Bul týraly Aýyl sharýashylyǵy mınıstrliginde ótken agrarlyq keńestiń kezekti otyrysynda Vıse premer A.Myrzahmetov málimdedi dep habarlaıdy "Qamshy" aqparattyq agenttigi QR ASHM Baspasóz qyzmetine silteme jasap.
Búgingi Keńestiń kún tártibinde mańyzdy úsh másele kóterildi. Olar: sýbsıdıalardyń jańa erejesi, zańnamalyq ózgerister jáne jańa transfert ortalyǵynyń jumysy talqyǵa tústi.
Birinshi suraq, ıaǵnı memlekettik qoldaý boıynsha jańa Memlekettik baǵdarlama aıasynda 8 sýbsıdıalardyń erejeleri qaıta qaralǵan. Sondaı-aq 11 tıimsiz sýbsıdıa alynyp tastalynyp, 39 sýbsıdıa túrine ózgeris engizilgen.
Atap aıtatyny, bıyldan bastap memlekettik qoldaý alýshylardyń sany 7,5 esege ósedi.
Onyń ishinde, bordaqylaý alańdary úsh esege kóbeımek. Máselen, ár asyl tuqymdy iri qara mal basyn satyp alǵanda qaıtarymsyz 150 myń teńge beriledi. Al buǵan deıingi erejede asyl tuqymǵa da, sharýa malǵa da birdeı qarjy tólenip kelgen. Ekinshi ózgeris kooperasıa múshelerine qarastyrylǵan jeńildikter.
Kooperasıaǵa satylatyn 1 bas iri qara úshin memleket qaıtarymsyz 20 myń teńge tólemek. Sondaı-aq, 1 lıtr sútke 10 teńge, bir ýaq malǵa 1500 teńge qarjy bólinedi. Budan bólek kooperasıaǵa alynatyn jemniń ár tonnasyna 20 myń teńge tóleý kózdelgen. Alaıda bul degenimiz kooperasıaǵa birikpegender memlekettik qoldaýdan qalys qalady degen sóz emes. 30 bas iri qaradan joǵary maly bar sharýashylyq egeleri ár lıtr sútin 15 teńgeden, al 400 bastan joǵary sharýalar ár lıtrin 25 teńgeden sýbsıdıalanady.
Asyl tuqymdy eshki asyraýshylar birinshi márte memlekettik qoldaýǵa ıe bolmaq.
Sýbsıdıa boıynsha taǵy bir tushymdy jańalyq, olardyń avtomattandyrylýy. Iaǵnı, jemqorlyqtyń aldyn-alý maqsatynda mal sharýashylyǵyna beriletin sýbsıdıalar avtomattandyryldy. Keler jyldan bastap Aýyl sharýashylyǵy salasyndaǵy barlyq qoldaý avtomattandyrylatyn bolady.
Al balyq sharýashylyǵy tuńǵysh ret úlken múmkindikke ıe bolmaq. Aýyl sharýashylyǵyn damytýdyń 2017-2021 jyldarǵa arnalǵan baǵdarlamasy negizinde taýarly balyq ósirýshilerge sýbsıdıa tólenedi. Tipti, balyqtyń uryǵy, tamaǵy, ony qadaǵalaıtyn tehnıkalaryna deıin ınvestsýbsıdıa qarastyrylǵan. Atap ótetin taǵy bir jaıt, ınvestsýbsıdıanyń da kókjıegi keńeıgen. Iaǵnı bıyldan bastap kooperatıv ujymǵa qajetti tehnıka satyp alǵanda memleket birden 50% ótep bermek. Mundaı jeńildik ASHM-de buryn-sońdy bolmaǵan. Agrarlyq keńestiń otyrysynda Vıse-premer osyndaı aýyz toltyryp aıtatyn jańalyqtarymen bólisti.
Vedostvo basshysynyń aıtýynsha, mundaı úlken qoldaý memleket basshysynyń Aýyl sharýashylyǵyna erekshe kóńil bólip, agrarlyq sektordy ekonomıkanyń jańa draıveri dep ataýynyń arqasy deıdi.
Kún tártibindegi ekinshi másele de ózekti. Jańa baǵdarlamany engizý barysynda kóptegen zańdylyqtarǵa ózgerister jasaldy. Buǵan deıin qolbaılaý bolǵan normatıvtik aktiler ońtaılandyryldy. Onyń negizinde 11 kodeks pen 25 zańǵa ózgerister men tolyqtyrýlar engizildi. Aýyl sharýashylyǵy mınıstrligi men jergilikti ákimdik arasyndaǵy ártaraptandyrýǵa baılanysty memorandýmdar, tuqym sharýashylyǵyndaǵy, fıtosanıtarlyq karantındik sharalar men balyq jáne orman sharýashylyǵyndaǵy zańnamalyq ózgerister.
Tilge tıek etetini veterınarıa salasynda maldardyń qulaǵyna taǵylatyn syrǵalardyń ózin alý, ony óńirlerge jetkizý, baıqaý ótkizý jumystary sozylyp qol baılaý bolatyn. Endi jańa ózgeris negizinde bul fýnksıany jergilikti bıliktiń quziretine berip, atalǵan jumysta jeńildetý kózdelýde.
Sonymen qatar, otyrys barysynda AÓK-ke sheteldik ınvestısıa tartýmen jáne aldyńǵy qatarly sheteldik tehnologıany taratý operatory bolyp tabylatyn agrotehnologıalardy transfertteý jáne komersıalaý Ortalyǵynyń jumysy tanystyryldy.
