Gazetterge májbúrlep jazdyrýdyń zańsyz áreket ekeni dáleldene bastady. Kúzde mektep muǵalimderiniń aıtýymen bul taqyrypty birneshe márte buqaralyq aqparat quraldarynda kótergen edik.
Quqyq qorǵaý organdaryna da habar jetkizdik. Solardyń arasynda bizdiń usynysymyzdy qoldaǵan – Memlekettik qyzmet jáne sybaılastyq jemqorlyqqa qarsy kúres jónindegi agenttik basshylary. Búgingi kelgen aqparat boıynsha másele qolǵa alynyp, aımaqtarda arnaıy sharalar ótkizildi.
Mysaly, Temirtaý qalasynda bilim bóliminiń basshylaryna ustazdardan májbúrleý arqyly 600 myń teńge jınaǵany úshin qylmystyq is qozǵaldy. Tergeý júrip jatyr.
Árıne, bul úlken qylmys emes, nesine shýlatady, burynnan beri úırenshikti jaǵdaı ǵoı dep aıtatyndar tabylady. Biraq ol – qate túsinik. Aılyǵy onsyz da tómen ustazdarǵa 3 – 5 basylymǵa 10 myń teńgege deıin tóleý az aqsha emes.
Ekinshi jaǵy – qoǵamdaǵy sybaılas jemqorlyq osyndaı «kishkentaı» kólemnen bastalady, et úırenedi, jeńil qabyldanady. Aınalyp kelip úlken qylmysqa aparady. Al zańsyzdyqtyń zardabyn ózi shekken mektep ustazy balalarǵa zańdy syılaý, qurmetteýdi qalaı úıretedi?
Sol sebepten sybaılas jemqorlyqty joıamyz desek, osyndaı kúndelikti kózge kórinetin zańsyzdyqty toqtatý kerek. Sonda qoǵamda senim paıda bolady. Al senim bolǵasyn odan da basqa qylmystarmen birge kúresýge ońaılaý bolmaq.
Sol sebepten búkil ustazdardyń atynan Memlekettik qyzmet jáne sybaılas jemqorlyqqa qarsy is-qımyl jónindegi agenttik basshylaryna alǵysymdy aıtamyn!
Murat ÁBENOV
Derekkóz: zamana.kz
