Almaty oblysynyń Qarasaı aýdanynda Serik Jaqaımov degen azamat turady. Otyz alty jastaǵy osy azamattyń búginde qabyrǵasy qaıysyp, qaıǵyǵa batyp otyrǵan jaıy bar. Búlingen tisti ýaqtyly emdetpeýdiń saldarynan áıeli aýyr naýqasqa shaldyǵypty.
2013-shi jyly kelinshegi Zamıra Jıemuratovanyń aldyńǵy tisteri shirı bastaǵan eken. Keıbiriniń túbi irińdep ketken. Birin juldyrtty, birin emdetti. Biraq tisteri birinen keıin biri shirı berdi. Aqyry aýzynda tis qalmady. Kóp uzamaı beti isindi. Ózi de álsirep, júdep ketti. Sosyn emdelip alsyn dep azyn-aýlaq aqshany ustatyp, Tashkentke jibergen. Ol jaqta dárigerler kútpegen sumdyq dıagnoz qoıdy: «Sol jaq tańdaı qýysynyń qatersiz isigi». Eki balany bosanǵanda da Zamıra durys kútine almaǵan. Tisten bastalǵan aýrýǵa sol sebep boldy ma dep oılaıdy erli-zaıypty.
Tashkentte Zamıra jarty jyl emdelgen eken. Sáýlelik terapıa qabyldady. Beti beri qaraǵan soń, bári qalpyna keldi dep oılap elge oraldy. Biraq bir jyldan keıin sol jaq beti taǵy da isip, ózi álsirep, qatty júdep ketipti. Sóıtse, kerisinshe aýrýy asqynyp ketken eken. Qaterli isikke aınalypty. Sodan bastap áıeldiń ómiri abyrjý, shapqylaý: analız tapsyrý, dári-dármek alý, aýrýhanaǵa jatý. Biraq aýrý bul emge kónbedi. Sóıtip 2016-shy jyldyń shilde aıynda operasıa jasatty. Onyń da mashaqaty men shyǵyny kóp eken. Ne kerek, kelinsheginiń sol kózin, jaǵyn, tańdaıyn alyp tastady. Osylaı Zamıra bir-aq kúnde betiniń sol jaǵy qısaıyp, durys sóıleý men as ishýge jaramaı, múgedek bolyp qaldy. Daýsy shyqpaıdy.
Bir ǵana tistiń kesiri Zamıranyń búkil ómiriniń búlinýine túrtki boldy. Bul oqıǵa ózgelerge oı salýy tıis. Búlingen tisti ýaqytyly emdetý, bosanǵan soń durys kútiný syndy jaılardy elemeýge bolmaıtynyn da aıtqymyz keledi.
Derekkóz: «Zamana» gazeti
