Amerıka bıligindegiler AQSH-tan reseılik 35 mámilegerdi elden shyǵaryp, jumadan beri Reseıdiń Merılend pen Nú-Iork shtatyndaǵy eki mámilegerlik ókildikti jaýyp jatyr, - dep habarlaıdy Reuters agenttigi AQSH ákimshiligindegi joǵary qyzmettegi sheneýnikke silteme jasap.

Joǵary qyzmettegi sheneýniktiń aıtýynsha, Reseı azamattary 72 saǵat ishinde AQSH aýmaǵynan ketýi tıis.

Azattyqtyń jazýynsha, Bul - Vashıngtonnyń AQSH-taǵy prezıdent saılaýy kezinde «Reseı uıymdastyrdy» dep sıpattalǵan hakerlik shabýylǵa jaýaby.

9 jeltoqsanda The Washington Post gazeti SRÝ reseılik hakerler tek amerıkalyq saılaý júıesine nuqsan keltirip qoımaı, Tramptyń prezıdent saılaýynda jeńip shyǵýyna kómektespek boldy dep habarlaǵan. The New York Times gazeti hakerlerdiń Respýblıkalyq partıanyń kompúterlerine de buzyp kirgenimen bul partıaǵa nuqsan keltiretindeı elektrondyq hattar men materıaldardy áshkere etpegen dep jazǵan.

Al RIA Novostı málimetinshe, AQSH prezıdenti Barak Obama elden shyǵarylyp jatqan mámilegerlerdi «barlaýshylar» dep ataǵan. Barak Obamanyń aıtýynsha, AQSH-taǵy eki mámilegerlik ókildik eldegi jaǵdaıdy barlaý úshin qoldanylyp júrgen.

29 jeltoqsanda, beısenbide Barak Obama Reseıge qatysty jańa sanksıalar týraly qaýlyǵa qol qoıdy. AQSH qarjy mınıstrliginiń málimetinshe, sanksıa Reseıdegi alty adam men bes vedomstvo úshin engizilip otyr. Olardy amerıkalyq júıelerge kıbershabýyl jasady dep aıyptap otyr. Aıta keteıik, tizimdegi alty adamnyń ishinde Bas barlaý basqarmasynyń basshysy Igor Korobov, birinshi orynbasarlar Vladımır Alekseev pen Igor Kostúkov, orynbasar Sergeı Gızýnov, Alekseı Belan men Evgenıı Bogachev bar.

Aıta keteıik, qaýly boıynsha, sanksıadaǵy tizimge engizilgen jeke tulǵalardyń múligine tyıym salynatyn bolady.

AQSH-tyń Federaldyq tergeý búrosy (nemese FBI) men ishki qaýipsizdik mınıstrligi prezıdent saılaýy kezindegi kıbershabýyldar týraly esebin jarıalady. Vedomstvolardyń málimetinshe, kıbershabýyldarǵa Reseı arnaıy qyzmetiniń qatysy bar.