyna, azamattardyń ómir súrý sapasyn arttyrýǵa jáne búgingi ári keler urpaqtyń ál-aýqatyn qamtamasyz etýge baǵyttalǵan. Jetisý oblysy – elimizdiń mańyzdy aýylsharýashylyq, ındýstrıalyq, ǵylymı jáne ekonomıkalyq ortalyqtarynyń biri. Búginde óńirdegi kásiporyndar osy ıgi dástúrdi jalǵastyryp, ósim men ınovasıanyń naqty draıverine aınalyp otyr», – dedi ol kezdesýge qatysýshylarǵa arnaǵan sózinde.