Akter, telejúrgizýshi Táýekel Músilimniń shańyraq kótergen «toıynyń» qadirmendi qonaǵy bolyp qaıttyq. Naqtyraq aıtsaq...

31-arnanyń uıymdastyrýymen «Kelinder báıgesi» atty realıtı shoýdyń baspasóz konferensıasy bolyp ótti. Konferensıa Ál-Farabı dańǵylyn boılaı jatqan «Mıras» saltanat saraıynda toı úlgisinde boldy. Konferensıa joba ereksheligine baılanysty toı saltanatymen bastaldy. Dástúrge saı «Jar-jar» aıtylyp, «toıdy» basqaryp júrgen asaba jas jubaılardy ortaǵa shaqyrdy. Jańa túsken kelinniń beti ashylyp, qaıyn jurtymen tanysyp alǵan soń jas jubaılar toı tórine jaıǵasty. Keshtiń negizgi keıipkerleri: Kúıeý jigit – akter, telejúrgizýshi Táýekel Músilim, qalyńdyq – model Asylova  Kamıla atty boıjetken bolatyn. Talaı arýymyzdyń júregin jaýlaı bilgen Táýekel bul jaı ǵana qoıylym, áli kúnge deıin basynyń bos ekekin aıtyp ótti.

Jıyn barysynda «Kelinder báıgesi» jobasyna baılanysty kóptegen suraqtar qoıylyp, teıisinshe jaýaptaryn alyp jatty.

Joba 31-arnanyń ustanǵan maqsatyna sáıkes (kórsetiletin baǵdarlamalardyń barlyǵy otbasymen birge kórýge usynylady) kórermenge kóterińki kóńil kúı syılaý, qazaqtyń salt-dástúrin jete túsindirý, «toıdyń bolǵanynan boladysy qyzyq» demekshi toıda bolatyn túrli qyzyqty oqıǵalardy halyqqa boıamasyz usyný maqsatynda jasalyp otyr.

Baǵdat Qojahmetov, 31-arna dırektory:

Qazaq halqy toıshyl ekenin bilemiz. Qandaı daǵdarys bolmasyn, túrli kedergilerge qaramastan toı jasaýdan bas tartpaıdy. Sondyqtan, bul joba halyq arasynda jaqsy qabyldanady dep oılaımyn.

Ásel Toıanova, joba uıymdastyrýshysy:

Bul realıtı shoý qazaqtyń ómirinde bolyp jatqan kúndelikti jaǵdaıdy jaıyp salady. Qatysýshy kelinder bir-birleriniń toılarynyń qadirmendi qonaǵy bolady. Joba as máziri, zaldyń bezendirilýi, qyzyqty oıyndar, qalyńdyq beınesi degen 4 kezeńnen turady.

Atalǵan kezeńder boıynsha kelinder bir-birine baǵa beredi, sol arqyly jeńimpaz anyqtalady. Jeńgen jup bal aıy saıahatyna joldama alady. Bir qyzyǵy joba bastalmas buryn anketa júrgizilgen, eń kóp úmitkerler Shymkent, Taraz, Almaty qalalarynan baq synaǵan.

Osy oraıda «kúıeý jigit» Táýekel Músilim de baǵdarlamaǵa qatysty suraqtarǵa jaýap bere otyryp, bolashaq qalyńdyǵy týraly da oılarymen bólisti.

«Bolashaq jarymnyń qazaq qyzy bolatynyn naqty aıta alamyn.Qarapaıym, aqjarqyn, tárbıeli, boıynda izgi qasıetteri mol ınabatty qyz bolsa deımin», - deıdi Táýekel Músilim.

Daıyndaǵan: Aıjan Jumabekova