Astanadaǵy №2 Esil aýdandyq sotynda Seıitqazy jáne Áset Mataevtardyń qylmystyq isi boıynsha sot prosesi jalǵasyp jatyr. Búgingi  sot otyrysynda sotqa jaýap bergen IT-mamany Marǵulan Dúzeldikov «QazTAG» halyqaralyq aqparat agenttiginiń memlekettik aqparattyq tapsyrys aıasynda óz jarıalanymdaryn 5 myń teńgege satqanyn málimdedi. Onyń aıtýynsha, kelisim-sharttyń talaptary boıynsha, S. Mataevtyń ıeligindegi «QazTAG» agenttigi kún saıyn ashyq jaǵdaıda jańalyqtar jarıalaýy tıis bolǵanymen, biraq bul talap oryndalmaǵan. Óıtkeni agenttik jańalyqtary tek aqyly qyzmet túrin paıdalanatyn oqyrmandarǵa ǵana qoljtimdi bolǵan.

«Agenttik jańalyqtarynyń kópshiligin kez-kelgen oqyrman oqı almaıtyn, óıtkeni ol tek aqyly qyzmet túrin paıdalana alatyn oqyrmandarǵa qoljetimdi boldy. Mysaly, ár materıaldy oqý úshin 5 myń teńge tóleýge tıissiń. Sonymen qatar, jańalyqtarǵa jazylýshylardyń sany 200-den aspaýy qajet degen talap qoıyldy»,- dep túsindirdi istiń aq-qarasyn sotqa bergen jaýabynda M. Dúzeldikov. Ol sotqa QazTAG agenttiginiń ortaazıalyq áriptesteriniń barlyǵy bir serverde ornalasqanyn aıtyp berdi. Materıaldardy redaksıalaýǵa tek Áset Mataevtyń quzyreti bolǵan.

  «QazTAG aqparattyq resýrsyna tolyq tekserý júrgizý nátıjesinde QyrTAG, AýTAG, ÓzTAG jáne TájikTAG aqparattyq agenttikteri bir serverde ornalasty, olardyń ákimshileri men redaktorlarynyń is júzinde barlyq resýrstarǵa shyǵa alatyn múmkindigi boldy. QyrTAG, AýTAG, ÓzTAG jáne TájikTAG-tyń barlyq jarıalanymdaryn tek Áset Mataev qana túzete alatyn edi. Iaǵnı, atalǵan aqparat agenttikteri áriptester emes, týrasynda Áset Mataevtyń ıeligindegi resýrstar»,-dedi M. Dúzeldikov.

Sarapshy mamanyń aıtýynsha, tehnıkalyq erekshelikterge sáıkes, qoıylǵan talaptyń biri fotomuraǵattyń bolýy. Alaıda ondaı fotomuraǵat bolmaǵan. Bul týraly sotqa bergen jaýabynda Marǵulan Dúzeldikov: «Zertteý barysynda dıskide eshqandaı fotomuraǵat tabylmaǵan joq. Alaıda QazTAG atqarylǵan jumystar týraly esep bergende tapsyrys berýshiniń esebimen qatar elektrondy muraǵatty qosa tapsyrýǵa mindetti. Biraq materıaldardy muraǵattaý jumysy júrgizilmegen»,- dep túsindirdi.

Aıta ketelik, sotqa deıingi tergeý is-sharalarynan anyqtalǵandaı, 2010-2015 jyldar aralyǵynda Seıitqazy Mataev óz uly – «QazTAG HAA» JSHS-iniń bas dırektory Áset Mataevpen birlesip aldyn-ala bir top adamdarmen sóz baılasyp, aldaý men senimdi teris maqsatqa paıdalaný jolymen memlekettik satyp alý salasyndaǵy iri kólemdegi búdjet qarajatyn jymqyrdy. Urlanǵan aqshanyń kólemi 169 mln. teńgeni quraǵan.

Ámirlan Álimjan