Halyqaralyq "Jýrnalıserdi qorǵaý komıteti" (Committee to Protect Journalists - CPJ) Qazaqstan bıligin "qarjy jymqyrý" isi boıynsha qamalǵan táýelsiz, opozısıalyq jýrnalıs Janbolat Mamaıdy bosatýǵa shaqyrdy. Bul týraly Azattyq habarlaıdy.

"Qazaqstan bıligi buqaralyq aqparat quraldary alańyn ózgeshe oılaıtyndardan tazalaýdy júıeli túrde júrgizip keldi jáne Janbolat Mamaıdyń qamalýy - osy baǵyttaǵy taǵy bir qadam" dep málimdedi CPJ-nyń Ortalyq Azıa boıynsha úılestirýshisi Nına Ognánova. Onyń sózinshe, Astana "Trıbýna. Saıası qalam" gazeti bas redaktorynyń mindetin atqarýshy Janbolat Mamaıdy dereý bosatyp, ony kásibı qyzmeti úshin qýdalaýyn toqtatýy tıis.

Úkimettegi korrýpsıa jáne basqa da qoǵamdyq ózekti máseleler týraly jazyp júrgen Mamaı 11 aqpanda tergeý aıasynda eki aıǵa qamalǵan. Mamaıdy aqpannyń 10-y kúni sybaılas jemqorlyqqa qarsy is-qımyl ulttyq búrosy qyzmetkerleri qazir shetelde qýǵynda júrgen opozısıalyq saıasatker, "BTA bank" dırektorlar keńesiniń burynǵy tóraǵasy Muhtar Áblázovtiń isine qatysy bar degen kúdikpen ustaǵan. Tergeý organy 28 jastaǵy Janbolat Mamaıdy "BTA bankten" urlanǵan aqshanyń bir bóliginiń izin "Saıası qalam. Trıbýna" gazeti arqyly qarjylyq operasıalar jasap jasyrǵan" degen kúdikpen tergep jatyr.

Mamaı eger kúdikti dep tanylsa, jeti jylǵa deıin sottalýy múmkin.

Biraq Janbolat Mamaı ózine taǵylǵan aıypty joqqa shyǵaryp, bul isti óziniń jýrnalısik qyzmeti men "Saıası qalam. Trıbýna" gazetin jabýǵa baǵyttalǵan saıası astary bar áreketi dep sanaıtynyn málimdegen. Áblázov ta Mamaımen eshqashan kezdespegenin aıtyp, jańa aıypty "absýrd" dep ataǵan.

Mamaı qamalǵanǵa deıin Azattyqqa ózin áldebireýlerdiń ańdıtyny týraly aıtqan.