«Qamshy» portaly «Altyn dombyra» aıtysy týraly jan-jaqty aqparat jarıalap keldi. Buǵan deıin de habarlaǵanymyzdaı, jeltoqsannyń 3-4-i kúnderi Almatydaǵy Respýblıka saraıynda el táýelsizdiginiń 25 jyldyǵyna arnalǵan «Jasampazdyqtyń 25 jyly» atty aıtys ótti. Aıtystyń bas júldesi «Altyn dombyrany» Muhtar Nıazov ekinshi ret aldy. Ol tipti keleshekte «Altyn dombyrany» taǵy da ıelengisi keletinin aıtqan.
Aıtystyń júlde berer sátinde halyq bas júldeniń berilýine narazy bolyp, «Bolatbek» dep aıǵaılap turyp alǵan edi. Halyqty Almaty ákimi Baýyrjan Baıbektiń ózi «sabyrǵa shaqyrǵan» bolatyn. Soǵan qaramastan qoǵamda aıtystyń ádildigi týraly alýan pikir týyndap jatyr. Aıboz aqyn Aıbek Qalıev bolsa, «Eldi birlikke shaqyratyn «Altyn dombyra» aıtysy osylaısha el arasyna iritki salatyn bolsa, endi ótkizbeı-aq qoıý kerek shyǵar», - degen edi.
Arty daýǵa ulasqan «Altyn dombyra» aıtysynyń sońǵy núktesin aıtystyń janashyry, júrgizýshisi Júrsin Ermannyń ózi «Shalqar» radıosyna bergen suhbatynda qoıdy:
«Altyn dombyraǵa» óńirlik aıtystarda bas júlde, 1-oryn, 2-oryn alǵan Qazaqstandaǵy qazir eń úzdik 20 aqyn jınaldy. Óziń aıtyp otyrǵandaı olardyń kez kelgeniniń «Altyn dombyrany» ıyǵyna asynyp ketýge qaqysy bar. «Altyn dombyranyń» aldynda men ózim Erkebulan Qaınazar, Meıirbek Sultanhan, Bolatbek nemese Muhtar Nıazov – osylardyń bireýi alatyn shyǵar dep oıladym. Aıtystyń birinshi kúnin kórgennen keıin, joq, bul oıym beker eken, Rústem Qaıyrtaıuly men Ómirjan Kópbosynovtyń bireýi alatyn bolar dep sáýegeısidim. Aıtystyń sońynda, minekı, Muhtar Nıazov ekinshi ret «Altyn dombyrany» jeńip aldy. Jeńip alǵanda bireýden surap alǵan joq, óziniń ónerimen tartyp aldy.
Muhtar bıyl birinshi ret bas júlde alyp turǵan joq, birneshe ret alyp tur. Óıtkeni, Muhtar babynda júrgen, osy aıtys óneriniń qazirgi kóshasshylarynyń biri. Biraq, áleýmettik jelilerde, tipti zaldyń ózinde oń jaq qanatynda birneshe adam soǵan shýyldap, qarsylyq bildirip jatty. Men oılaımyn, talǵamǵa talas joq.
Biraq, keshe kózi tiriler Memlekettik syılyqty alyp jatqanda, o dúnıelik bolǵan Muqaǵalı Maqataev ala almaı qaldy. Sol kezde osy qazaq nege shýyldamady. Myna qazaq án óneriniń úlken tulǵasynyń biri bolǵan, eki qazaqtyń biri ánin aıtyp júrgen Keńes Dúısekeev almaı qalǵanda osy qazaq nege shýyldamady. Al, endi, bul jerde de talasýǵa bolady. Qazylar alqasynyń quramynda alty birdeı aıtysker aqyndar otyrdy. Osy aıtystyń búkil qupıasyn, syryn biletin, aq jol bastaǵan Dáýletkereı, Baýyrjan Qalıolla, Muhamedjan, Qoılybaı, Qonysbaı sıaqty – osylar nege Muhtarǵa jyǵyldy dep oılaısyz? Munyń ózindik sebebi bar. Konsertimizde aıttyq, aıtystyń eń basty krıterııi: sózge jaýap berý, shappa shyǵyp aıtysý, aıaq astynan sóz tabý. Bolatbek jaman aqyn dep aıta almaımyn, ol da mańdaı aldy aqyndarymyzdyń biri. Degenmen, eptep tolǵap ketetini kóbirek, halyq poezıasyn jaqsy biledi, kitaptar oqıdy, sol sarynǵa salyp tolǵap ketetini bar, qatty jaýaptasyp aıtysýǵa bara qoımaıdy. Biraq, óte kórkem óleńderdiń, jaýhar jyrlardyń avtory. Mine, osyny salystyra otyryp aıtystyń sózimen sóılegen Muhtarǵa basymdyq bergen shyǵar dep oılaımyn. Biraq osy «Altyn dombyranyń» júldesine sonsha shýlaıtyndaı, munyń báıgesin Máskeýlerge Vasá alyp bergen joq, ózimizdiń aıtyser aqyndar jyl saıyn bireýine beriledi.
Aldaǵy jyldarda Bolatbektiń «Altyn dombyrany» julyp alatynyna kámil senemin. Áleýmettik jelide búgin ba, keshe ma jazypty ǵoı ózi de men rızamyn osy sheshimge dep. Oǵan da 3 mıllıon teńge kóleminde báıge berildi. Birinshi oryn degen de ońaı sharýa emes jıyrma aqynnyń ishinen. Sondyqtan, meniń pikirim osyndaı «Altyn dombyranyń» qortyndysy jóninde.
Qamshyger: Nazerke Labıhan
