Baýyrjan Momyshuly aýylynda azyq-túlik pen kıim-keshekti tegin taratatyn dúken ashyldy. Bul týraly 24.kz habarlaıdy.

Jambyl oblysyndaǵy ıgi bastamany jergilikti jastar, úkimettik emes uıymdar men meshit qyzmetkerleri qolǵa alǵan. Turmysy tómen, áleýmettik az qamtylǵan otbasylar úshin jańa dúkenniń esigi árqashan ashyq.

Raıhan Aıymova – alty balanyń anasy. Balalarynyń úsheýi kámelettik jasqa tolǵan, qalǵany mektep jasynda. Oǵan qaıyrymdylyq dúkeni týraly mektepten habar bergen. «Estı sala osynda keldim», - deıdi kúmis alqaly ana.

Raıhan Aıymova, kópbalaly ana:

- Kostúm. Ózim kórip jatyrmyn. Balalarǵa bolsa, alsam ba dep turmyn. Bir kóılek alǵanmyn. Jaqsy. Kómek beremiz degenge kóreıinshi dep keldim.

Bazarkúl Orynbaeva, aýyl turǵyny:

- Adamnyń kúni adammen. Qoldan kelgenimizshe bir-birimizge járdem bereıik. Nemereme jempir aldym. Aıaq-kıim alyp jatyrmyn. Raqmet!

Dúkende kıim-keshekten bólek azyq-túlik te tegin beriledi. Munda áleýmettik mańyzdy taýardyń 10 shaqty túri taratylady. Muqtaj jandar aptasyna bir márte kelip, aptalyq azyq alýyna múmkindik bar. Sóredegi birqatar zat kásipkerlerden jáne meshitke sadaqadan túsken qarajat esebinen alynady.

Erkebulan Narymov, Jýaly aýdandyq ortalyq meshittiń bas ımamy:

- Eń aldymen, biz – qashanda jetimin jylatpaǵan, jesirin jerge qaratpaǵan qazaqpyz. Qazaq árqashan jaǵdaıy tómen otbasylardy qoldap, kómek kórsetip, jaǵdaıyn jasap kelgen. Bul – qazaqtyń ádetinde de, saltynda da bar nárse.

Uıymdastyrýshylar az qamtylǵan turǵyndardyń tizimin jasaǵan. Aýdan boıynsha osyndaı 100-ge jýyq otbasy tirkelip otyr. Onyń 25-iniń jaǵdaıy kedeıshilik sheginen tómen deńgeıde. Sondyqtan belsendiler bul isti myqtap qolǵa almaq.

Jánibek Myrzalıev, Jýaly aýdandyq jastar ortalyǵynyń dırektory:

- Qaıyrymdylyq dúkenine jergilikti Jýaly kásiptik kolejin bitirgen túlekti «Jastar tájirıbesi» baǵdarlamasy boıynsha jumyspen qamtyp otyrmyz. Ol osynda kıimder men azyq-túlikterdi taratyp, qalǵan bir kúninde jınaqtaý, útikteý, retke keltirý jumystaryn júrgizedi. Alda taǵy bir adam suratamyz dep otyrmyz.

Jasyratyny joq, dúkendegi zattardyń barlyǵy birdeı jańa emes. Birazy paıdalanylǵan, biraq kıýge jaramdy. Bul zattar sizdiń úıde de bolýy ábden múmkin. Sondyqtan bosqa tastaǵansha...

Qıyndyǵy men qyzyǵy, aýyry men jeńili alma-kezek almasyp jatqan myna ómirde qoldan kelse, qaıyrymdylyq jasap, kópshiliktiń alǵysyn alǵanǵa ne jetsin, shirkin!

Avtorlary: Rýslan Baqytbekuly, Tımýr Seıilhan, Rýslan Ahatillá