Altyn folgany Kúnshyǵys elinen ǵana kórýge bolady

Qalyńdyǵy 0,00001 nemese 0,00002 mm bolatyn shynaıy altyn qaǵaz tek Japonıada jasalady. Onyń myń jyldan asatyn tarıhy bar. Syndyryp almas úshin qolmen emes, bambýk taıaqshalarymen ustaıtyn asyl qaǵaz taza altynnan jasalady. Ishıkava prefektýrasyndaǵy Kanadzava qalasyndaǵy «Sakýda» kompanıasy eldegi altyn folganyń 99 paıyzyn shyǵarady. Burynǵy  kezde tehnıka paıdalanylmaı jasalǵan  altyn qaǵazdy hakýdashı deıdi. Keıingi kezde bul qaǵazdy jasaýǵa hakýdakı degen apparat qoldanylatyn boldy. HIÚ ǵasyrdaǵy Ashıkaga Ioshımısý saldyrǵan Kınkakýdzı de altyn folgamen qaptalǵan. Ogata Korına (1658-1706) esimdi sýretshiniń týyndylarynan da altyn folgany kórýge bolady. Ejelgi japon sýretshileri altynmen aptaý ádisin jıi paıdalanǵan. Haıashıbara murajaıynda Edo dáýirindegi (1603-1867) No teatrynyń altyn folgamen qaptalǵan  órnekti kostúmi  saqtaýly tur.

Kaga ólkesiniń bıleýshisi Maeda Toshııeniń (1538-1599) makıe tehnologıasymen jasalǵan qylyshynyń qyny qazirgi zamanǵa jyp-jyltyr kúıinde jetip otyr. Sondaı-aq, Japonıanyń ulttyq tarıhı murajaıynda altyn kómkergen  Kıoto shahary beınelengen týyndy bar. Sýretshi tutastaı altyn folgany paıdalanǵan.

Bul vana 50 kg sary altynnan quıylǵan

Tynyq muhıt jaǵalaýyndaǵy Kamogava qalasy ystyq qaınarlarymen belgili. Chıba prefektýrasyna jatatyn osy qalada «Kamogavahoterýmıkadzýkı» degen qonaqúı ornalasqan. Qonaqúıge  kelýshilerdiń altyn vanaǵa túsýine bolady. Iá, kádimgi vana, tek altynnan jasalǵan.  Quny qazirgi aqshamen 120 mıllıon ıen bolatyn vana 18 karattyq 50 kg sary altynnan quıylǵan.  Kórkem bezendirilgen órnekti vananyń sýyna 200 myńǵa  jýyq adam shomylǵan kórinedi. Qonaqúı qyzmetkerleri vanaǵa túskenderdiń alǵan áserin de qaǵazǵa tirkep otyrady. Saýalnama nátıjesinde, shomylǵandardyń kópshiligi  «altyn vanaǵa túsip, ózimdi bir sátke naǵyz mıllıoner sezindim» depti.

Sharafat Jylqybaeva

 japontanýshy