ÓMİR
Poezıa, ony prozaǵa, tozaqqa aınaldyryp júrgen ózimiz… Alla Taǵala adamdardyń tilderin ár túrli ǵyp, túsinistikpen aıyryp jibermegende, qudaımen teńespek oımen be, bálkim aspandaǵy Jumaqqa qaıta oralý úshin be eken, olar áıgili Babyl Munarasyn aspanǵa deıin salyp alar ma edi…
BAQYT
Soqyr qus. Sondyqtan kim kóringenniń basyna qonady. Qadirin bilgen uıalatady. Bilmegen úrkitedi. Adam balasy ómir baqı sol qustan kóz almaı, kútip ótedi. Baqytty óz qolymen jasaımyn deıtinder de bolady. Qoldan jasalǵan nárseniń qadiri bolǵanmen, qasıeti bolsyn ba…
JALǴYZDYQ
Japalyq. Ortańnan oqshaýlyq. Ózge ólshem. Aınalańnyń arzandyǵyn seziný. Bıigiń pás, tereńiń saıazdaǵanyna qapa bolý. Bul aqyly barlardyń aýrýy, aqylsyzdar jalǵyzdyqty sezinbeıdi ǵoı. «Aqymaqtyń aty aryp, tony tozbaıdy» degendi atam Jamanqul Rahymeli jıi aıtatyn. Alaıda jalǵyzdyq Allaǵa ǵana jarasqan. Bizdiki ásheıin pendeshilik.
MAHABBAT
Mán. Mazmun. Ómirdiń máni men mazmunyn aıtamyn. Bul da adam balasyna Allanyń jibergen qudireti. Jalǵyz adamǵa ǵana emes, búkil jan-janýarǵa da darytylǵan sıqyr. Olar tek ony sezine almaıdy, olarǵa júrek deıtin «judyryq» berilmegen. Mahabbat bar jerde aspandaý, ushý bar, muńdaný bar. Saǵynyp, sarǵaıý bar. Ahylep, úhileý bar. Aspandaý degen – jumaqqa jaqyndaý emes pe?! Demek, mahabbat – Jumaqqa talpyný!
SULÝLYQ
Kózdiń qurty. Tán sulýlyǵyn aıtamyn. «Syńǵyrlap óńkeı kelisim» dep Abaı hákim aıtqandaı, sulýlyq degen – náziktik, móldirlik, túzýlik, tazalyq, sımmetrıa, paralel… Al jan sulýlyǵy kókiregi soqyrlarǵa kórinbeıdi. Bular da Allanyń óziniń asa yqylaspen jaratqan pendesi Adamdy eljireı súıip, súısinip, shyn júregimen, erekshe meıirlene jasaıtyn «shyǵarmasy», qudireti.
QYZǴANYSH
Qyzyl ıt. Dert. Adam balasynyń aǵzasyna, mendik egoızm men menshiktik mentalıtet paıda bolǵanda, İbilis jibergen indet. Tobashyldyq bar jerde ol ıt «úrmeıdi de, yryldamaıdy». Súıispenshilikten týyndaǵan qyzǵanysh dep, adamdar ózdi-ózin aldarqatýǵa bolmaıdy, demek, ol sezim ekeýdiń birinde joq bolǵany…
TAǴDYR
Adamdardyń ózderi, óz qolymen jasaıtyn tálkegi. Óziń jasaǵan nársege ókpeleýge bolmaıdy…Qoǵam men zamannyń tálkegindegi taǵdyr – zaýaldy kúná. Ol zaýalmen kúresip nemese moıynsunyp sheıit bolǵandardyń jany jánnatta shyǵar… zaýal jasaǵandar – tozaqta bolar…
TÁÝELDİLİK
Quldyq. Kemistikti moıyndaý. Noqtaǵa kónýshilik. Ynjyqtyq. Tuıaq serippeýdi ádetke aınaldyrý.
TEKTİLİK PEN ULYLYQ
Tereńdik. Qannan keledi. Ulylyq – bıiktik. Alladan darıdy.
ÓNERDİŃ MAQSATY
Ómirdegi ótirikterden alshaqtatý. Kezdese bermeıtin ádilet pen shyndyqtyń aýylyna jol silteý. Adam balasynyń bir-birine baýyr ekendigin kózge shuqyp aıtý. Júrekterine kóbirek qulaq asyp, aqyldaryn at teppeýin eskertý.
Ázirlegen – Ásıa Baǵdáýletqyzy.
