Bastaýyn san myńdaǵan ǵasyrlardan alatyn, búginde elimizdiń batys óńirinde saqtalyp qalǵan dástúr. Shartty túrde naýryzdyń 14-i «Kórisý kúni» (keıde «qaýyshý kúni) dep atalady. Al halyq arasynda Naýryz meıramyn qarsy alý osy kúnnen bastalady.

Bul kúni aýyl turǵyndary erte turyp, eleń-alańnan jasy úlken adamdarǵa sálem beredi. Kórshi-qolań bir-birine «Jasyń qutty bolsyn!», «Jasyńa jas qosylyp, ǵumyryń uzaq bolǵaı!» dep tilek aıtady. Kórisý kúni burynǵy ókpe-renish keshirilip, arazdyq umytylady.
 
Kórisý — tek adamdardyń bir-birine amandasyp, jaqsylyq tileıtin, bir-birimen qaýyshatyn merekesi ǵana emes, sondaı-aq jasy úlkenderge izet kórsetip, iltıpat bildiretin kún. Óıtkeni Kórisý salty bir kúnmen shektelip qalmaıdy, naýryz boıy jalǵasa beredi.
 
Naýryz toıyndaǵy «Kórisý» rásimi týraly tarıhshy, etnolog aǵamyz Jambyl Artyqbaev bylaı deıdi:
 
«Kórisý» qazaqtyń Naýryz meıramynyń negizgi saltynyń biri. Keńes zamanynda ábden umytylyp baryp, jańa jandanyp jatyr. Qazaqqa qys mezgili qashan da aýyr bolǵan, tipti ertede túgelge jýyq Syrdyń boıynan bastap Jıdeli Baısynǵa deıingi aımaqta qystap otyrǵanda da qınalsa kerek. Sebebi qys qytymyr bolyp jatsa mal ashyǵady, keıde kóktemge qaraı jańbyr erte jaýyp, ne qar erip baryp qaıta qatyp jut bastalyp ketedi. Kóterem mal qyryla bastaıdy. Mal ashýy – jan ashýy, qys-qamytta bir jerden ekinshi jerge kóship, ne malyn alysqa aıdap, jaıylymǵa bola daýlasyp bir-birimen arazdasyp eldiń esi shyǵady. Onyń ústine maldyń paıdasyna bola qazaq sharýashylyqtary bir-birinen qys kezinde alystaý otyrady, sebebi qysta da jaıylym kerek, ol ýaqytta qazaq shóp-azyq daıynadamaıdy degendeı. Osyndaı qıyndyqtardan shyqqannan keıin Naýryzdy qazaq qýanyp qarsy almaǵanda kim qarsy alady? Naýryzǵa qazaq qýanbaǵanda kim qýanady? Kórisý de osyǵan baılanysty shyqqan. Qys boıy bir-biriniń óli-tirisin bile almaı saǵynǵan eldiń jasaıtyn joralǵysy. Bir-birin qushaqtap, keıde ólgenderin joqtap, keıde tiri qalǵanyna shúkirlik aıtyp kórisedi».