Ál-Farabı atyndaǵy Qazaq ulttyq ýnıversıtetinde «Oljas Súleımenovtyń shyǵarmashylyǵy jáne ulttyq sananyń ózekti máseleleri» atty halyqaralyq ǵylymı konferensıa ótti.
Belgili aqyn, Qazaqstannyń memleket jáne qoǵam qaıratkeri, halyqaralyq «Nevada-Semeı» antıadrolyq qozǵalysynyń prezıdenti Oljas Súleımenovtiń 80 jyldyq mereıtoıyna arnalǵan jıyn jaǵymdy notada bastaldy. Qonaqtar ulttyq aspaptar ansambliniń súıemeldeýimen tanymal sýretshi Amandos Aqanaevtyń shyǵarmalary, onyń ishinde mereıtoı ıesiniń portreti qoıylǵan kórmeni aralady.
Plenarlyq otyrystyń shymyldyǵyn túre otyryp, QazUÝ rektory Ǵalym Mutanuly Oljas Omarulynyń búginde el ıgiligi úshin qyzmet etip júrgen azamattardyń biri ári biregeıi ekenin atap ótti. «Men Oljas Omarulynyń negizgi úsh qyzmetin atap ótkim keledi. Ol poezıa, ǵylymı proza jáne pýblısısıka, onyń azamattyq ustanymynyń is júzindegi kórinisi. Aqyn retinde ol alpysynshy jyldardaǵy Andreı Voznesenskıı, Robert Rojdestvenskıı, Evgenıı Evtýshenko, Bella Ahmadýllına, Novela Matveeva, Iýnna Morıs jáne ózge de tanymal aqyndar tiziminde oıyp alar orny bar tulǵa. Ol «Net Vostoka ı Zapada net, estogromnoe slovo Zemlá» dep álemge jar saldy. Osylaısha 1961 jyldan keıin óziniń óleńderimen Amerıka men Batys Eýropany baýrap aldy. Onyń shyǵarmashylyq keshterinde zal ishinde ıne shanshyrlyq jer bolmaıtyn edi»,– dedi rektor.
Oljas Súleımenov – batyl áreketter adamy. Dál sondyqtan, qysqa merzimde «Nevada-Semeı» qozǵalysy quryldy. Az ýaqyt ishinde nátıjeli eńbekter atqaryldy. Maqsaty aıqyn aqyndyqty janyna tý etken azamat árqashan el ıgiligi úshin qyzmet etti. Ári qaraı da solaı bola bermek.
«Oljas Súleımenov óziniń eń alǵashqy 1961 jyly sáýirde jazǵan «Adamǵa tabyn jer endi» poemasymen búkil dúnıejúzine qalaı tanylsa, sol tanylǵan bıiginen, óziniń sol rýhanı uly keńistiginen jazbaı, jańylmaı keledi. Oljastyń eń basty baılyǵy, eń basty ereksheligi – onyń boıynda qazaqty álemge tanytatyn úlken rýhtyń, úlken asqaqtyqtyń bar ekendigi. Onyń poezıasy birte-birte kemeńgerlerge tán oıshyldyqqa oıysty. Ol ǵylym men ádebıetti bir-birimen úılestirip, ushtastyra bildi. Osy úrdisti qazir de jalǵastyryp kele jatyr. Oljakeń halqynyń mahabbatyna bólengen tulǵa. Halqymen qashanda osylaı birge bola beredi», - dep atap ótti Qazaqstan jazýshylar odaǵynyń tóraǵasy, aqyn, senator Nurlan Orazalın.
Jazýshy, pýblısıs, lıngvıs Oljas Súleımenovtiń 80-jyldyq mereıtoıyna oraı uıymdastyrylǵan sharaǵa arnaıy shaqyrylǵan mádenıettanýshy, pýblısıs, qoǵam qaıratkeri M.M. Áýezov qatysyp, «Oljas Súleımenov jáne ulttyq ıdeıa» taqyrybynda baıandama jasady. Ol: «Búgingi úlken qýanyshty kún Oljekeńniń qýanyshy ǵana emes, búkil qazaqtyń qýanyshy. Oljas eńbekqorlyǵynyń arqasynda osynsha bedelge jetti. Tek qana ózin ǵana tárbıelemeı, qazaqtyń abyroıly taǵdyry úshin zor úlesin qosty. Dúıim jurttyń arasynda patrıottyqty nasıhattap, ulttyq sana sezimdi oıatqan jáne durys jolǵa salǵan osy Oljekeń bolatyn. Oljastyń júrip ótken joly kez kelgen janǵa úlgi, jetken jeńisi búkil qazaq balasyna ónege. Aqyn – tereń oıdyń azamaty, rýhty adam. Sol myqty rýhynyń arqasynda elimizdiń abyroıyn asqaqtatty. Uttyq rýhty qalyptastyrdy»,- dep sóz bastap, aqynnyń atqarǵan eńbegindegi ult tárbıesine qatysty tyń dúnıelermen tanystyryp ótti.
Alqaly jıyn konferensıanyń seksıalyq otyrystarynda jalǵasty. İs-shara barysynda barlyǵy 50-den astam baıandama tyńdalyp, Oljas Omaruly shyǵarmalarynyń qurylymdyq, stıldik erekshelikteri taldandy.
Urpaqqa úlgi, halqynyń mańdaıyna jaryq juldyz bolyp bitken nar tulǵa mereıtoıynyń alǵashqy legi osyndaı leppen bastaldy. Alǵashqy bolyp quttyqtaǵan alma-mater ujymy Oljas Omarulyna qajymas qaırat, sarqylmas tózim men zor densaýlyq tileıdi. Áli de alar asýlaryńyz kóp bolǵaı!
Eldana Toqbaı
