Jyldaǵydaı bıylǵy kóktem de halyqqa ońaı soqpaıtyn sekildi. Byltyrǵydaı bıyl da birshama eldi meken qar sýynyń zardabyn tartýy múmkin.  Muny resmı bılik te moıyndap otyr.

Eskertý maqsatynda aıtty ma, joq jaǵdaı ýshyǵyp ketip jatsa, osy bastan basymyzdy arashalap alaıyq dedi me tótenshe jaǵdaılar komıtetiniń basshysy Vladımır Bekker kóktemgi sý tasqynyna boljam jasapty.

«Sý alýy múmkin aımaqtardy anyqtadyq. Kóktemgi sý tasqyny kezinde 807 eldi mekendi sý basý qaýpi baryn habarlaımyz. Bul búkil respýblıka boıynsha. Ol eldi mekenderde barlyǵy 1 mıllıon 250 myń adam turady. Osyǵan baılanysty biz árbir eldi mekenge, halyqtyń naqty sanyna qaraı kóshirý pýnkterin belgilep otyrmyz. Barlyǵy syzylyp, jazylyp qoıdy. Barlyǵy daıyn. Ákimdikter de munyń barlyǵyn pysyqtady. Birneshe ret komandalyq-shtabtyq jattyǵýlar ótkizildi», - deıdi V. Bekker myrza.

Buǵan deıin de Bekker myrza sý alý qaýpi týraly málimdegen bolatyn. Atap aıtqanda, ol sý qoımalarynan keletin qaýiptiń joǵarylyǵyn eskertken. Qazir TJK-nyń esepteýinshe 48 gıdrotehnıkalyq nysan ıesiz jatqan kórinedi. Qaraýsyz jatqan sý qoımalarynan basqa dambalardyń da jartysyna jýyǵy jóndeýdi qajet etetin kórinedi. Bir qorqynyshtysy, ol qaýipti dambalar álgi sý astynda qalýy múmkin delingen qar qalyń túsken aımaqtarda ornalasqan.

Tótenshe jaǵdaılyqtardyń boljamyn ózen, sýlarǵa jaýapty aýylsharýashylyǵy mınıstrliginiń tıisti komıteti de rastap otyr.

Esterińizge salsaq, byltyrǵy kóktemde de Aqmola, Qaraǵandy, Qostanaı, Shyǵys Qazaqstan, Soltústik Qazaqstan, Pavlodar oblystarynda qar sýynyń erekshe mol jınalýynan, birneshe eldi meken men joldar sý astynda qalǵan bolatyn. Tótenshe jaǵdaılar jónindegń vedomstvo sol kezde sý alǵan aımaqtarda 2417 úıdiń sý astynda qalǵanyn habarlaǵan bolatyn. Soltústiktegi oblystardyń basshylary bıylǵy jyly jaǵdaıdyń byltyrǵydan da kúrdeli bolatynyn aıtyp, daıyndyq jumystaryndaǵy kemshilikterdi de moıyndaǵan bolatyn.

Osy maqsatta buginde İİM quramyndaǵy tótenshe jaǵdaılar jónindegi komıtet janynan jedel top qurylǵany aıtylýda. Komıtet qutqarý jumystaryna qatysatyn 200 myń qyzmetshi men, 1000-nan astam arnaıy tehnıkasyn ázirlep qoıypty. Ondaǵylar tipti qutqarý jumystaryna 20 shaqty tikushaq, 200-den astam motorly qaıyqtar da jumyldyrylatynyn aıtýda. Mamandar bıyl qardyń erýi men sýdyń tasýy sáýir aıynda bastalady dep otyr...

Jomart Abdollauly