Batystyń Ýkraına men Qyrymǵa "arasha túsip", Reseıge salyp jatqan "joıqyn" sanksıalary men "qaharlana" telefon soǵýyna qaıran qalyp otyryp myna bir anekdot esime túsip ketti.
Baıaǵyda bir Dáý kele jatsa, bir aǵashtyń qýysynda ókirip jylap otyrǵan Boıy bir qarys, saqaly qyryq qarysty kórip, júregi ezilip ketipti. - Óı, Qyryq qarys ákem, kim tıisti-eı saǵan? Nege murnyń synǵan, bir tisiń qalmaǵan, saqalyń kúıgen, kóziń qyp-qyzyl, ústi-basyń qan-qan? - dep gújildeı suraıdy Dáý.
- Aqsarbas, aqsarbas, meniń de kúnim týdy ma?! Dáý aǵa, myna jaqta bir Aıdahar shyqty. Jolǵa kese-kóldeneń jatyp alǵan. Úıime qaraı ótkizbeıdi. Sál jaqyndasam, quıryǵymen salyp qalady. Ne aýzynan ot shashyp kúıdiredi. Shap berip ustap alyp soıdıǵan tyrnaqtarymen tyrnalap oınaıdy. Ústi-basymnan saý tamtyq qalmady. Sabala-sabala aýzymda jalǵyz azýym qaldy. Aınalaıyn, Dáý-aǵa, arasha tús! Qudaı jiberdi seni, Qudaı! - dep zarlaı jóneledi álgi.
Dáý Qyryq qarysty jetektep alyp, qabaǵyn túıip, yshqyryn kóterip, Aıdaharǵa jaqyndap barady da, aıǵaı salady.
- Áı, ushatyn jaman kesirtke, beri qara! Myna sorlyǵa endi álimjettik qylsań bar ǵoı óz obalyń ózińe!
Sóıtse álgi aıdahar buǵan nazar da aýdarmaıdy. Tisin shuqyp jata beredi. Ol az bolsa quıryǵynyń ushymen Qyryq qarystyń basynan salyp qalady.
- Áı, mynaý qaıtedi-eı?!!! Men kimmen sóılesip turmyn-eı?!!! Endi bar ǵoı, myna sorlyǵa tyrnaǵyńnyń ushyn tıgizseń bar ǵoı, bittim deı ber!!!
Osy kezde Aıdahar Qyryq qarysty quıryǵymen taǵy bir perip qalyp, jalp etkizedi.
- Áı, Aıdahar, sen ózi meni estip tursyń ba? Kimmen sóılesip turǵanyńdy bilesiń be?!!! Ittiń ǵana balasy, myna Qyryq qarys - meniń týysym! Uqtyń ba?!!! Osydan bar ǵoı, taǵy bir tıisip kór, tórt aıaǵyńdy kókten keltirem!!!
Aıdahar Dáýdiń sózin eleń qylmaı Qyryq qarysty quıryǵymen oraı qysyp, aspanǵa atyp jiberedi.
- Eı, sońǵy márte eskertem..., - deı bergen Dáý jeńinen bireýdiń tartqanyn sezedi. Qarasa, jańa ǵana aspannnan jalp etip qulap túsken Qyryq qarys eken.
- Dáý aǵa, - dep qyryldaı sóılepti álgi beıshara, - Dáý aǵa, qoıshy, qurysyn, eshteńe dep eskertpeı-aq qoıshy. Odan da jalǵyz azýym men sońǵy bir tutam saqalym saqtalyp qalsyn deseń, manaǵy aǵashtyń qýysyna qaıta kóterip aparyp tastashy!
