Uzynaǵashtaǵy úsh aǵaıynynyń ólimine qatysty kezekti sot otyrysy Qaskeleńde ótti. Jol jaǵdaıyna baılanysty jábirlenýshiler Taldyqorǵannan keshigip kelgendikten 12-de bastalýy tıis sot otyrysy 13:10-da bastaldy.
Buǵan deıin habarlaǵanymyzdaı, mal saýdasymen aınalysqan aǵaıyndy úsh jigittiń ólimine qatysty tergeý jumystary aıaqtalyp, sot prosedýrasy kezeńine ótken edi. Alaıda, tergeý jumystaryna marqumdardyń týystary kúmán keltirgen bolatyn. Sot otyrysynda jábirlenýshiler tyńdaldy. Marqumdardyń týystary ózderiniń tergeý jumysymen tanysqanyn, alaıda kóńili tolmaıtynyn baıandady. Olar Sottan taǵy da ádil sheshim shyǵarýyn, oqıǵany búge-shigesine deıin anyqtaýdy ótindi.
Birinshi sot tyńdaýyna marqumdardyń 50-den asa týysy ózge qalalardan keldi. Sotqa Uzynaǵashtyń eki turǵyny Murat Ońalbaev pen Talǵat Súleımenov tartylyp otyr. Olarǵa QR Qylmystyq kodeksiniń 99 ("Adam óltirý"), 192 ("Qaraqshylyq") jáne 202-baptary ("Bótenniń múlkin qasaqana joıý nemese búldirý") boıynsha aıyp taǵylǵan.
Sondaı-aq, qylmysty habarlamady dep jergilikti malshy Baqyt Baıqasymov aıyptalyp otyr. Sóıtsek, ol 2000 jyly tonaý jáne qaraqshylyq baptary boıynsha Qaraǵandy oblysynda sottadyp, bes jyl otyryp shyqqan eken.
"Men óz kinámdi moıyndaımyn, biraq ishinara. 192 jáne 202-baptar boıynsha taǵylǵan aıyppen kelispeımin. Bul aldyn ala kelisý bolǵan joq, kólikti órtegen joqpyz. Uqypsyzdyqtan boldy", - dep málimdedi Súleımanov.
Al Ońalbaev ózine taǵylǵan eshbir aıyppen kelispeıtinin málimdedi. Qylmystyń kýágeri, ıaǵnı jergilikti malshy Baıqasymov ta aıyppen kelisip otyrǵan joq. Aıtýynsha, ol qylmys jaıly quqyq qorǵaý organdaryna óziniń jáne jaqyndarynyń ómirine alańdaǵandyqtan habarlamaǵan.
Otyrysta birinshi bolyp memlekettik aıyptaýshy sóz sóıledi. Ol qandy qylmystyń hronologıasyn baıandady. Onyń sózine qaraǵanda, sottalýshylar aǵaıyndylardy taý bókterinde bir-birden óltirgen. Alaıda marqumdardyń biri bul nusqamen kelispeıtinin aıtty. Qaza tapqan Jarqynbek Doldanulynyń aǵasynyń aıtýynsha, úsh er adam oq atylǵanda seziktenýi tıis edi. "Munda qylmyskerler taý bókterine jaqyndaǵanda 16 bas maldy úsh reıspen jeke-jeke tasyǵan dep jatyr. Bastapqyda aǵaıyndylardyń birimen tasyǵan, keıin ekinshisin jáne osydan soń úshinshisin aparyp óltirgen deıdi. Biraq bul jigitterdiń mal saýdasymen aınalysyp júrgenine talaı jyl boldy. Olar maldy shatqalǵa aparýǵa kelispes edi. Olardy zorlap aparǵan. Barǵan jerlerinde osy eki qylmyskerdiń bandasy bolǵan, olardy da túrmege qamaý kerek", - dedi marqumnyń aǵasy.
Aıta keteıik, marqumdardyń týystary árbir otbasyǵa 15 mıllıon teńgeden ótemaqy talap etip otyr.
Esterińizge salsaq, 18 qyrkúıekte Almaty oblysy Jambyl aýdanynda joǵalǵan úsh azamattyń qylmyskerler qolynan qaza tapqany, osy qylmysqa qatysty kúdikti retinde 24 qyrkúıekte eki azamattyń ustalǵany habarlanǵan bolatyn. Atalǵan úsh azamat, 1979 jylǵy Doldanuly Jarqynbek, 1973 jylǵy Zarlyhanuly Muqıat pen Álimhan Qadylbek esimdi jigitter Shyǵys Qazaqstan oblysynyń Tarbaǵataı aýdanynan 40 bas mal satyp alyp, ony eki júk kóligimen 17 qyrkúıek, senbi kúni, Almaty mańyndaǵy Uzynaǵash bazaryna shyǵarǵan.
Erlan Tóleýbaı
