qamshy.kz erkin pikir alańy. Osy maqalaǵa qatysty qarsy taraptyń aıtary bolsa jarıalaýǵa daıynbyz.
Ortalyqtaǵy aqyndardyń óleńderi syrt kózge birden túsip, súzgiden ótedi. Synshy bitken kóbinese, bolashaǵynan úmit kúttiretin, ózgeniń pikirine oń kózben qaraı alatyn aqyndardyń shyǵarmashylyǵy jaıly pikir bildiredi. Shamasy, talantty aqyndardyń namysyn qaırap, halyqqa súbeli shyǵarma bere alatynyna sengendikten kishkene shalys basqan jerin kórsetse kerek-ti. Al, ádebı ólekselerdiń shatpaǵy jaıly jazyp, eshkim qalamyn bylǵaǵysy kelmeıdi. Óıtkeni, «kemtalant synnan tómen turady» degen jazylmaǵan ereje bar. Zaman ózgerdi. Qazir jurt ortalyqqa shoǵyrlanbaı-aq, shyǵarmashylyqpen aınalysatyn bolǵan. Astanadaǵy ádebı úderisti baqylap úırengen synshynyń kózi endi aımaqtaǵylarǵa túspese, tonna –tonna qajetsiz kitap tasqynynyń astynda qap ketkeli turmyz. Lepirme, kópirme sózdiń qadyry artyp, sútke qosylǵan syldyr sý qaımaqty búldirgeni sıaqty aýyldaǵy uıqasqumar áńgúdik aımaqty búldirip jatqandyǵy búgin eshkimge syr emes. Balapan–basyna, turymtaı–tusyna ketti. Alasapyranda neniń durys, neniń burystyǵyn ańdaýdan qaldyq. Iassaýı hıkmetteriniń mánin uqpaı, til men jaǵyna súıengenderdiń shatpaǵynan maǵyna izdep álekpiz. Áleýmettik jeli alysty jaqyn etip, aqyl-oıdy jańa keńistikke shyǵarýmen birge jynoınaqqa da aınalyp úlgerdi. Beıpil bir-aq kúnde tanylatyn bolǵan. Dúmbilezder– dańq tuǵyrynda. İlýde bir dúnıege keler daryn jórgeginde tunshyǵady.
Sońǵy kezde áleýmettik jelide «Saryaǵash» aýdandyq gazeti bas redaktorynyń orynbasary Murat Bekeı degen kisi oǵash jazbalarymen kózge túsýde. Bul jazbalar jaıly maqalamyzdyń sońynda pikir aıtamyz. Aldymen, avtordyń «Sulýlyq syry» («Sharq» baspasy,Tashkent), «Arýana-ǵumyr»(«Ólke» baspasy, Almaty) jınaqtaryna toqtalýdy jón sanadyq.
TOTYQUS SINDROMY
Jalpy shyǵarmashylyqpen aınalysatyn adamdar meılinshe daralyqqa umtylady. Jasandylyq qaptaǵan mynaý jalǵan dúnıede sonylyqqa ne jetsin? Al, ár qazaq aqynynyń óleńderi qazaǵyna jazylǵan hattar ispetti tek óz júreginen shyqqan shynaıy, tyń dúnıeler bolýǵa tıis.Ókinishke oraı, bul máselede Murat Bekeıdiń pikiri múlde bólek eken. Onyń oıynsha, aqyn bolý úshin ótken iri tulǵalardy qaıtalaýdyń ózi jetkilikti sıaqty.
Bolsyn árkez júrekte senim aman,
San daryndy týǵan ǵoı ómir-anam.
Bir synshy saraptaı kep jyrlarymdy,
–Ótkendi qaıtalapsyń,–dedi maǵan.
Keıbireýge shyndyqty baıqamaý–zań,
Tanbaıdy meni osy bir oı talaýdan(?).
Qaıtalaý–tabıǵattyń qaǵıdasy,
Turady ómir máńgilik qaıtalaýdan.
Ǵylym ǵana jańadan oı taba alar...
Murat Bekeı pikirlerimen saǵattap daýlasý múmkin. Ásirese, sońǵy jol múlde aqylǵa qonbaıdy . Shyntýaıtyna kelgende ǵylym tek oı aıtyp qarap otyratyn jer emes, jańalyq ashatyn jer ǵoı! Adamzat ǵylymnan (kóbine) materıaldyq jańalyq kútedi. Al, sony oı aıtý(kóbine) ádebıetke tán qubylys. Eger tek ótkendi qaıtalaýdan turatyn bolsa, ádebıettiń, poezıanyń ne qajeti bar? Burynǵy jazylǵan dúnıelerdi oqyp júre bermeımiz be?
Áý basta qate baǵyt-baǵdar tańdaǵan Murat Bekeı óziniń adasqanymen turmaı, jurtty da shatastyrýda. Mysal qajet pe, mysal kóp! Onyń «Syldyrap óńkeı kelisim», «Ándi súıseń–menshe súı» degen óleńderine kózi túsken adam tańdanbaı tura almaıdy. Bul joldar bas aqynymyz Abaıǵa tıesili ekenin ekiniń biri biledi. Ózgeniń pikirin paıdalanǵan adam sol pikirdi tyrnaqsha ishine alyp, túsinikteme berýge tıis. Alaıda, qalyptasqan qaǵıdany belden bir-aq basqan Murat Bekeı Abaı sózderin óziniki etip alǵan.
«Úrnısa Aıbergenovaǵa» degen arnaýdaǵy myna joldarǵa nazar salyp kórelik:
Tartpaǵan deısiń beınet kim,
Keshkenmen ómir kil synyn(?).
Mahabbatsyń–
Bóz kóılektiń
İshinde jarǵan búrshigin.
Qudaı-aý,biz erekshelep berip otyrǵan sońǵy eki jol Tólegen Aıbergenovtiń óziniki emes pe? Ony jáýkemdep, sińirý «asqazanyńa» aýyrlyq etedi, Murat Bekeı myrza! Ekinshi joldyń maǵynasy bulyńǵyr. Avtor «keshkenmen ómirdiń kil synyn» demekshi ǵoı, býyn sany asyp ketkendikten «...diń» degendi laqtyra salyp, maǵynasyz joldyń ómirge kelýine sebepker bolǵan. «Ómirdiń keship kil synyn» dese, bolyp tur emes pe? Nemese:
Turatyn máńgi aspandap,
Lebizi–órter ór demi.
Alqynyp ushqan qasqaldaq–
Júdegen júrek mendegi.
Mundaǵy úshinshi jol da Tólegenniń ózinen jymqyrylǵan.
Murat Bekeıdiń «Arman sapary» atty Tólegen Aıbergenovtyń rýhyna arnalǵan poema-essesi bar eken. Munda da ol basyn aýyrtyp, ataý izdep otyrmastan, Tólegenniń alǵashqy kitabynyń atyn paıdalana salǵan. Bul onyń Aıbergenov rýhyna aıtar óz oıy joqtyǵyn bildiredi.
Poemanyń besinshi bólimi «Tólegen–Muhtar» dep atalyp, eki uly aqynnyń suhbattasýynan turady eken. Munda da avtor:
Men búgin sonaý kógilder kólge saǵynyp ushyp baramyn,
Birge qaq qanat qasymnan qalmaı, saǵynyp kórgen qaraǵym.
Jalǵasyn sen aıt bul asqaq ánniń jabylyp ketsem eger men,
Ǵulama– jyldar sýdyrlatqanda paraǵyn,–dep Tólegenniń óz óleńin paıdalanady da silteme bermeıdi. Taǵy bir aıtar jaıt: alǵashqy joldaǵy «saǵynyp» sózi Tólegenniń burynǵy kitaptarynda «alqynyp» dep qoldanylatyn. «Saǵynyp» sózi ekinshi jolda bar. Aıbergenovte mundaı olaqtyqqa jol berdi degenge sený qıyn. Bálkim, Murat Bekeı bir sózin ózgertkeni úshin tutas shýmaqty óziniki sanap otyrǵan bolar? Bul sózdi basqa bireý ózgertip, Aıbergenov kitaptarynyń jańa basylymdaryna engizip jibergen bolýy da múmkin. Qaıtkende de, M. Bekeıdiń bul shýmaqty, siltemesiz, óziniki etip paıdalanýy durys emes.
Dıalogtaǵy Muhtar Shahanovtyń aıtqan sózderin oqyp kórelik:
İlestim be izinen uly kóshtiń?
Quttyqtap, usynbady gúlin eshkim.
Álde men aldarqatyp ózimdi-ózim,
Júrmin be jeteginde qur elestiń?
Alǵys aıtyp alǵysym mol kúnderge,
Buıyrar ma sańqyldar kún minberde?
Júırikterge tamsanǵan dýly kóptiń
İshinde bos dalaqtap júrmin be álde?
Men álde armandardyń qanatynyń
Astynda ańsap jyrdyń dara shyńyn,
Bilem be janymdaǵy ór ekpinniń
Meni alyp bıikterge baratynyn?
Bireýdi bıiktetý úshin ekinshi bireýdi alasartýdyń ne qajeti bar? Muhtar Shahanov poezıa elinde osyndaı ekiudaı kúıde júrgenine kim senedi? Bekdildá Aldamjardyń jazǵanyna sensek, Shahanov sonaý jastyq shaǵynan syı-qurmetten kende bolmaǵan. Tipti, ony kezdesýlerde oqyrmandar gúlge kómip tastaıtynyn qyzǵanǵandar «muny ózi uıymdastyrady» degen qaýeset te taratqan eken. Muhtar Shahanov poemada sýrettelgendeı borkemik, jasyq, ózine senimsiz bireý bolsa, álem tanıtyn, baǵalaıtyn deńgeıge qalaı jetti?
Murat Bekeı bul poemasynda Tólegen, Muhtar, Jumeken, Muqaǵalı, Qadyr aqyndardyń óleń formasymen jazýǵa tyrashtanǵan. Alaıda, munyń údesinen shyǵa almapty. Óıtkeni, másele formada emes, mazmunda! Olar sıaqty oı aıta almaǵan soń daıyn qalyptan keler qaıran bar ma?
Shyńǵys Aıtmatovtyń áıgili romanyndaǵy Naıman–Ana beınesi álem oqyrmandaryna jaqsy tanys. Máńgúrt ulyna qatysty jeri Ábish Kekilbaı hıkaıatynan urlansa da, oǵan nazar aýdaryp jatqandar shamaly. Jurt Aıtmatovty máńgúrttik uǵymyn fılosofıalyq kategorıa deńgeıine kótergen jazýshy dep oılady. Murat Bekeı de bul pikirge arbalǵandardyń biri eken. Ol Shyńǵys Aıtmatov oqıǵalarynyń jelisimen «Naıman–Ana» atty poema jazypty. Digidik...digidik...daıyn dúnıeni qaıta qýyp shyǵý ońaı ǵoı. «Bátir-aý, Aıtmatovtyń sújetin uıqasqa túsirgennen ne utasyń?» demekshisiz be? Solaı oılaýyńyz zańdy. Mundaıdy qazaq «malta ezý» deıdi. Biraq, Murat Bekeı qaıtalaýdy qasiret emes, qasıet dep uǵady! Sirá, ózine malta ezgen unasa kerek. «Totyqus sındromy» áne sol indetten bastaý alady. Ózgeniń oıyn, sezimin qaıtalaýdyń berekesiz tirlik ekenin avtorǵa uqtyrý úshin aram ter bolyp otyrǵan da shyǵarmyz, alaıda oqyrmannyń kózin ashý úshin eriksiz qolǵa qalam alyp otyrmyz.
Toty qus degen de bógde daýysty birden qaıtalaı almaıtyn kórinedi. Birshama jattyǵý talap etedi eken. Muny eskerip, kóp mashyqtanýdyń ornyna aq qaǵazǵa sıasy tamyp ketse, kitap etip shyǵarý úshin baspaǵa júgiretin Murat Bekeı degen óleńshimiz poezıanyń qarapaıym tehnıkasyn da bilmeıtin bop shyqty. Jazǵandary yrǵaq jóninen aqsap tur.
Oı teńizin(4 býyn)\taǵy da(3)\ keshem endi(4)\,
Qomsynam(3)\arnasam da(4)\neshe óleńdi(5)\.
Naıman-Ana(4)\taǵdyryn(3)\oqyǵanda(4)\,
Ana jaıly(4)\oılarym(3)\eselendi(4).
Dástúrli on bir býyndy qara óleńniń uıqasymen jazylǵan poemanyń osy bir shýmaǵynyń ózinde qanshama rıtmıkalyq qate bar. Al, mundaı qateler joǵaryda joǵaryda dáıeksóz retinde alynǵan joldarda da, avtordyń basqa eńbekterinde de órip júr.
Janardyń móldirinen saýlatamyn,
Jannyń nurly jańbyryn sirkiregen.(??)
«Jyr álemi».
Saýlaý men sirkireý eki túrli áreketti bildiretin uǵym. Jańbyr saýlasa sirkiremeıdi, sirkirese saýlamaıdy.
«Qarlyǵashym» óleńiniń alǵashqy shýmaǵynda avtor «Aǵasyna meńdetken jyr azaby, Qanatymen sý sepken qarlyǵashym» deıdi de, segizinshi shýmaqta «Kólimde terbetilgen kógildirsiń, Áýenińmen aqqýlar kóz ildirsin» deıdi. «Kógildir» dep qazaq aqqýdyń balapanyn aıtady. Murat Bekeıdiń qarlyǵashy qalaısha aqqýdyń balasyna aınalyp ketkenin baıqamaı qaldyq qoı! Álde, bul shyǵarmasyn uıqysyrap otyryp jazdy ma eken? Jalpy, avtor bir óleńniń ózinde birdi aıtyp, birge ketip, logıkalyq qatelerdi de kóp jiberedi. Oıyn júıeli túrde jetkize almaı, shatqaıaqtaıdy.
Kóktem qonsa (?)Jer betine ásem gúlin sebelep(?),
Tamsanýmen sulýlyqqa sharq urǵandaı kóbelek(?).
«Ana»
Myna eki joldyń biri baýdan, biri taýdan kep tur. Jer betine qonǵan kóktemdi kim kóripti? Jaı qonbaı ásem gúlin sebelep qonǵan kóktemdi elestetý qıyn. Negizi, jer betine ásem gúlin jaıqaltyp kóktem keledi, qonbaıdy! Al, kóktemdi sulýlyqqa tamsańǵan kóbelekke teńeý–esýastyq. Kóktem jansyz predmet bolǵandyqtan sulýlyqqa tamsanbaıdy, sulýlyǵyna tamsandyrady.
Aıdyndardyń aıdarly móldirinen(?),
Sýsynymdy meılinshe qandyryp em.
«Bazyna».
Ádette, tynyq sýdy «móldir» dep ataımyz. Endeshe ol qalaısha aıdarly bola alady? Týlap aqqan sý aıdarly bolýy múmkin.
Janarynan saýlasa,
Juldyzdy jyrdyń dirili(?).
«Qıaǵa tiktim kózimdi».
Saýlaý–kúshti aǵysty bildiredi. Diril saýlamaıdy ǵoı.
Kóz ildirmeı titkilep, qazynaly oı kenin,
Qur qol qaıtyp oralsam–óleń meniń qaı teńim(?)?
«Súıem seni, poezıa».
Ana tilimizde «ne teńim?» degen turaqty tirkes bar. Bul jerde sony qoldaný oryndy. Biraq, avtor uıqas úshin maǵynadan keshe salǵan. «Qaı teńim?» degen sóz basqa maǵynany bildiredi.
Kókpeńbek bop shalqysa kúı reńi,
Shárbat aýa dilińdi úıiredi.
«Arman sapary»
Kókpeńbek túske enip kúıdiń reńiniń shalqýyn túsine almaı dal boldyq. Kúıdiń reńi bola ma? Onyń aýaǵa qandaı qatysy bar? Aýa qalaısha dildi(júrekti)úıiredi? Qazaq áldebir tátti taǵamǵa qatysty «dámi tildi úıiredi» dep qoldanady.
Jańbyrda jalań aıaq syzǵan adym(?),
Shaqtardan bilippin be iz qalaryn.
«Arman sapary»
Kisi jańbyrda jalań aıaq júrýi, qadam basýy múmkin. Biraq, «syzǵan adym» degendi túsinbedik.
Tún perdesi tańmenen túrilgende,
Sezimnen bola kórme jyrym kende.
Ystyqsyń sen ańqyǵan jýsan ıisin,
Kókiregim qanbastan simirgende(?).
«Arman sapary»
Iisti simirgendi qaı atańnan kórip ediń? Sýdy simiremiz, ıisti qushyrlana ıiskeımiz. Osyndaı qarapaıym jaıttardy bilý úshin kóp aqyl kerek emes qoı!
Halqymnyń arqa súıer alyby kóp,
Qashan biz izgilikke tarylyp ek,
Kóginen juldyzdaıyn aǵyp ótken
Kim aıtady Shoqandy han uly dep(?).
«Abaı–Muhtar».
Shoqan Ýálıhanovtyń han tuqymy ekenin bárimiz aıtyp júrmiz ǵoı. Tıym salynbaǵan shyǵar. Kóginen júldyzdaı aǵyp ótse han uly bolmaı qala ma, álde han uly kóginen juldyzdaı aǵyp ótpeı me?
Eki-úsh jyl ózi nege isti bolyp,
Qajalady(?) túrmeniń qatqan nanyn?!
«Abaı–Muhtar»
Oıbaı-aý, mynaý ne deıdi? Qatqan nandy kemiremiz. Áldebir zattyń úıkelisinen zaqymdanýdy qajaldy deımiz.
Búgin Muqaǵalıdyń týǵan kúni,
Ádilettiń saltanat qurǵan kúni(?).
«Muqaǵalı týǵan kún»
Maqataevtyń uly aqyn ekenin bilemiz. Biraq, onyń týǵan kúniniń ádelettiń saltanat qurýyna ne qatysy bar? Álde o kisi týǵan boıdan sot nemese prokýror bop elge ádilet ornatqan ba?
Murat Bekeı orys fılologıasy men birge býhgalter mamandyǵyn ıgergen kisi eken. Sondyqtan, qazaq tiline orasholaq ekeni birden baıqalady. Shalys basqan tusyna shuqshıyp, qatesin túgel jipke tizip bersek, oqyrmannyń ýaqyty ketedi. Degenmen, qazaqshany qatyrmaı júrip, «Qareliniń(?) jaınaıdy pań janary»(«Týǵan jerge kúz keldi»), «Qoldan jasap aqyndy ala almassyń, Meıli, qansha tóńkeni(?) qashaýlaǵyn»(«Arman sapary») degen sıaqty bógde sózderden aýlaq bolý kerektigin aıta ketý artyq bolmas. «Qareli», «tóńke» sózderiniń maǵynasyn túsinbegendikten ózbekshe shyǵar dep topshyladyq. Qalyń qazaq túsinbeıtin sózdermen basty qatyrýdyń qajeti qansha?
Qansha úńilgenimizben orys tili mamany jáne býhgalter shaıyrdan tushymdy shyǵarma tappadyq. Áý basta burys joldy tańdaǵandyqtan bolar, aty aryp, poezıa álemine jete almaı qalǵan sıaqty. Osylaısha, jeliktiń jeteginde ketip, jelge sýyrylǵan totyqus-taǵdyrlardy eriksiz aıaısyń! Ómirzaıa!..
ESEKKE ESİ KETKEN
NEMESE ÁLEÝMETTİK JELİDEGİ JIİRKENİSHTİ JAZBALAR
Maqalamyzdyń kirispesinde bul avtordyń «shyǵarmashylyǵyna» súzgiden ótkizýimizge onyń áleýmettik jelidegi jıirkenishti jazbalary sebeb bolǵanyn jazǵan bolatynbyz. Qazaqstan respýblıkasy zańnamalarynda áleýmettik jeli BAQ-pen teńestirilgeni barshaǵa belgili. Demek, jelide jarıalanǵan jazbalarǵa sholý jasaýǵa, olar jaıly pikir bildirýge tolyq quqylymyz.
Murat Bekeı Feısbýktegi paraqshasyna marqum aqyn Esenqul Jaqypbektiń «Kóten» degen óleńin salyp, eldi biraz shýlatty.
KÓTEN
Jata-jata ish ábden pysyǵasyn,
Birdeńe aıtyp, úıińnen sytylasyń.
Barasyń bir ortaǵa, barasyń da,
Olarǵa da onsha aýmaı yqylasyń
Birdeme aıtyp odan da qutylasyń.
Zaıa ketip óleńiń, ter men eńbek,
Kórine almaı júresiń elge jóndep.
Kórineıin deseń de turyp alar,
Kóteni úlken bireýler kóldeneńdep.
Ólip-óship eńbegiń elengenshe,
K...ke bóstek jasaıdy senen kórpe.
Qaı kótenniń dáýiri týdy eken dep,
Kóten ańdyp ótesiń óle-ólgenshe.
Kóten – arman, kúnde bir kóten – úmit,
Adam bola almaısyń jeke júrip.
Bir-aq ýys bop qapty óz kótenim,
Kóringendi júrgende «kóke» qylyp.
Bul zaman da ózgerer bir jaǵyna,
Seniń k...iń bitkenshe kóterilip.
Esenqul Jaqypbek negizinen, aıtysker aqyn emes pe, sondyqtan onyń jazǵandary fólklorǵa, keıbireýleri tipti «kóshe ánderine» jaqyndaý. Bul óleńdi de sýbektıv kóńil kúıdiń áserimen súıkeı salǵan shyǵar. Muny qazirgi poezıanyń shedevri retinde jalaýlatýdyń eshqandaı reti joq. Al, osy óleńdi feısbýktegi paraqshasyna salyp, birneshe dosymen aýzynan sýy aǵyp maqtaǵan Murat Bekeıdiń talǵamyna kúmándanyp, áliptiń artyn baqtyq.
Áleýmettik jelide otyrǵan ana, apa, qaryndastarǵa ne aıtsa da bola beredi dep oılaıtyn shyǵar, Murat Bekeı oǵash dúnıelerdi salýdy údete tústi. Áıelderge aqyl aıtqysy keldi-aý deımin, kóp bala tabýdy nasıhattaǵansyp, óziniń «Kók kórpeniń búlkildegeni» degen «óleńin» saldy:
Kók kórpe búlkildegeni...
Keıde,ras,kúlkiń keledi.
Bireýge bul sóz unaıdy,
Bireýler syrtyn beredi.
Kók kórpe búlkildegeni...
Kóp syrdyń kiltin beredi.
Dál qazir bizge kerek-aq,
Sanany oı tilkimdegeni!!!
Kók kórpe búlkildegeni...
Óleńdi tolyq berýge elden uıalyp otyrmyz. Qaı qazaq ana, apa, qaryndasyna osyndaı sóz aıtady. Bul ońasha qalǵanda eri áıeliniń qulaǵyna aıtatyn dúnıe emes pe? Álde Murat Bekeı myrza óz qyzyna «Óz qyzyna kók kórpeni búlkildet» dep aıtyp júr me eken?!
Ár aqyn shyǵarmashylyǵynyń altyn arqaýy bolady ǵoı, Murat Bekeı salpańqulaqty janýar taqyrybyn súısine, erekshe mahabbatpen jyrlaıdy. Avtordyń esi ketkendeı esektiń qandaı qasıeti baryn bilmeımiz.
Syıǵa bergen ájesine babasy,
Tozǵan áıel páltesiniń jaǵasy.
Satsam ba eken esegimdi
Bazarda
Qymbat deıdi baǵasy.
Bilgen janǵa paıda kózi kóp,inim.
Saýdaǵa da aýǵan bir kez kóńilim.
Menen saýdager shyqpady,
Osylaı...
Ótip jatyr jaqsy-jaman ómirim.
E,aıtpaqshy,nege qymbat bul esek?
Eti deıdi arammenen bir esep.
Terisi de ótimdi eken shetelde,
Sózdiń ushyn paıdaǵa ákep tiresek.
Mundaı sózdi estimegen paqyryń,
Keshe úlken bir kázıtten oqydym.
Etin shashlyq qylady da,
Terisin
Ótkizedi...qalaı jeter aqylyń?!,–dep bastalatyn uzyn sonar óleńi arqyly avtor bul janýardyń jarnamasyn jasaýǵa shyndap kiristi. Feısbýktaǵy keıbir esekqumarlar «laık» basty. Talǵamy, oı órisi ózimen deńgeıles jandardyń qoshemetinen shabyttanyp ketken bolý kerek, buryn-sońdy qazaq aqyndary qalam tartpaǵan taqyrypta óleń jazyp aıdy aspannan bir-aq shyǵardy:
Aıaýlym, jyrlaı alman,
Arnaman jarytyp óleń.
Sezimdi bylǵap alǵam,
Esektiń artymenen(??).
Bizdiń sóz tanıtynymyz ras bolsa, bul jerde ...áldebir... las árekettiń...bop ketkendigi...jaıly aıtylyp tur ǵoı...áıtpese...tekten-tekke...sezim... bylǵana ma? Áıel bolǵandyqtan... bul áreketti...ashyq mátinmen berýge...qysylyp otyrmyz. Eger joǵarydaǵy shýmaq fılologıalyq saraptamaǵa berilse, qorytyndy bizdiń tujyrymymyzben dóp kelýine kúmán joq.
Feısbýkte otyrǵan jurttyń bári aqymaq emes eken. Osy óleńdi oqyǵannan-aq Kúljaına Qanıeva degen ıýzer ashyq qarsylyqqa shyqty. «Jaman syryn aıtam dep, shynyn aıtady» demekshi, ańdaýsyzda elge masqara bolǵan Murat Bekeı «esektiń artyn jý da mal tap» degen Abaı sózine artyna tyǵylǵysy keldi. Abaı «mal tabý úshin aýyr eńbekten qashpa» demekshi bolǵan ǵoı, anandaı... áreket...jasa demegen! Qalbaı Ábdiraman atty ıýzer de M. Bekeıdiń qateleskenin juqalap jetkizgen.
Qoryta aıtqanda, biz maqalamyzda Murat Bekeıdiń shyǵarmalary jaıly óz pikirimizdi aıttyq. Ony qabyldaý-qabyldamaý árkimniń óz sharýasy. Avtordyń jeke basyna tıispeýge barynsha tyrystyq. Ashshylaý sózder aıtyp jibergen bolsaq, shyǵarmany oqyǵan soń týyndaǵan sýbektıv áserdiń saldarynan dep uǵyńyzdar. Ara-tura osyndaı syn jazylyp turýǵa tıis. Óıtkeni, syn túzelmeı, min túzelmeıdi!
Móldir Amanbaeva
