Almaty oblysynda aǵaıyndylardyń ólimine qatysty úshinshi kúdikti anyqtaldy. Úńgirtas aýylynyń turǵyny Baqyt Baıqasymov marqumdardyń qalaı óltirilgenin kórgen. Jigit, tipti, áli tiri jatqan azamattardyń birine arasha túspek te bolypty. Biraq qoryqtym degen jeleýmen keıin polısıaǵa habarlamaǵan. Tártip saqshylary da ony sybaılas retinde ustaǵanymen, keıin qolhatpen bosatyp jibergen.
Bul týraly Ktk arnasy habarlaıdy.
-Úsh aǵaıyndynyń ólimine qatysy bar delingen úshinshi kúdikti osy Úńgirtas aýylynan eken. Eldi meken qalǵan eki kúdiktiniń aýyldaryna jaqyn ornalasqan. Jáne urlyqy mal biraz kúnderi osynda ustalyp júripti. Jáne onyń barlyǵyn kórshi-qolań kórgen. Olar aýyldastarynyń bul qylmysqa qatysy baryna esh tańqalmaı otyr. Óıtkeni, Baqyt Baıqasymov buryn da isti bolǵan eken.
Baqyt Baıqasymovty o basta qamalǵan eki kúdikti baıqaýsyzda ustap bergen eken. Basynda «tek ekeý boldyq» degender qastarynda taǵy tanysynyń júrgenin aıtyp qalǵan. Úshinshi kúdikti qandy qylmys bolǵan kezde taýda mal baǵyp júripti.
Gúljan Jurmanova, Baqyt Baıqasymovtyń týysy:
-Óziniń maly emes ol, ol-shaban. Bireýdiń shabany bolyp jumys isteıtin. Ol tabylǵan jumys istedi ǵoı bylaısha aıtqanda. Onyń úıi de joq, kúıi de joq. jalǵyz ózi áıteýir kúnkóris.Kórgen de joqpyz qaıda turady, ne turady bilmeımiz ol jaǵyn.
Bul –sol úshinshi kúdikti Baıqasymovtyń týystary. Jeńgesiniń ózi qaıynysynyń kisi ólimine qatysy bar-joǵyn bilmeımin dep basyn ala qashty. Esesine kórshileri jigittiń júrisi jaıly aıtyp berdi. Úsh aǵaıyndynyń ólimine qatysy bar delingen úshinshi kúdikti aýylda únemi sharýasyz, ári araq iship júripti.
Orynkúl Batyrhanova, Úńgirtas aýylynyń turǵyny :
-Endi kóremiz ǵoı aýylda júrgende araq ishetinin. Toptalyp júrgende ishedi, kóremiz endi kósheden iship júrgenin.
Baqyt Baıqasymov marqumdardyń qalaı óltirilgenin kózben kórgen. Ol baıqaýsyzda qylmystyń ústinen túsipti. Jigit, tipti, áli tiri jatqan Qadilbekke arasha túspek te bolǵan eken. Biraq ózin de qosa atyp jibere me dep qorqyp, qylmys týraly jaq ashpaǵan. Polısıa ony sybaılas retinde kúdikke alǵanymen, keıin qolhatpen jibere salǵan. Dese de, marqumdardyń týystary onyń da jazaǵa tartylýyn surap otyr.
Erkin Beıseke, marqumdardyń týysy:
-Baqyt qylmystyń ústinen túsken. Múmkindigi bola tura málimdegen joq. Sondyqtan ol da sol qylmysqa qatysqan dep esepteımiz. Bul qylmystyń ishinde úsh adammen aqyrlasýy múmkin emes. Ony uıymdastyrǵan basqa da adamdar bolýy múmkin.
Kúdiktilerdiń máıitterdi osy aýyl arqyly alyp ótkendigi de kúdik týdyrady. Qazir tergeý aıaqtalǵan. Olarǵa qatysty sot osy qarasha aıynda bastalady dep kútilýde.
