...Qadym zamanda qytaıyń men orysyń, mońǵolyń men qyzylbasyń Eýrazıa qurlyǵyn Uly Dalanyń daýylpaz da jaýynger jurty qazaqtan ǵana qaımyǵyp (ózbek pen qyrǵyzdan, túrkimen men tájikten emes), basakóktep jaýlaı almap edi. Tarıh – bul aqıqatqa anyq kýá!..
Á degende, Qazaq elinen jas toqal tapqan kóripkel, qazaqsha aıtqanda, «saıtannyń sapalaǵy» Pavel Globa degen bireý sandyraqtap shyǵa keldi. Minezi birde alaı-dúleı, birde beıqam-mamyrajaı qazaǵym Astananyń bir qyzyn unatyp qalyp, otbasynan ajyrap, Astana men Máskeýdiń ortasynda qydyrystap júrgen Pavel GLOBA degen bir sáýegeıdiń «2017 jyly Qazaqstan Reseıge qosylady» degen sandalbaıyna miz baqpaı, dym estimegendeı, esinep otyra berdi...
Astrolog Pavel Globanyń ańyzdyq sandyraǵy, dálirek aıtsaq, ıdeologıalyq teraktisi bylaı deıdi: «2017 jyly...
1. Amerıkanyń dollary qunyn joǵaltyp, «álemdik valúta» degen atynan da, abyroıynan da aıyrylady. … Eýro valútasy turaqtaıdy, jıǵan-tergenińizdi eýroǵa aýystyryp úlgerińizder...
2. «Qara altyn» – munaıdyń «tamyryna qan júgiredi». Quny ósedi. Kreml qarjylyq daǵdarysty eńserip shyǵady.
3. Jyldyń ekinshi jartysynda álem astan-kesten bolyp, Úshinshi dúnıejúzilik soǵys bastalyp ketýi múmkin. Musylman eli (bul Iran bolýy múmkin) búlik shyǵarady. Parsylar túrikterge tap beredi.
4. Ýshyǵyp ketýge ázir turǵan jaǵdaıdy Reseı óziniń baqylaýyna alady. Onyń danagóı kósemi osy jaǵdaıǵa ádil tórelik etip, tıisti sheshim shyǵarady. Óziniń ataq-abyroıy men aqyl-biliminiń arqasynda Pýtın Úshinshi dúnıejúzilik soǵystyń aldyn alady.
5. Reseıde jańa dinı qozǵalys qurylyp, aınalasy birneshe jyldyń ishinde bul aǵym hrıstıan jáne ıslam dinderin «otarlap», «birtutas álemdik din» degen ataqqa ıe bolady.
6. Qazaqstan Reseıge qosylady. Qazaqstan men Belarýs Reseıdiń kúshi asyp-tasyp bara jatqanyn kórip, Reseıdiń qoltyǵyna kirgisi keletinin aıtady. «Amerıka men EýroOdaqtyń ózi «Úsh memleketen quralǵan derjavanyń» janynda «oıyn balasy» bolyp qalyp, az ýaqyttan keıin bularǵa Ázirbaıjan men Armenıa qosylady...»
Mine, ǵasyrlyq sandyraqtyń ATASY!
Jalpy, Islam dini – kóripkeldikke, palshylyqqa, sıqyrshylqqa úzildi-kesildi qarsy!
...Taǵy bir haramnan nan tapqysh sıqyrshy, ázirbaıjandyq kóripkel Zıraddın RZAEV bylaısha soǵady: «Men tús kórdim. Bir tylsym daýys maǵan bul kórgenderimdi ýaqytynan erte aıtpaý kerektigin eskertti, degenmen, ony halyqqa jetkizýdi jón sanadym...
...AQSH basshysy Donald Tramp ózin kógildir ekranda kórsetip júrgendeı adam emes, ol óte aqkóńil adam. Reseıdi qoldaıdy jáne álemde beıbitshilik ornaǵanyn qalaıdy.
...Reseımen kórshiles memleketter Qazaqstan, Moldova, Ózbekstan elderi Ýkraınanyń kebin kıýi ábden múmkin. Donald Tramp ıslam memleketterine qarsy jospar quryp otyr...»
Kórdińiz be, ekeýi de Reseıdiń «myqtylyǵyn» aıtyp, «orys jerinde ǵana jumaq ornaıdy» deıdi...
Basqa-basqa, «ishten shyqqan shubar jylan» óz jerlesimiz, sıqyrshy, kóripkel Baqyt JUMATOVA «bálkim, rýhanı óskendigimnen bolar, men úsh jylǵa boljam jasadym» – dep bir jelpinip alady da, «Soltústiktegi baılyǵymyz – nan, ońtústikte – jemister men kókónister, Almaty qalasynda alma ósiriledi» – dep, «adamnyń oıyna kelmeıtin» «jańalyq» ashady. Odan ári «irik aýyzdan – shirik sóz shyǵyp», «Bul jyl óte aýyr jyl bolady» – degen ekpinmen aýzyna kelgenin laq etkizedi:
«1. Sýdyń baǵasy úlken másele týdyrýy múmkin, sý tapshylyǵy bastalady.
2. Biraz ýaqyt ótkennen soń, elde birde-bir bank qalmaıdy.
3. Biz rúblǵa aýysamyz. Rúbl dollar men evrodan da qymbat valúta bolady...»
...Syrtqy dushpannyń aramdyǵy túsinikti, al, mynadaı óz ishimizden shyqqan ashyq satqyndyqqa qalaı shydarsyń?!.
Men osy sandyraqshylardy úsh aıdan astam ýaqyt boıy tyńdap, zerttep, shydap baqtym. Bári qazaqtyń ulty men memeleketine qarsy sózder aıtty. Bir sózben qorytsaq, «QAZAQTYŃ BOLASHAǴY JOQ» degenge saıdy...
Sonda óz ishimizden shyqqan satqyndardy paıdalanyp jatqan dushpannyń qysastyǵyn kim qadaǵalaıdy? Álgi Jırınovskıı degen aýsardy «jyndy» dep, jeńil jaýyp qoıa saldyq...
Qazaq eliniń ulttyq Qaýipsizdik qyzmeti, prokýratýra, quqyq qorǵaýshylar qaıda qarap otyr? Qazaq elin keshegi ozbyr sovet ókimeti kezindegideı «óndirý sehy» esebinde paıdalanýdy armandap-ańsaǵan sasyq peıil arandatýshylardy (olardyń basqaǵa búırek burǵan bizdegi qolpashtaýshylarymen qosa) dereý anyqtap, nege jaýapqa tartpaıdy? Bulardy taıly-tuıaǵymen «turaqtylyqqa qaýip tóndirýshi», «arandatýshy hám ekstermıstik top» dep baǵalap, nege qatań shara qoldanbaıdy? Qashanǵy shydaımyz? Qansha kútemiz?..
...Baıqap qarasańyz, sáýegeıler sandyraqshyl bolǵanymen, óletin jerlerin de ábden biledi. Orystyń basshysy týraly aıtqanda aqyryn júrip, mysyqsha jumsaq máımóńkege kóshedi. Tipti, «Qorǵaı gór jáne saqtaı gór!» («Spası ı sohranı!») – dep, Pýtındi Isa paıǵambarǵa deıin teńeıdi. Demek, Pavel Globa Reseıdiń nemese Qytaıdyń, bolmasa Amerıkanyń arnaýly barlaý qyzmetteriniń (bálkim, úsheýiniń de birdeı) jansyzy (shpıon) bolýy múmkin ǵoı...
Bul máselelerdi Ulttyq Qaýipsizdiń Komıtetiniń (Basshysy Kárim Másimov) «Qarsybarlaý» (kontrrazvedka) basqarmasy tıanaqtap tekserýge tıis. Sirá, qymbatshylyqtan qysylyp, kóshege shyqqan at tóbelindeı 5-6 zeınetkerdi ańdyp-andyzdaı bergennen – eldiń irgesiniń bekimeıtini belgili...
Dinge jaýapty mınıstrimizdiń ózi: «Mash-Allanyń» ornyna – «Qudaı qalasa» dep aıtýǵa bolady ǵoı...» – dep, móńkigende; ol – ol ma, BQO-nyń Oral qalalyq máslıhatynyń hatshysy Akkalı Aýbekerov ózin Reseıdiń Federaldyq Jınalysynyń tómengi palatasyndamyn dep «qıaldap»: «Depýtat, ýznav o sýshestvýıýsheı probleme, napravláet ız Dýmy zapros v kompetentnye gosorgany» – dep jazyp júrgende, aramza-dushpan synalap kirip, aramyzdy ajyratyp ketpesin!
Qazaqstandy Reseıge qosý týraly aıtý, eldegi ulttyq-patrıottyq rýhty sóndirýge umtylý, qaımana qazaqty jik-jikke bólýdi kózdeý – Reseıdiń paıdasyna jumys istep jatqandardyń arandatý áreketi ǵana emes, Qazaq memleketiniń birtutastyǵyna nuqsan keltirý dep baǵalanýǵa tıis.
Sondyqtan, qazaq eliniń táýelsizdigi men ulttyq qaýipsizdigine qaýip tóndirgeni úshin reseılik sıqyrshy Pavel Globa men ázirbaıjandyq sıqyrshy Zıraddın Rzaev bizdiń elimizde qajetsiz (zıandy) birlik (persona non grata) sanalyp, el shekarasyna kirgizilmeýi kerek.
Al, batys óńiriniń sıqyrshysy Baqyt Jumatova men batys óńiriniń qıalshysy Akkalı Aýbekerov qazaq ultynan resmı keshirim surasyn jáne mundaı bassyzdyqtyń qaıtalanbaýyna ýáde bersin!
Menińshe, bul – meılinshe ádil ári adamgershilikke tán talap pen sheshim.
Qajymuqan Ǵabdolla
Pikir qaldyrý