Máslıhat depýtattyǵyna ózderiniń kandıdatýrasyn usynǵan 300 úmitker búginde saılaý dodasynan shyǵarylyp tastaldy. Jer-jerlerdegi saılaý komısıalary úmitkerlerdiń ótkizgen tabys deklarasıalarynan kinárat taýyp, ózin-ózi usynǵandardy saıası dodaǵa qatysýdan shetteýde. Osyndaı saılaýdan shettetlgen úmitkerlerdiń bir toby Prezıdenttiń máseleni sheshýge aralasýyn surap, úndeý de jasady.

Saılaý komısıalary men úmitkerler shaǵymdanǵan zań oryndary bul jaǵdaıdy qoldanystaǵy zańnamalarǵa sáıkes anyqtalyp otyrǵan kemshilikter nátıjesinde bolǵan qalypty oqıǵa dese, dodadan shettetilgen  úmitkerler men qoǵam belsendileri «Nur Otan» partıasynyń úmitkerlerin ǵana jergilikti ókiletti organǵa ótkizý maqsatynda bıliktiń qasaqana jasap otyrǵan qıturqylyǵy dep baǵalaýda. Túrli oblystar men Astana qalasyndaǵy saılaý komısıalary kiris týraly deklarasıalarynan kinárat taýyp, saılaýdan shettetken úmitkerler áleýmettik jeliler men táýelsiz BAQ arqyly dabyl qaǵýda. Ondaı úmitkerlerdiń arasynda tek bılikti ashyq synap júrgen opozısıalyq ustanymdaǵy azamattar ǵana emes, ózin-ózi usynǵan bılik partıasynyń músheleri de bar. Máselen, Astana qalalyq máslıhaty depýtattyǵyna úmitker, burynǵy Májilis depýtaty, KVN qozǵalysynyń beldi jankúıeri Baqyt Syzdyqova da tabys deklarasıasy kesirinen saılaýdan alynyp tastalyp otyr. Aqparat quraldary onyń deklarasıada 6 teńge kem kórsetkenin jazýda.

Óńirlerde oryn alyp otyrǵan osyndaı keleńsizdikterge kúıingen KTK telearnasynyń burynǵy basshysy, tanymal jýrnalıs Arman Shýraev mundaı saılaýdy ótkizbeı-aq qoıý kerek dep ashyna jazdy.

«Men saılaýdy múldem ótkizbeı-aq qoıýǵa shaqyramyn. «Nur Otan» partıasynyń úmitkerlerin túgel depýtat etip bekite salaıyq. Sonymen is bitti. Qanshama mıllıardty únemdep qalamyz. Keıbir qyzý saılaý komısıalary saılaýdy kezekti farsqa aınaldyryp jatqany qynjyltady. «Nur Otannyń» jeńetini bárine túsinikti. Eger saılaý dodasyna ózgeshe pikir aıtqan bolsa, bul memleketke qater tóndire me?», - deıdi A. Shýraev.

Ortalyq saılaý komısıasynyń múshesi Marat Sársembaev úmitkererdiń tapsyrǵan salyq deklarasıasyndaǵy kemshilikter ondaǵy qate kórsetilgen qarajat pen múlik somasyna qaramastan nazarǵa alynatynyn aıtqan.

«Jaǵdaı bylaı: meıli bir teńge, meıli júz teńge, tipti, myń dollar ma, munyń barlyǵy deklarasıa tapsyrý kezinde eskerilmese zań buzyshylyq bolyp sanalady», - deıdi M. Sársembaev.

Astanadaǵy №17 saılaý okrýgy boıynsha úmitker bolǵan Baqyt Syzdyqova óz kandıdatýrasynyń alynyp tastalýyn arandatý dep baǵalady.

«Men munyń arandatý ekenin bilip otyrmyn. Muny salyq deklarasıasynda málimetterdi durys kórsetpediń dep túsindirýde. Bulaı bolýy múmkin emes. Men saılaýǵa muqıat daıyndaldym: birneshe fırmalar-salyq jónindegi keńesshilerim boldy. Olar meniń barlyq derekterimdi tekserip, keńes berdi. Sondyqtan, meniń salyq deklarasıamdaǵy málimetterdiń qate bolýy múmkin emes. Ózimniń isimniń durys ekenine tolyq senimdimin», - deıdi B. Syzdyqova hanym.

Qazaqta «Túıeni jel shaıqasa, eshkini kókten kór» degen maqal bar. saıasat sahnasynda tanymaldyǵy joǵary, memleket bıligine ashyq qarsylyq tanytpaıtyn Baqyt Syzdyqovadaı kandıdattar syzylyp tastalyp jatqanda, táýelsiz úmitkerlerdiń depýtattyqtan dámelenýi shynynda da qıyn jaǵdaı. Eń bastysy, Májiliske ótetin úitkerlerdi «birjaqty» etken bılik, endigi kezekte óńirlerdegi ókiletti organdardyń depýtattaryn da qatań súzgiden ótkizýge shyndap kiriskeni belgili bolyp otyr. Áıtpese, kiris týraly deklarasıa toltyrǵanda nege tek ózin-ózi usynǵan úmitkerler ǵana qatelesip, «Nur Otan» atynan usynylǵandardyń qujattary minsiz bolady? Al, aqtóbelik kandıdat Almaz Jantákenovti súrindirý úshin KSRO kezindegi úlestik kýpondardyń qazbalanýy «Saılaý» atty osy saıası komedıanyń kúlmınasıasy boldy.

Darhan Muqantegi