Aqtóbege issaparmen kelgen premer-mınıstr Baqytjan Saǵyntaev oblysta atqarylǵan jumystarǵa tamsanyp, tańdaı qaǵyp ketti dep habarlaıdy nur.kz portaly.

Qazaqstannyń premer-mınıstri Baqytjan Saǵyntaev jumys saparymen Aqtóbege keshe keshkilik jetti. Eki kún boıy qalada birneshe nysandy aralaǵan premer-mınıstrdiń kóńili jaılanyp qalǵan.

"Kórgen nársege kóz toıyp otyr. Kóptegen jumystar jasalǵan. Men Aqtóbege jyl saıyn kelemin. Kelgen saıyn ózgeristerdi kórip otyrmyn. Munyń bári elbasy bergen tapsyrmalardyń jergilikti jerlerde oryn alýyn kórsetedi", - dedi Baqytjan Saǵyntaev.

Premer-mınıstr Aqtóbedegi aýrany ózgertip, sheteldik ınvestorlardyń ózin shyr aınaldyryp otyrǵan oblys ákimine rıza boldy.

"Sheteldik ınvestorlarmen kóbirek jumys jasaýymyz kerek. Aqtóbedegi birneshe nysandy aralaǵannan keıin qýanbaý múmkin emes. Óńirde tek ózge oblystyń kásipkerleri ǵana emes, sheteldik ınvestorlar da jumys jasaýǵa qyzyǵýshylyq tanytyp otyr.

Munda jedel járdem qyzmetine sheteldik ınvestorlar tartylǵan. Basqa óńirde ondaı joq. Múmkin Berdibek Mashbekulynyń kóshirmesin jasaý kerek shyǵar",- dedi premer-mınıstr.