Aqtóbe men Almatydaǵy lańkestik oqıǵalarǵa qatysty tergeý aıaqtalyp, is sotqa jetti. Kesheli beri qandy qylmysqa qatysty sot otyrystary ótýde.
5 maýsym kúni Aqtóbede bolǵan teraktige baılanysty sotta barlyǵy 29 adam aıyptalýda. Olardyń 9-y naqty lańkestik áreket jasap qolǵa túskender, 18 aıyptalýshy jasalǵaly jatqan qylmys týraly bile turyp, tıisti organdarǵa habarlamaǵany úshin jazyqty bolsa, 2 adam boıtasalaǵan lańkesterdi jasyrýǵa septeskeni úshin sot aldynda jaýap berýde. Sottyń alǵashqy otyrysy búgin bastaldy.
Almatydaǵy aty shýly atysqa qatysty basty aıyptalýshy R. Kúlikbaev isi boıynsha da alǵashqy sot tyńdaýy keshe boldy. Aty sot otyrysy bolǵanymen bul shara Kúlikbaev qamalǵan tergeý ızolátorynyń 
qabyrǵasynda ótti. Kúlikbaevpen birge taǵy bes adam zańsyz qarý saqtaǵany jáne qaraqshylyq shabýyl jasaǵany úshin sot aldynda jaýap berýde. Kúlikbaevtiń ózi terorızm, kisi óltirý, tonaý, qarý jasaý, qaraqshylyq, adamdy zańsyz bas bostandyǵynan aıyrý, kólik urlaý syndy birneshe baptarmen aıyptalýda.
Atyshýly eki sottyń da basty ereksheligi – qaýipsizdik sharalarynyń erekshe jaǵdaıda kúsheıtilýi. Árıne, kartoshka urlaǵan ádettegi ury emes, birneshe kisiniń qanyn júktegen, qarýly shabýyl jasaǵan qylmyskerler sottalyp jatyr. Qyraǵylyq tanytpasa bolmaıdy. Biraq, myna sottardan baıqaǵanymyz quzyrly organdar sottalýshylardyń bostandyqta jaqtastary, jaı ǵana jaqtas emes, quqyqqorǵaý organdaryna shabýyl jasap, kúdiktilerdi jazadan qutqaryp alýdy kózdeıtin toptardyń baryn sezetin sıaqty. Almatydaǵy sot prosesi tergeý ızolátorynyń qabyrǵasynda ótýde. Buǵan deıin ataqty «Qorǵas isi» de osyndaı tártippen ótken. Ol túsinikti de. Birneshe mıllıon dollarlyq qarjy jymqyrý sqemasyn júzege asyrǵan kúdiktilerdiń sot zalynan qashyp shyǵýy, oǵan kezinde qarjylyq qıturqylyqtardy birge jasap, bostandyqta júrgen yqpaldy bireýlerdiń kómektesýi de múmkin edi. Al, 
tutastaı qoǵam qarǵys aıtyp otyrǵan Kúlikbaevke qatysty mundaı saqtyq sharalary neden týyp otyr? Tergeý organdary bas kúdiktini qala ishimen aıdaýyldap qylmystyq sot ǵımaratyna aparýdan nege qaýiptendi? Basty sebep – sotta aıtylǵandaı kúdikti aıdaýyldaý kezinde qashyp ketýi múmkin. Al, muzdaı qarýlanǵan jasaqqa qarsylyq kórsetip, arnaıy kólikten bosap shyǵý bir adamnyń qolynan keler is emes.
Aqtóbedegi sottaǵy jaǵdaı da osyǵan uqsas. Alǵashqy otyrys sot ǵımaratynda ótkenmen, ol aýmaq ta qatań baqylaýǵa alynǵan. Tipti, úılerdiń tóbelerine mergender qoıylyp, sot ǵımaratynyń aınalasyn avtomatpen qarýlanǵan arnaıy jasaq kúzetýde. Demek, polısıa qandy qyrǵyn uıymdastyrǵan kúdiktilerdiń janashyrlyq tanytýy múmkin týystarynan emes, aram nıetti, teris aǵymdar jeteginde ketken ıdeıalyq jaqtastarynan qaýiptenetin sekildi. Al, ol «jaqtastardyń» kim ekenin anyqtaý, bul qaýiptiń qashanǵa deıin sozylary, lańkestermen nıettes radıkaldardyń qashan quryqtalyp, qoǵamdaǵy úreıdiń qashan seıileri áýeli bir Allaǵa aıan, sodan keıin kúshtik qurylymdar men jaýapty memlekettik organdardyń júıeli jumysyna baılanysty.
