Áne-mine degenshe, jańa jyl da esikten syǵalap tur. Álem boıynsha toılanatyn bul merekeni el bolyp kútemiz, otbasymyzben jınalamyz, jyldaǵy dástúr boıynsha teledıdardan prezıdenttiń quttyqtaý sózin tyńdaımyz. Prezıdent qolyna aqqaınar quıylǵan bokal alyp, halyqqa aq jarma tilegin aıtyp, jańa jylmen quttyqtaıdy. Elbasymyzdyń quttyqtaý sózinen keıin ǵana otbasymyzben bir-birimizdi quttyqtap, máre-sáre bolyp jatamyz.
Alaıda jyldyń 365 kúninde dál osy kúni alkogóldy sýsyndar kóp ishiledi eken. Sondyqtan jańa jyldy qarsy alsaq ta, qazaqtyǵymyzdy tanytyp, ishimdikpen emes, qymyzben qarsy alsaq, nur ústine nur bolar edi! Elimiz osy máselemen birneshe jyldar boıy kúresip keledi. Olardyń satylymyna shekteý qoıyp, qoǵamdyq oryndarda ishýge, jarnamalaýǵa da tyıym saldy. Bul óz kezeginde oń nátıjesin de berip júr. Jastarymyz Islam dinine bet buryp kele jatyr. Alkogóldy ónimderdi tutynatyndardyń sany birshama azaıǵan. Esesine ulttyq sýsyndarymyzǵa suranys artyp keledi. Tek Qazaqstan ǵana emes, oǵan álem elderi de qyzyǵýshylyq bildirip otyr. Ulttyq sýsynymyzdy álemdik brendke aınaldyrý maqsatynda kóp nasıhattaý jumystary júrgizilse, qazaq úshin ıgi is bolar edi! Onyń ústine «Aqqa Qudaı jaq» degen qazaq «aq» tústi tek jaqsylyq, molshylyqpen baılanystyrady. Sondyqtan, jańa 2017 jyl qazaqstandyqtar úshin tabysty, berekeli jyl bolsyn degen nıetpen osynaý úrdisti Elbasymyz birinshi bolyp bastap, Jańa jylda fransýzdyń aqqaınarymen emes, qazaǵymnyń «aq qaınary» qymyzben quttyqtasa eken degen jańa jyldyq tilek bar.
Barlyqtaryńyzdy kele jatqan jańa jyldaryńyzben quttyqtaı otyra, keler jyl – molshylyq jyly bolsyn dep tileımin! Elimiz aman, jurtymyz tynysh bolǵaı!
Qamshyger: Maral Shaıhy
