Qazaqstan Respýblıkasy Ulttyq qaýipsizdik komıtetin 2001-2006 jyldar aralyǵynda basqarǵan Nartaı Nurtaıuly Dútbaev pen birge birneshe laýazymdy tulǵanyń ustalǵany belgili boldy, - dep habarlaıdy Qamshy.kz komıtettiń baspasóz qyzmetine silteme jasap.

«Qazaqstan Respýblıkasynyń Ulttyq qaýipsizdik komıteti memlekettik organdardyń birqatar laýazymdyq tulǵalaryna qatysty sotqa deıingi tergep-tekserý jumystaryn júzege asyrýda.

Júrgizilgen jedel izdestirý is-sharalary barysynda 2016 jyldyń 26 jeltoqsanynda Qazaqstan Respýblıkasynyń Qylmystyq kodeksi 185-babynyń 3-bóliminde («Memlekettik qupıalardy jarıa etý») jáne 362-babynyń 3-bóliminde («Bılikti nemese laýazymdyq ókilettikterdi asyra paıdalaný») kózdelgen qylmystardy jasaýǵa kúdiktiligi boıynsha Dútbaev Nartaı Nurtaıuly, Hasen Nurlan Bolatuly jáne Nurtaev Erlan Súıimbaıuly ustaldy.

Kórsetilgen tulǵalar Qazaqstan Respýblıkasy Qylmystyq-prosessýaldyq kodeksiniń 128-babyna sáıkes UQK Tergeý ızolátoryna qamaldy.

Kúdiktilerdiń jáne olardyń týystarynyń turǵylyqty jerleri boıynsha tintýler júrgizildi, zattaı dáleldemeler alyndy.

Tergep-tekserý jalǵastyrylýda, onyń barysy jáne nátıjeleri týraly qosymsha habarlanady» delingen UQK taratqan baspasóz habarlamasynda.