QR Memlekettik Ortalyq mýzeıinde qazaqtyń áıgili akteri, kınorejısseri, KSRO-nyń halyq ártisi, Memlekettik syılyqtardyń ıegeri Sh.Aımanovtyń (1914-1970) týǵanyna 100 jyl tolýyna arnalǵan «Qazaq kınosynyń sańlaǵy» atty memorıaldyq kórme ashylady. Bul týraly Baq.kz saıty habarlady.

Kórme 1 qazannan 1 jeltoqsanǵa deıin jalǵaspaq. Uly rejıser, qaıtalanbas talant ıesine arnalǵan «Qazaq kınosynyń sańlaǵy» atty kórmede akterdiń ómirinen syr shertetin fotomaterıaldar, qujattar, marapattar, ózine tıesili jeke zattary, syılyqtary men Sh.Aımanovtyń tikeleı ózi jınaǵan bákiler jáne shaqpaq koleksıasy qoıylǵan. 

Aıta keteıik, Sháken Kenjetaıuly Aımanov – qazaq kınosynyń negizin salýshylardyń biri, óner kókjıegindegi shoqtyǵy bıik tulǵa ári ulttyq tanymdy ekrandyq ónerde alǵash ret beınelep, álemdik deńgeıge kótergen uly sýretker. Sháken (Shahkerim) Aımanov 1914 jyly Pavlodar oblysy, Baıanaýyl aýdanynyń Aımanbulaq aýylynda dúnıege kelgen. Aýyl mektebin bitirgen soń, 1929 j. Semeıdegi halyq aǵartý ınstıtýtyna oqýǵa túsedi. Osy kezden bastap túrli kórkemónerpazdar úıirmelerine belsene qatysady. 1933 jyly Almatydaǵy Qazaq drama teatrynyń quramyna qabyldanady. Ol somdaǵan Qobylandy, Qodar, Aqan seri, Petrýchchıo, Otello rólderi ulttyq teatr tarıhynda ózindik iz qaldyrdy. 1947-1951 jj. qazirgi Qazaqtyń akademıalyq drama teatrynyń bas rejıseri bolǵan ol 40-tan astam jańa beıne jasap, birneshe spektákl qoıdy. 1953-1970 jj. «Qazaqfılm» stýdıasynyń kórkemdik jaǵyn basqaryp, qazaq kıno óneriniń órkendeýine úlken úles qosty. Sh.Aımanov túsirgen «Mahabbat týraly ańyz» (1953), «Atameken» (1966), «Naızatas baýraıynda» (1968), «Aldarkóse» fılmderinen ulttyq boıaý anyq seziledi. Al, «Bizdiń súıikti dáriger», «Taqıaly perishte» fılmderi ulttyq kıno ónerinde komedıalyq janrdy damytýda erekshelenip, ázil-kúlkili kórinister men qısyndardyń tabıǵaty da ulttyq dástúrlermen tamyrlasyp jatyr. Sońǵy qoıǵan «Atamannyń aqyry» (1970 j.) tarıhı shytyrman fılmi rejıser Sh.Aımanov shyǵarmashylyǵynyń bıik shyńyna aınaldy. Sh.Aımanov Qazaqstan Kınematografıster odaǵyn uıymdastyryp, uzaq jyldar boıy odaq basqarmasynyń birinshi hatshysy (1958-1970) qyzmetin atqardy. QazKSR Joǵary keńesiniń 4 jáne 7 shaqyrylymdarynyń depýtaty bolyp saılandy. 1947 j. Sh.Aımanovqa QazKSR Halyq ártisi, 1959 j. KSRO Halyq ártisi ataǵy berilse, 1952 j. «Abaı» spektaklin qoıǵany úshin KSRO Memlekettik syılyǵy berildi. Lenın, Eńbek Qyzyl Tý ordeni jáne eki márte «Qurmet Belgisi» ordeni, birneshe medaldermen marapattaldy. 2007 j. «Ekran sheberi» ataǵyna ıe boldy.

Sh.Aımanovtyń esimi «Qazaqfılm» kınostýdıasyna, Almaty qalasynyń bir kóshesine berilip, ózi turǵan úıi men kınostýdıa ǵımaratyna memorıaldyq taqta ornatylǵan. Sonymen qatar, Pavlodar qalasyndaǵy kınoteatrlardyń biri Sh.Aımanov esimimen atalady.