Gaýhar men Loran – qazaqtyń atyn fransýzdarǵa ulttyq taǵamdarymyz arqyly tanytyp júrgen jandar. Olar Parıjde ornalasqan qazaq ulttyq taǵamdaryn daıyn­daıtyn «Chez Mademoisselle» meıramhanasynyń ıeleri, - dep jazady «Aqjol» basylymy.

Jalpy, Fransıa – ejelden meıramhana isimen tanylǵan el. Statısıka boıynsha onda resmı túrde tirkelgen 77856 meıramhana bar. Onyń 15 myńǵa jýyǵy bir ǵana Parıj qalasynda ornalasqan. Osynshama meıramhananyń ishinen eń tańdaýly degen myńnan astamy ǵana «Mıshlen» dep atalatyn parıjdik meıramhanalar anyqtamalyǵyna enedi. Osydan-aq bul saladaǵy básekelestikti baǵamdaýǵa bolady. Al qazaqtyń jal-jaıasy men qýyrdaǵy, ystyq baýyrsaǵy arqyly tanylǵan «Chez Mademoisselle» meıramhanasy – osy anyqtamalyqqa engen biregeı meıramhana.

Bul anyqtamalyq tiziminen kóriný úshin irikteý jasyryn sarapshylar arqyly jasalady. Olar kez-kelgen kúni dámhanaǵa baryp, ol jaqtyń taǵamdaryna ǵana emes, ydys-aıaǵynyń qoıylǵanynan bastap, ájethana tazalyǵyna deıin baǵa beredi. Taǵamymen til úıirip qana qoımaı, san túrli talaptardan súrinbeı ótken «Chez Mademoisselle» meıramhanasynda qazaq taǵamdarymen qatar, Ortalyq Azıa halyqtarynyń ulttyq taǵamdary daıyndalady.

Endeshe, shetelde ultymyzdyń ulttyq taǵamyn ulyqtap, parıjdikterdi tamsandyryp júrgen qazaq qyzy Gaýhar men Loranǵa bizdiń aǵaıyndar da, fransýzdar da razy.