Muǵalimniń muń-zaryna májilis depýtattary da nazar aýdardy. Olar ustazdardy qaǵazbastylyqtan qutqaryp, mektep qujattaryn HQKO jumystarymen ıntegrasıalaýdy usyndy, dep habarlaıdy Kazpravda.kz.

«Qaǵazǵa kómilip, bar ýaqytyn qujat toltyrý men esep jazýǵa arnaıtyn ustazdan balaǵa jaýapkershilikpen qaraýdy, sapaly bilim berýdi talap ete alamyz ba? Bilim jáne ǵylym mınıstrligi osy jaǵdaılarǵa nazar aýdarsa eken. Máselen «Oqýmen jappaı qamtý» baǵdarlamasy ustazdardyń moıynyna artylǵan. Ol 18 kesteden turady, buǵan bekitilgen ýchastkty aralaý, qosymsha qujattardy toltyrý jumystaryn qosyńyz. Muny nege HQKO qyzmetteriniń qataryna qospasqa? Mektep muǵalimi kúntizbelik jospar, uzaqmerzimdik jáne orta merzimdi jospar, sabaq jospary, ózindik damý jospary, mektep bólimderiniń jospary tárizdi qaǵazdarǵa kóp ýaqytyn jumsaıdy. Ári bulardyń barlyǵy foto esep túrinde tapsyrylýy kerek, onyń ústine elektrondy jýrnal men qaǵaz jýrnaldyń mashaqaty bar. Bul muǵalimniń durys jumys isteýine kedergi keltirip otyr», – dep habarlaıdy Májilis depýtaty Gúlnar Bıjanova.

Sondaı-aq, ol mektep pedagogtarynyń áli kúnge deıin jumysqa qajetti jabdyqtardy óz esebinen satyp alatyndyǵyn da atap ótti. Osydan soń ustazdardyń jumysyna syn aıtýǵa bola ma? Qaǵazbastylyqtan qutylmaǵan ustaz, qujat toltyrýmen áýre bolyp júrgende oqýshylar bilgenin istemeıdi me?

«Bul aıtylǵan talaptardy oryndaý úshin kóptegen ustazdar óziniń onsyz da mardymsyz aılyǵyna qanshama papkalar men qaǵaz satyp alýǵa májbúr. Men tipti esep qaǵazdaryn shyǵarý úshin nesıege túrli-tústi qaǵaz shyǵaratyn prınter satyp alǵandardy da bilemin. Óıtkeni qaǵaz shyǵarý olarǵa qymbatqa túsedi», – deıdi Gúlnar Bıjanova.

Osyǵan baılanysty depýtat Bilim jáne ǵylym mınıstrliginen mektep muǵalimderin qaǵazbastylyqtan qutqaryp, pedagogtarǵa óziniń negizgi jumysy – bala tárbıesi jáne bilim berýmen aınalysýǵa múmkindik berýdi surady.