Reseılik kórermenge “Chernobyl. Zona ochýjdenıa”, “Ekıpaj”, “Laskovyı maı” syndy kınolar arqyly jaqsy tanys akter Sergeı Romanovıch nelikten ıslamdy qabyldaǵany týraly suhbat berdi.

Bul týraly islam.kz habarlaıdy.

Bul sheshimdi Sergeı tórt jyl buryn qabyldaǵan. Bala kúninen ártis pravoslavty hrıstıan otbasynda tárbıelengen. Shoqynǵan. Nıkolaı Chýdotvores áýlıeniń sýretin tumar qyp taǵyp júrgen eken. Biraq 17 jasynda seniminde kereǵarlyq kóp ekenin baıqaıdy. Shirkeýge baryp, din qyzmetshisinen “İnjildegi ekinshi ósıette: “Ózińe eshkimdi pir tutpa, sýretterge tabynba” delinedi. “Al, biz nege áýlıelerdiń sýretterine tabynamyz?” – dep suraıdy. Din qyzmetshisi sózbuıdaǵa salyp, áýlıeler degen jolbastaýshylar degendeı áńgime aıtady. “Men jalpy maksımalıstpin. Eger basynda osylaı jazylsa, onda ony basqasha tápsirleý artyq dep bilem. Osylaı ishimdegi kereǵarlyq pisip jetildi. Shirkeýge barmaı kettim. Áýlıelerdiń sýretterine qarap shoqynbaıtyn boldym. Qudaı ár adamnyń janynda dep túsindim. Din tobyrdy basqarý úshin oılap tabylǵan dep baǵaladym” deıdi ol.

Sergeı 20 jasqa tolǵanda sheshen dosy Shámildiń aǵasymen din haqynda daýlasyp qalady. Ekeýi bes saǵat talasyp-tartysady. Shámildiń aǵasy oǵan, “Sen ártissiń, ártistigińdi dáleldeý úshin obrazǵa enesiń, sahnada oınaısyń. Al, Qudaıǵa sengenińdi qalaı kórsetesiń, nemen dáleldeısiń?” – dep suraıdy. Sodan keıin Sergeı Quran men İnjildi qatar satyp ákelip, salystyryp oqıdy. Allany taný úshin onyń paryz etken amaldaryn buzbaı oryndaý kerektigin moıyndaıdy.

“Meni sol kúnnen bastap din taqyryby qyzyqtyrdy. Bardym da Quran men İnjildi qatar satyp aldym. Salystyrǵym keldi. Oıym tek aqıqatty túsiný boldy. Bir aıdan keıin Islamdy qabyldadym. Shámildiń asúıinde otyryp, senimge toly júrekpen: “Lá ıllaha ıllalla, Muhammadar rasýlAlla” dep moıyndadym. Sol kúnnen bastap bes ýaqyt namaz oqımyn. Osy joly oraza ustadym. Kún batqansha nár tatpaı júrdim”, – deıdi Sergeı.

“Qurandy bitirgen soń sońyndaǵy hadısterin oqyǵan kezde kózim sharasynan shyǵa jazdady. Tań qalysymda shek bolmady! Barlyq saýalǵa jaýap taptym! Bári maǵan ǵana arnalyp jazylyp, menimen bireý sóılesip otyrǵandaı kúıde boldym. Túsine almaı júrgen dúnıeniń bárin qarapaıym túrde aıtyp, jetkizgenine tamsandym”, – deıdi ártis kezekti bir suhbatynda.

Sergeıdiń ata-anasy alǵashynda uldaryn sektaǵa kirip ketti dep oılady. Tek ýaqyt óte kele túsinistik tanyta bastady. Al Sergeı Romanovıchtiń ózi osydan keıin dinı senimine qaıshy keletin fılmderge túsýden bas tartty. Aleksandra Golovkova atty sulýǵa úılenip, nekelerin musylmansha qıdyrdy.