Qazaǵym toı jasaıdy dúrkiretip.
Atqylap ot-shashýyn kúrkiretip.
«Barynda oralyńnyń oına da kúl,
Bul dáýren ketedi, dep, bir kúni ótip!»
Qazaǵym toı jasaıdy dabyldatyp.
Qaryzdanyp, esinen tanyp jatyp.
Jekjaty da jik-jappar qýana almas,
Shaqyrý qaǵazdaryn alyp jatyp.
Deı almaı: «turmys tómen, jaǵdaıym joq...»
Toı jasaıdy «qatardan qalmaıyn» dep.
Kepilge úıin qoıyp, nesıe alyp,
Otyrar toı degende dap-daıyn bop.
Ul – ulyq, kelin – kerdeń aı mańdaıly...
Amal ne, sol mańdaımen oılanbaıdy.
Aqshasyn sýdaı shashyp, «lımýzınmen»
Qydyrmasa, kóńilder jaılanbaıdy...
Qushaǵyn sadaqaǵa jaıa almaǵan,
Sarań da toı degende aıanbaǵan.
Búgingi bizder jegen dámniń túrin,
Qanshama paıǵambarlar jeı almaǵan!
Jatqan kim sonyń bárin jep únemi?
Qabyrǵań ony oılasań sógiledi.
Jegennen birneshe ese kóbiregi
Qoqystyń shuńqyryna tógiledi!
Adamǵa adam ońaı jaǵyp pa eken?
Báleqor báribir min taǵyp keter.
Keıbireýdiń bir jyldyq jalaqysyn,
Bir ánshi bir-aq toıdan alyp keter.
«Jalt etip jurtty ózime qarataıyn,
Dańqymdy, daqpyrtymdy tarataıyn!»
Demese, qulshylyqqa jaratylǵan,
Musylman bolmas pa edi qarapaıym?
Moıyndaý qul ekenin – namys búgin.
Bizdiń toı – báseke men jarys búgin.
Quranǵa qulaq aspaý – adamdardyń
Alladan kórsetedi alystyǵyn.
Aýzyńdy ańqaıtqandar sóılegende,
Qudaıdyń jónin aıtsań boı berer me?
Súıreseń de meshitke barmaıtyndar,
Syltaý tappaı qalady toı degende.
Órnektegen ish-tysyn kórkemdep bir,
Ǵımarattar ormany «kel-kel!» dep tur.
Meshit emes, búginde meıramhana
Qurylysy qaryshtap, órkendep tur.
Toı kóbeıedi eken ǵoı toıynsa jurt.
Qumarlyqtyń qyzýy boıyn shalyp.
Eki ıyǵyn julyp jep bıleıdi-aı kep,
Ermegi bolyp ersi oıyn-saýyq...
Toı degende syltaý kóp, mereke kóp.
Mereke kóp bolsa da bereke joq.
Baqytqa mas bolǵandar bir jyl tolmaı,
Ajyrasyp jatady keleke bop.
Aıta berse sóz kóp bul jıyn jaıly.
Aıtqan saıyn moıyndaý qıyndaıdy.
Adamdar ysyraptan tyıylmasa,
Allanyń yrzalyǵy buıyrmaıdy!