Semeıde bir jarym jasar qyzyn Ertiske aǵyzyp jiberdim degen kelinshekten kúıeýiniń jaqyndary kúdiktene bastady. Óıtkeni tergeý barysynda kelinderi judyryqtaı Aıshany sýǵa naqty qaı jerden tastaǵanyn aıtpaı, úsh jaǵalaýdy kórsetip álek bolǵan. Tipti, odan psıhıkalyq aýytqý turmaq, ókinishtiń taby da baıqalmaıdy deıdi kúdiktenýshiler. Sondyqtan bul áıel balany jasyryp otyr, ne bolmasa satyp jiberdi degen oıda.
Bul týraly Ktk arnasy habarlaıdy.
Oqıǵa osydan bir apta buryn bolǵan edi. Kúıeýimen aradaǵy janjaldan keıin 24 jastaǵy Aısulý qarshadaı qyzyn qolyna alyp Ertiske bettegen. Basynda ózimen qosa balasyn da óltirmek bolǵan kelinshektiń jeme-jemge kelgende júregi shydamaǵan kórinedi. Alaıda aǵyny qatty ózenge Aıshany ǵana tastap jiberipti. Al qyzdyń shyrt uıqydaǵy ákesi urys-keristen keıin áıeli jan túrshigerlik jaǵdaıǵa barady dep oılamaǵan.
Aıdyn Serikbolsynov, Aıshanyń ákesi:
-Ertistiń jaǵasyna jaryq túsirsem kúrteshe jatyr. Birden sýǵa sekirdim. Tússem joq. Ózim batyp kete jazdadym. Sýyq. Aıaǵym tartylyp qaldy.
Sodan beri sýdy súzgen súńgirýler 1 jarym jastaǵy balanyń denesin qansha sharlaǵanymen taba alatyn emes. Al týystary kelinderiniń qylyǵyna senbeıdi. Óıtkeni olar qyzynyń kıim-keshegin kórse de, júregi selt etpegen anadan sekem alyp otyr. Tipti kelinshek tergeýshilerdiń ózine naqty qaı jerden aǵyzǵanyn dál kórsete almaǵan. Osydan keıin týystary balany jasyryp otyr ne satyp jiberdi degen tujyrymǵa kelipti.
-Eshqandaı ókinish bolǵan joq. Sonyń bárin tergeýshilerge qalypty túrde kórsetti. Jylaǵan da joq.
Nurlan Saılaýhanuly, Aıshanyń atasy:
-Ittiń kúshigin sýǵa laqtyrsan ózi baryp alyp shyǵady. Mynaý, adam ǵoı endi. Jándik emes, ań emes. Menińshe ol óltirgen joq. Bir jerge tyǵyp tastaǵan sıaqty. Sony uqpaı otyrmyz.
Aısulýdyń densaýlyǵynda buryn-sońdy eshqandaı aýytqýlar bolmaǵan eken. Kórshilerimen de, dostarymen de qarym-qatynasy jaqsy. Olar da, onyń bul jaǵdaıǵa barýy múmkin emes ekenin alǵa tartýda. Kórshileri erli-zaıyptylardyń janjaldasyp jatqanyn da buryn baıqamaǵan.
Natalá Zaıseva, kórshisi:
-Onyń bir kógerip júrgenin kórmedik. Aıdyn da qol kótermeıtin. Ol araq ta ishpeıdi. Eńbekqor. Bularda barlyǵy jetkilikti. Kóshede balalaryn serýendetip júretin. Estigende barlyǵymyz jaǵamyzdy ustadyq.
Tergeý amaldary júrgizilip jatqandyqtan polısıa qandaı da bir málimet berýden bas tartty. Tek belgilisi, búginde bul oqıǵaǵa qatysty qylmystyq is qozǵalǵan. Balasyn sýǵa tastadym degen Aısulý sábı denesi tabylmaǵandyqtan qolhatpen bosatylypty. Al judyryqtaı Aıshany tiri dep úmittenip otyrǵan týystary endi kóripkelderdiń kómegine júginbek nıette.
