«Qamshy» - erkin aqparat alańy. Hat qorjynymyzǵa «Nú-Iorktegi eń úzdik polıseı – Qazaq!» atty maqala kelip tústi. Shynynda da shetelde júrgen ár qazaq Alashtyń abyroıyn asqaqtatyp, namysyn taptatpaı júrgeni quba-qup. Degenmen maqalada atyshýly «Fenıks» fılmi týraly da derekter kezdesedi. Eger oqyrmandar tarapynan osy maqalaǵa oı qosyp, pikir bildirgen jazbalar kelip jatsa, ony da jarıalaýǵa ázirmiz.
Qamshy.kz
Nú-Iorktegi eń úzdik polıseı - qazaq jigiti degen byltyrǵy jańalyq kúlli áleýmettik jelide jaıylyp ketkenin jurt esten shyǵara qoımaǵan bolar. Sonymen, Nıazovtar januıasy jaıynda ne bilemiz?
26 jasar Dımash Nıazov sol kezde esirtki saýdasyn jolǵa qoıǵan baýkespeniń naq ózin quryqqa túsiredi. Oǵan deıin sonyń eki jandaıshabyn tutqyndaǵan bolatyn. Sol kezde kisendelgen bireýdiń uıaly telefony (advokaty kelgenge deıin AQSH polıseıleriniń ustalǵan adamnyń jeke múlkin alyp qoıýǵa qaqysy joq) damylsyz shyryldap qoıa bergen. Kóziniń bir qıyǵyn telefonǵa salǵan Dımash Nıazov belgili qylmeskerdiń búrkenshik atyn kóre qoıady. Sol atty endi ózi búrkenip, ol áleýmettik jelige kiredi de, esirtki saýdagerlerimen hat alysa bastaıdy. Sóıtip, tasada tyǵylǵan baýkespe basshysyna shyǵady... Bilekti de júrekti jas jigit marapatqa da keneledi, qyzmeti de ósedi.
Kún saıyn shyǵatyn The Wall Street Journal gazeti ol jaıynda maqala jarıalap, Dımashty emmıgranttardyń bárine úlgi retinde qoıdy. Amerıkandyq telekanaldar qylmyskerlerdi ustaý faktisin negizge ala otyryp, ony kásibı bokspen aınalysatyn jalǵyz amerıkandyq polıseı retinde kórsetti.
Nú-Iorkqa Nıazovtar otbasy, týrasyn aıtqanda áýeli otaǵasy Ismat Nıazov sportyń arqasynda keledi. Ol Almatydaǵy respýblıkalyq balalar sport mektep-ınternatynda oqıdy, boksta edáýir jetistikterge jetkenmen, mansapqa boı urmaıdy, esi-derti teńizde bolatyn. 1985 jyly áskerdegi azamattyq boryshyn ótep shyqqannan keıin, Arhangelsk qalasyndaǵy teńizshiler ýchılıshesine oqýǵa túsip, sonymen qatar Lenıngradtaǵy teńiz akademıasynda syrttaı oqı bastaıdy. Sóıte júrip, sporttan bir sát te qol úzbeıdi.
1997 jyly áýeli Nıderlandyǵa, odan ári Nú-Iorqa jol tartady. Sonda júrip, kıkboksıń pen taı boksynan tálim bere bastaıdy. Al, shákirtteri kóshilgeri nátıje kórsete bastaǵan kezde, Ismat Nıazov AQSH azamattyǵyn alyp, januıasyn muhıttyń arǵy betine kóshirip alady. Amerıkakda sportpen shyn yqylaspen aınalysatyndarǵa qurmetpen qaraıdy. Tabysqa jetýdiń aınymas joly ekenin ańǵarǵan men eki ulymdy da sportqa baýlı bastadym, - deıdi Ismat.
Dımashtyń talaby jaqsy edi, jeńiske degen jigeri janyp turatyn, Nú-Iorkte chempıon atanyp, Býfaloda kúmisten alqa taqqanda, men ony kásibı sportqa aýystyrdym.
Amerıkada – bıznes, júregim Qazaqstan dep soǵady
20 jyl boıy Amerıkada ómir súrip kele jatqan Ismat Nıazov júregim Qazaqstan dep soǵady dep aǵynan jarylady. Nú-Iorktaǵy óz adamymyz: «qazaqtar meniń úıime qonaqqa jıi keledi» deıdi. Osydan eki jyl buryn Las Vegasta bokstan chempıonat ótti, sonda bir-eki kúnge qazaq boksshylarynyń bapkerleri qonaq bolyp qaıtqan.
- Promoýterlikpen de aınalysamyn, osydan bes jyl buryn Amerıkandyq eki dosymmen úlken sport zalyn ashyp aldym, onda olımpıada sportynyń: boks, kúres, taekvando, karate sekildi túrlerinen jattyǵý júrgizemiz. Sonymen qatar elimizdegi sporttyń damýynda qadaǵalyp otyramyn, - deıdi Ismat Nıazov. – Sońǵy jyldary bizdiń elde sport jaqsy damyp keledi. Kúlli álem bizdiń ziltemirshilerdi, hokeıshilerdi, tipti para sportshylarymyzdy jaqsy biledi. Sport ózdiginen damymaıdy. Oǵan erekshe yqylas kerek. Onyń damýyn qadaǵalaıtyn vedomstvo tarapynan maqsatty jumystardyń júrgizilgeni jón.
Úlken uly Dımash kishkentaıynan aldyǵa qoıǵan maqsattaryna jetý úshin, eshnárseden aıanbaıtyn. Kásibı bokstan álem chempıony bolam dedi – boldy! Dımash qazirge deıin on kezdesýin ótkizdi. Bárinde de jeńiske jetti.
Mansabyn da esten shyǵarǵan emes, polısıa akademıasyna emtıhandar tapsyryp, qyzmetke shaqyrý aldy. Aqpan aıynyń basynda Dımash otbasyn qurdy. 23 jasarulym Qýanysh ta úlken aǵasynyń aqylymen polısıa akademıasyna emtıhan tapsyrǵan. Ázirge qyzmetke shaqyrý kele qoıǵan joq, biraq ol qol qýsyryp otyrmady, programmısttik kásibin jetildirý úshin, kolejge qujattaryn ótkizdi.
Amerıkandyq tártip saqshylarynyń artyqshylyqtary da bar eken. Máselen, jolda ketip bara jatqan meni áldeqandaı polıseıler toqtata qalǵan jaǵdaıda men polıseıdiń ákesimin degen arnaıy anyqtama kartochkasyn kórsetsem, meni sózge kelmeı jibere salady.
Atyshýly «Fenıks»
Basty keıipkerimizge oralaıyq. Jýyrda jerlesimiz Dımash Nıazov Qazaq eli úshin taǵy bir ońdy is atqarypty. Amerıkandyq ALDAMISA Entertainment fırmasy týraly málimetterdi taýyp, Qazaqstan tarabyna jetkizýge qol úshin bergen kórinedi. Ia, sol baıaǵy aty shýly «Fenıks» kınojobasyna qatysy bar degen rejıser Talǵat Jánibekov pen prodússer Tuńǵyshbaı Jamanqulovtyń tilge tıek etip júrgen kompanıasy. Mádenıet mınıstriniń aıtýynsha,bulyńǵyr dúnıege úsh mıllıon dollar qarjy bosqa ketýdiń joly kesilgen.
Amerıkalyq polıseıdiń ákesiniń aıtýynsha, ol ALDAMISA Entertainment amerıkandyq fırmasy týrasynda derbes tergeý júrgizip kórgen.
- Reseıdiń Aldamisa RUS fırmasy amerıkandyq ALDAMISA Entertainment fırmasynyń «seriktesi» dep málimdegen rejıser Talǵat Jánibekovtyń áńgimesinen keıin amerıkandyq fırmanyń qyzmetin tekserip kóreıin degen yntyzarlyq oıandy. Shynynda da, mınıstrdiń kúdigi beker bolmaı shyqty. Qosymsha qarajattyń bólinýine toqtaý salǵany durys eken, - dep ángimeleıdi Ismat Nıazov.
Óıtkeni, atalǵan kompanıanyń Amerıkada birneshe, sonyń ishinde jeke úılerde de mekenjaıy bar ekeni anyqtalǵan. Tipti bul kompanıa bankke de, akterlarǵa da, jumysshylarǵa da qaryzǵa belshesinen batyp, sottasýdan kóz ashpaı jatqan kórinedi. Al ataqty akter Maık Kaff ALDAMISA oǵan meksıkadaǵy fılm túsirilimderi úshin aqy tólemedi degen aıyptaýynan soń, kompanıanyń qyzmeti toqtatylypty-mys.
Esken Dúráli
