15 naýryzdan beri Jezqazǵan men Qyzylorda aralyǵynda qatynaıtyn jolaýshylar poıyzy júre bastaǵan bolatyn. Kópten kútken bul poıyz eki óńir halqy úshin de qýanyshty jaǵdaı edi. Alaıda, kóptiń qýanyshy uzaqqa sozylmady.
Jezqazǵannan shyǵyp Arqa tósinen Syrǵa bet alǵan jolaýshylar poıyzy Qarsaqbaı, Qoskól, Baıqońyr syndy ortalyqtan jyraqta ornalasqan eldi-mekenderdi basyp ótedi. Avtokólik jolynyń jaısyzdyǵynan uzaq jyl qıyndyq kórip kelgen aýyl turǵyndaryna bul poıyz izdegenge suraǵan bolǵan. Bastapqyda poıyz 1 kýpe, 2 plaskart jáne 2 jalpy tıptegi bes vagonmen jolaýshylar tasydy. Endi «Jolaýshylar tasymaly» AQ-y sol bes vagondy kóp kórip, bireýin qysqartyp otyr. Qysqartqanda da eldiń suranysyna ıe ári bılet quny arzan jalpy tıptegi bir vagon alynyp tastaldy. Tasymaldaýshy kompanıanyń bul áreketi óńir turǵyndarynyń naryzylyǵyn týǵyzýda.
«Jalǵyz qalǵan jalpy vagonǵa bılet joq. Plaskartqa da joq. Kýpege alyńdar deıdi. 6 saǵattyq jerge kýpege minip baratyndaı halyq asyp-tasyp otyrǵan joq», - deıdi óńir turǵyndary.
Osy jerde tasymaldaýshylardyń shyǵynǵa batýynyń bir sebebi qylań berip otyr. Poıyz ótetin jańaǵy aýyldarda bılet kasalary joq. Aýyl arasyna, Qoskól aýlynan Jezqazǵanǵa qatynaıtyn jolaýshylar bılet qunyn jolserikterge tólep poıyzǵa minedi. Ol aqsha árıne jolseriktiń qaltasynda qalady. Biraq, bul jerde tıimsizdiktiń tórkini jalpy tıptegi vagonda emes, bılet satý júıesinde ekenin eskergen eshkim joq.
Qaltasyn qaqqan temirjol basshylyǵyna narazy aýyl turǵyndary endi jergilikti basshylyqtan aýyl men qala arasyn jalǵaıtyn tas joldy jóndep berýdi talap etýde.
Aısultan Oıbas
