Memleket basshysy óz sózinde jınalǵandardy aldaǵy Otan qorǵaýshy kúnimen jáne  Uly Otan soǵysyndaǵy Jeńistiń 71 jyldyǵymen quttyqtady, - dep habarlaıdy Qamshy.kz Aqorda saıtyna silteme jasap.

– Mereke qarsańynda biz dástúr boıynsha óz ómirin áskerı qyzmetke arnaǵan eń úzdikterge joǵary ataqtar tapsyramyz. Sizder kún-tún demeı, táýlik boıy qyzmet etetin erekshe mamandyqty tańdadyńyzdar. Sizder Otanymyzdyń qaýipsizdigin nyǵaıtýǵa zor úles qosyp kelesizder, – dedi Qazaqstan Prezıdenti.

Nursultan Nazarbaev búginde respýblıkamyzda tıimdi armıa qalyptasqanyna, qarý-jaraqpen jabdyqtaý baǵdarlamasy tabysty júzege asyrylyp, áskerı qyzmetshilerdiń áleýmettik jaǵdaıyna qamqorlyq kórsetilip jatqanyna nazar aýdardy.

– Eldiń qaýipsizdigi men qorǵanys qabiletine jaýapty barlyq qurylymnyń kásibı deńgeıi kúnnen kúnge ósip keledi. Bul rette generaldar men ofıserlerge aıryqsha mańyz beriledi. Jaýyngerlik mashyq pen sheberlikti arttyrý, áskerlerdiń ómiri men quqyq qorǵaý organdarynyń jumysynda sapaly ózgeris jasaý sizderdiń kóshbasshylyqtaryńyzǵa baılanysty. Sizder búkil jeke quramǵa jáne jas áskerı qyzmetshilerge úlgi bola otyryp, jaýyngerlik abyroı men batyldyq dástúriniń saqtaýshysy bolýǵa tıissizder.  Halyq sizderdiń qyzmetterińiz ben is-áreketterińizge qarap búkil Qarýly Kúshterge baǵa beredi. Sizderge eń qymbat nárse – azamattardyń beıbit ómirin saqtaý jáne Táýelsizdik tabystaryn qorǵaý senip tapsyrylǵan, – dedi Memleket basshysy.

Qazaqstan Prezıdenti eldiń qaýipsiz ári beıbit damýy ǵana onyń ári qaraı órkendeýiniń kepili bolatynyn aıtty.

– «Armıa – óz ornyn eshqashan tastap ketpeıtin máńgilik qaraýyl» degen sóz bar. Men sizderge joǵary ataq bere otyryp, budan ary da áskerı boryshtaryńyzdy laıyqty atqaratyndaryńyzǵa, Otanymyzǵa minsiz qyzmet etetinderińizge senemin. Eldiń qaýipsizdigin qamtamasyz etý, quqyqtyq tártibi men konstıtýsıalyq qurylymyn qorǵaý úshin bar kúsh-jigerlerińizdi, bilimderińiz ben tájirıbelerińizdi jumsaıtyndaryńyzǵa senimdimin, – dedi Nursultan Nazarbaev.

Rásim barysynda avıasıa general-leıtenanty áskerı ataǵy N.Ormanbetovke; vıse-admıral áskerı ataǵy J.Janzaqovqa; Memlekettik kúzet qyzmetiniń general-leıtenanty arnaýly ataǵy – A.Kúreńbekovke; 2-synypty memlekettik ádilet keńesshisi synyptyq sheni – J.Asanovqa; general-maıor áskerı ataǵy – L.Álshekenovke, D.Dilmanovqa, N.Qashaǵanovqa, S.Nurahmetovke, J.Omarqulovqa, M.Satovqa, avıasıa general-maıory áskerı ataǵy – A.Aıymbetovke, N.Kárbenovke; ulttyq qaýipsizdik general-maıory arnaýly ataǵy – A.Dúısebaevqa; syrtqy barlaý general-maıory arnaýly ataǵy – K.Ádenovke,  Memlekettik kúzet qyzmetiniń general-maıory arnaýly ataǵy – A.Áshimbekulyna; polısıa general-maıory arnaýly ataǵy – I.Lepehaǵa; 3-synypty memlekettik ádilet keńesshisi synyptyq sheni M.Qaıybjanovqa, S.Nurpeıisovke, U.Patsaevqa berildi.