«Tablıǵı Jamaǵat» dinı uıymynyń ıdeıalaryn nasıhattaǵany úshin T. esmidi astanalyq turǵynǵa aıyp taǵylyp, 9 aıǵa bas bostandyǵynan aıyryldy, dep habarlaıdy Astana qalalyq prokýratýranyń baspasóz qyzmeti.

Resmı aqparat boıynsha, sottalýshy 2013-2015 jyldary «Tablıǵı Jamaǵat» uıymynyń ıdeologıasyn taratyp, jaqtas jınaý úshin «daǵýat» jurgizgen. Sot-keshendi saraptama qorytyndysy T-nyń aıtqandaryn «Tablıǵı Jamaǵat» uıymynyń ıdeıalary dep tapqan.

Sot sheshimi boıynsha, T. jazasyn qonys kolonıasynda óteıdi.

«Tablıǵı jamaǵat» – destrýktıvti dinı uıymdardyń qataryna jatady. Teologıalyq jaǵynan atalǵan dinı uıym Islamnyń súnnıttik baǵytyn ustanǵanymen, birqatar ǵalym-sarapshylardyń pikirinshe, onyń ıdeologıasy Islamnyń keıbir qaǵıdalaryna qaıshy jáne radıkaldyq turǵydan ýahabızmge jaqyn. Iaǵnı, bul qozǵalystyń ıdeıasy da balama oılar men pikirlerdi joqqa shyǵarady. Shyndyǵynda, Islamnyń hanafı baǵytyna mundaı birjaqtylyq tán emes edi.

Qazaqstanda «Tablıǵı Jamaǵat» uıymy 2013 jyly ekstremıstik dep tanylyp, qyzmetine tyıym salynǵan. Bıliktiń uıǵarymynsha, «Tablıǵı Jamaǵat» Ortalyq Azıada ıslam halıfatyn qurýdy kózdeıdi.

Qazaqstanda 2013 jyldan beri bul uıymnyń qyzmetine aralasty degen aıyppen ondaǵan adam sottaldy.