UQK «At-Takfır ýál-Hıdjra» dinı-ekstremıstik uıymynyń 33 múshesin qalaı ustaǵandaryn aıtyp berdi, - dep habarlaıdy Tengrinews.kz
«Ulttyq qaýipsizdik komıteti men ishki ister organdary júrgizgen is-sharalardyń nátıjesinde «At-Takfır ýál-Hıdjra» dinı-ekstremıstik uıymynyń qazaqstandyq 33 múshesi ustaldy. Olardyń 14-i - Almatyda, taǵy 14-i - Almaty oblysynda, Aqtóbede - 2 jáne Atyraýda - 3. Ustalǵandardyń barlyǵy - Qazaqstan Respýblıkasynyń azamattary. Olardyń arasynda áıelder joq», - delingen UQK ókilderiniń redaksıa joldaǵan saýalǵa bergen jaýabynda.
Sondaı-aq, ustalǵandardyń turatyn jáne jınalatyn mekenjaılary boıynsha júrgizilgen tintý barysynda dinı materıaldar, kompakt-dıskter, kompúterlik tehnıka jáne úlken somada aqsha tabylyp, tárkilegeni aıtylady.
UQK málimetinshe, olar ekstremıstik ıdeologıany zańsyz túrde nasıhattap, adamdardy respýblıka aýmaǵynda teokratıalyq memleket qurýǵa shaqyrǵan. Dinı-ekstremıstik uıymnyń Qazaqstandaǵy uıashyqtaryn shetelden basqaryp otyrǵan.
«Ustalǵandarǵa qatysty derek QR Qylmystyq kodeksiniń 405-babynyń 2-bóligi boıynsha jáne 174-baptyń 2-bóligi boıynsha Biryńǵaı tergeý reestrine tirkeldi. Ekstremıstik uıymdaǵy múshelerdiń basym bóligi - Almaty, Atyraý jáne Mańǵystaý oblysynyń týmalary», - dedi UQK ókilderi.
Alaıda Ulttyq qaýipsizdik komıtetindegilerde ustalǵandardyń Sırıaǵa nemese Irakka ketýge jospary bolǵany jaıly málimet joq. Biraq vedomstvo málimetinshe, olar Sırıa men Irak elderindegi terrorısterdiń áreketin qoldaıtyny jaıly aıtyp júrgen.
«At-Takfır ýál-Hıdjra» uıymy zaıyrly memlekettik bılik formasy men konstıtýsıalyq qurylymdy moıyndamaıdy. Olardyń Qazaqstandaǵy maqsaty - teokratıalyq memleket (halıfatty) qurý», - dedi UQK ókilderi.
Eske salaıyq, 21 jeltoqsanda UQK Almaty men Qazaqstannyń úsh oblysynda elimizdiń aýmaǵyndaǵy "At-Takfır ýál-Hıdjra" dinı-ekstremıstik uıymyn zalalsyzdandyrý maqsatynda arnaıy operasıany bastaǵan bolatyn. Dinı arazdyqtyqty týdyrdy degen kúdikpen elimizde tyıym salynǵan uıymnyń 16 adamy ustalyp, Ulttyq qaýipsizdik komıtetiniń aýmaqtyq organdaryna jetkizilgen.
Al 23 jeltoqsanda UQK arnaıy operasıa kezinde 33 adamdy ustaǵany habarlanǵan bolatyn. "İshki ister organdary bólimshelerimen birlese dinı alaýyzdyqty qozdyrdy jáne atalǵan uıymnyń is-áreketine qatysty degen kúdikpen barlyǵy 33 adam ustaldy", - delingen edi UQK habarlamasynda.
Aıta keter bolsaq, Tasmaǵambetov 15 myńdaı otandasymyzdyń jat aǵym jeteginde júrgenin aıtyp, dabyl qaqqan edi.
