Sáken Sársenov QR Aqparat jáne komýnıkasıalar vıse-mınıstri bolyp taǵaıyndaldy, - dep habarlaıdy Qamshy.kz atalǵan vedomstvonyń baspasóz qyzmetine silteme jasap.

Sársenov Sáken Seıtjapparuly 1977 jyly 2 aqpanda dúnıege kelgen.

2000 jyly Máskeý memlekettik avıasıa ınstıtýtyn «Aqparatty óńdeý men basqarýdyń avtomattandyrylǵan júıeleri» mamandyǵy boıynsha bitirgen.

Ekinshi joǵarǵy bilimin «Quqyqtaný» mamandyǵy boıynsha Eýrazıalyq gýmanıtarlyq ınstıtýtynda aldy.

2000 jyly Qazaqstan Respýblıkasy Kólik jáne kommýnıkasılar mınıstrliginiń Kóliktik baqylaý komıtetiniń jetekshi mamany retinde memlekettik qyzmetke turdy. Qazaqstan Respýblıkasy radıojelilik spektrin qoldanýdy baqylaý máselelerimen aınalysty. 

2000 jyldyń qarasha aıy men 2003 jyldyń qazan aıy aralyǵynda Qazaqstan Respýblıkasy Qarjy mınıstrliginiń «Qarjy júıelerin aqparattandyrý ortalyǵy» RMK aqparatty qorǵaýdy uıymdastyrý bóliminiń meńgerýshisi bolyp istedi. Mınıstrliktiń aqparattyq júıeleri men resýrstaryn Qazaqstan Respýblıkasynda tuńǵysh ret engizilgen adaptıvtik qaýipsizdik tehnologıasyn qoldanýmen qorǵaýdy uıymdastyrý máselelerine jetekshilik etti.

2003 jyly «Ulttyq aqparattyq tehnologıalar» AQ Basqarma tóraǵasynyń orynbasary bolyp taǵaıyndaldy, munda ulttyq aqparattyq ınfraqurylym men «elektrondyq úkimettiń» ınfraqurylymyn damytý boıynsha memlekettik baǵdarlamalar aıasynda jobalardy iske asyrý men mekemearalyq  aqparattyq júıelerdi súıemeldeý máselelerimen aınalysty. Sol kezeńde «Jeke tulǵalar», «Zańdy tulǵalar» memlekettik derekter bazalary, elektrondyq úkimet portaly, jyljymaıtyn múlik regıstri, elektrondyq qujataınalymynyń biryńǵaı júıesi iske qosyldy.

2008 jyldyń sáýir aıy men 2009 jyldyń qazan aıy aralyǵynda «Qazaqtelekom» AQ-nyń elektrondyq qyzmetter jónindegi basqarýshy dırektory bolyp jumys istedi. Bıznes-jobalardy damytý men Qaznette jańa ınteraktıvtik jáne tranzaksıalyq qyzmetterdi jasaý boıynsha jetekshilik etýmen qatar QR-da elektrondy oqytý jobalaryn iske asyrý men uıaly WiMAX tehnologıasynyń negizinde jeli qurý máselerimen aınalysty. Telekomnan ınfokomǵa kóshý tujyrymdamasyn ázirledi

2009 jyldyń qyrkúıeginen bastap 2010 jyldyń 30 naýryzyna deıin - Qazaqstan Respýblıkasy Bas Prokýratýrasynyń Quqyqtyq statısıka jáne arnaıy esepke alý jónindegi komıtet tóraǵasynyń orynbasary. Qylmystyq isterdiń elektrondy tirkeý júıesin (elektrondyq ÓEQ) ázirlep engizdi.

2010 jyldyń naýryz aıy men 2012 jyldyń qańtar aıy aralyǵynda - Qazaqstan Respýblıkasynyń baılanys jáne aqparat mınıstrliginiń vıse-mınıstri. Dál osy kezeńde, 3G qyzmetteri, sıfrlyq spýtnıktik jáne efırlik teledıdar iske qosyldy, sondaı-aq, 2011 jyldyń 11 naýryzynda osy mekemege tapsyrylǵan halyqqa qyzmet kórsetý ortalyqtary (HQKO) jańǵyrtylyp avtomattandyryldy.

2012 jyly 1 aqpanda Qazaqstan Respýblıkasynyń kólik jáne komýnıkasıa mınıstrliginiń vıse-mınıstri bolyp taǵaıyndaldy (№180 01 aqpan 2012 jylǵy Qazaqstan Respýblıkasy Úkimetiniń qaýlysy). Bul laýazymda baılanys qyzmetteriniń tarıfterin tómendetý men memlekettik qyzmetterdi avtomattandyrý jumystaryn jalǵastyryp, 4G-diń iske qosylýyn, MNP jobasynyń bastalýyn jáne de avtomobıl ıelerine arnalǵan arnaıy HQKO-larynyń ashylýyn baqylady.

2014 jyldyń sáýir aıynda Qazaqstan Respýblıkasynyń Baılanys jáne aqparat agenttigi tóraǵasynyń birinshi orynbasary bolyp taǵaıyndaldy. HQKO, elektrondyq úkimet, IT jáne telekomýnıkasıa salalaryn damytýmen aınalysty.

2014 jyldyń 18 tamyzy men 2016 jyldyń 21 mamyr aıynyń aralyǵynda - Baılanys, aqparattandyrý jáne aqparat komıtetiniń tóraǵasy, QR Investısıa jáne damý mınıstrliginiń vıse-mınıstri.

2016 jyldyń 21 mamyrynan bastap - QR Aqparat jáne komýnıkasıa vıse-mınıstri. HQKO, elektrondyq úkimet, aqparattandyrý jáne baılanys salalaryn damytý boıynsha jumysyn jalǵastyrýda.