Búlingen pavılonnyń sýreti
Búgin, Elbasy «Astana EXPO-2017» ulttyq kompanıasy basshysy Esimovti qabyldady. Kezdesýde A.Esimov Elbasyǵa «EKSPO-2017» halyqaralyq kórmesine daıyndyq barysynyń sońǵy kezeńi týraly baıandady. Degenmen keshe ǵana qulap qalǵan pavılon týraly sóz bola qoıǵan joq.
«Astana EKSPO-2017» ulttyq kompanıasy» AQ basqarmasynyń tóraǵasy qurylys jumystary kestege sáıkes júrgizilip jatqanyn aıtyp, tipti «alǵashqy nysandar tapsyrylýǵa daıyn, sonyń ishinde jalpy kólemi 285 myń sharshy metr bolatyn halyqaralyq pavılondar bar», - dedi.
Esimovke «Bizge sheteldik qatysýshylar kórmede kórsetetin jańa ınovasıalyq tehnologıalardy barynsha paıdalaný qajet», - degen Elbasy kórmeni laıyqty ótkizip, sodan keıin Qazaqstanda onyń jetistikterin paıdalaný qajettigin atap ótti.
Pavılonnyń qulamaı turǵandaǵy sýreti
Al, Syrtqy ister mınıstri Erlan Ydyrysov keshe oryn alǵan tótenshe jaǵdaıǵa qaramastan EKSPO-2017 kórmesi nysandarynyń bári ýaqytynda tapsyrylatyndyǵyn jetkizdi. «Eshqandaı úlken másele joq. Bul aralyq konstrýksıa, negizgi ǵımarat emes. Bul jumys prosesi. Kez kelgen qurylysta osyndaı jaǵdaılar bolyp turady. Shuǵyl áreket jasaldy, qaza tapqandar joq. Qurylys júrip jatyr, bári ýaqytynda tapsyrylady. EKSPO boıynsha qoıylǵan barlyq mindetter ýaqytynda oryndalady. Keshe naqty túsinik berildi», - dedi Ydyrysov.
Al, senat depýtaty Asqat Kúzekovtyń aıtýynsha, EKSPO sekildi kúrdeli qurylystar kezinde ártúrli jaǵdaı bolýy múmkin. «Bul máselege kóp kóńil aýdarýdyń, menińshe, qajeti joq. Óıtkeni bári oıdaǵydaı bolýy tıis. Qurylys tıisti deńgeıde júrip jatyr», - deıdi depýtat.
Eske sala keteıik, keshe Astanada EKSPO kórmesi aýmaǵyndaǵy nysandardyń biri opyrylyp tústi. Qurylysty júrgizgen BI Group kompanıasynyń habarlaýynsha, bul qurylym tek dekoratıvti bolyp tabylady ári ol eshqandaı fýnksıonaldyq qyzmet atqarmaıdy. BI Group basshysy Aıdyn Rahymbaev EXPO aýmaǵyndaǵy qurastyrmanyń opyrylý sebebin tómendegideı túsindirdi:
"Birinshiden, qurastyrma jaıly aıtar bolsaq - bul shyn máninde sáýlet-dekoratıv element. Formasy - metal ferma. Ony qurastyrý jáne montajdaý jumystarymen elimizdegi eń kásibı "Imstalkom" kompanıasy aınalysty. Biz kásibı qurylysshylar retinde qazirdiń ózinde olardyń biliktiligine kúmán keltirmeımiz. Keshe de bar jaýapkershilikti olarǵa artyp qoıa salmadyq, búgin de solaı", - dep jazdy Facebook jelisinde Build Investment Group holdıńiniń prezıdenti Aıdyn Rahymbaev.
Onyń aıtýynsha, sýretterdi anyqtap qarasa qurastyrmanyń balqytyp biriktirilgen jeri nemese montaj tireýishteri synǵanbaǵan, ony qasaqana kesip tastaǵandaı áser qaldyrady. "Al negizgi qurastyrmanyń bekemdiligin osyndaı bıiktikten qulaǵan sátinde tipti aspalaryndaǵy áınekteriniń synbaı qalýynan baıqaı berýge bolady. (...) Injenerlermen keńeskennen keıingi aldyn ala tujyrymymyz - 90 metr ferma aıaz túsken kezde metaldyń qysymyna shydas bermedi, sebebi metaldyń hımıalyq quramy qujatta kórsetilgen bekemdigine saı bolmady, al negizinde metal aıaz ben ystyq túskendegi jaǵdaıda syǵylý men sozylýǵa tótep bere alatyndaı eseppen jasalady. Munyń tek aldyn ala pikir retinde aıtylyp otyrǵanyn atap óteıin. Qorytyndy sheshimdi sarapshylardan quralǵan komısıa jasaıdy. Bul jaqyn ýaqytta bolady dep úmittenemin. Birinshi kezekte Qytaıdan jetkizilgen metaldyń hımıalyq quramyna saraptama jasalady. Bul metaldardan kórme terıtorıasyndaǵy ózge de nysandar boı kótergen bolatyn. Zerthana saraptamalaryn kútemiz", - dedi Rahymbaev.
