Aqtóbelik ana qala ákimi ótkizgen kezdesýge baryp, býkmekerlik keńselerdi jabýdy ótindi. Onyń aıtýynsha, búgingi kúni jastar kúndiz-túni aqsha salyp, qumar oıynǵa salynyp keledi dep habarlaıdy QazAqparat.

Aqtóbe qalasynyń ákimi İlıas Ispanov búgin bólim basshylaryn jınap, Tahaýı Ahtanov atyndaǵy Drama teatr ishinde qoǵamdyq qabyldaý ótkizdi. Qabyldaý jóninde halyqqa aldyn ala habarlanyp, kezdesý orny men ýaqyty belgilengen soń, jer men úı, zeınetaqy men járdemaqy jaıyn aıtýǵa kelgen jurttyń qarasy kóp boldy. Al aqtóbelik ana basshylardyń aldyna kelip, jylap jiberdi. Ol býkmekerlik keńselerdi jabýdy surady.

«Sizder kóp máseleni sheship jatyrsyzdar, biraq býkmekerlik keńselerdi jabý kerek. Jastardyń bári sol jaqta otyrady», - dedi ashynǵan ana. Áıeldiń janaıqaıyn estigen qala ákimi İlıas Ispanov zańdy túrde jumys istep turǵan býkmekerlik keńselerdi jabý qoldan kelmeıtin jumys ekendigin aıtty.

«Býkmekerlik keńseler máselesi bir mezette sheshilmeıdi. Olar zań aıasynda ashylǵan. Qylmysy áshkerelenip, alaıaqtyq jasaǵandary anyqtalatyn bolsa, polısıa qyzmetkeri sheshedi»,- dedi İlıas Ispanov.

Qala ákimi aldaǵy ýaqytta bir kúndi qoǵamdyq qabyldaýlarǵa arnaýdy jón kórip otyr. Jospar boıynsha, erteń ol halyq aldynda sońǵy esebin berýi tıis edi. Biraq turǵyndardyń suraǵy kóp bolǵandyqtan, esep dúısenbige shegerildi.