29 mamyrda Vladımır Pýtın Parıjge qondy, maqsaty: fransýz basshysy Emmanýel Makronmen jaqynyraq tanysyp, ashyq áńgime-dúken qurý. Máskeý men Parıjdiń qarym-qatynasynan bastap, Sırıa men Ýkraınadaǵy jaǵdaılar jaıynda suhbattasty, dep jazady Qamshy aqparattyq agenttigi.

Jergilikti baspanyń málimetinshe, reseılik qonaqty fransýzdar barynsha sypaıylyqpen, qonaqjaılylyqpen Versal saraıynda qarsy aldy. Qaraýyldar sapqa turyp, qyzyl kilem tóseldi. Makron Pýtınnen burynyraq jetip, Reseı basshysyn ajarly kúlkisimen qarsy alyp, birinshi bolyp qolyn sozdy. Dál sol ýaqytta Máskeýde joıqyn daýyl ornaǵan edi, al Parıjde 30 gradýsqa deıin ystyq boldy.

Kezdesýdiń basty sebebi Petr I Fransıaǵa alǵashqy saparyna 300 jyl tolýyna baılanysty Úlken Trıanon saraıyndaǵy kórmeniń ashylýy boldy: «Uly Petr. Fransıa patshasy. 1717». Bul jaǵdaı eki derjavanyń ara-qatynasyndaǵy aıryqsha baılanystyń alǵashqy bastaýy boldy.

Aıta ketken jón, mereıtoı jaıynda Makron prezıdent bolyp saılanǵannnan keıin birneshe kún ótken soń-aq Reseı basshysyna telefon arqyly habarlasyp aıtqan. «Reseı men Fransıanyń irgeli múddeleri aǵymdaǵy jaǵdaıaattan joǵary», dedi Pýtın. «Biz strategıalyq jáne ekonomıkalyq dıalogty nyǵaıtqymyz keledi», dedi Makron.

Bul kezdesýdiń eki el úshin de mańyzy zor boldy. Reseı men Fransıanyń qarym-qatynasy berik ekenin aıta ketken jón, olardy tarıhtyń ózi qosqan. Versalǵa alǵash ret aıaq basqan Pýtın eki el arasyndaǵy qarym-qatynastyń tereńine boılady: "Bári orys knázi Iaroslav Mýdryıdyń kenje qyzy Annanyń Genrıh Birinshimen turmys qurýynan bastaldy. Ol kem degende eki koróldik dınastıa qurǵan, dınastıanyń biri Ispanıada búgingi tańǵa deıin basqaryp keledi".

«Bul sımvolıkalyq meken. Petr Birinshiniń koróldiktiń qupıalarymen etene tanysý úshin Fransıaǵa kelgen alǵashqy saparyna 300 jyl toldy», dedi Makron. Reseı men Fransıa arasyndaǵy suhbattyń eshqashan taýsylmaıtynyn da aıtyp qaldy.

Sondaı-aq, naqty máselelrdi sheshýdiń mańyzdylyǵy jaıynda da sóz qozǵady. «Eger qajet bolsa, sanksıany kúsheıtemiz, biraq eger deeskalasıa bolsa, olaı bolmaıdy. Men dál deeskalasıa bolǵanyn qalar edim» dedi fransýz basshysy.

Pýtın sanksıanyń Ýkraınanyń ońtústik-shyǵysyndaǵy jaǵdaıdy qalpyna keltirýge kómegin tıgize almaıtynyn aıtty. Erkindikti súıetin fransýzdardy «Ekonomıkadaǵy shekteýlerdiń kúshin joıý úshin kúresińder!» dep shaqyrdy.

Eki basshy úshin de mańyzdysy – terorızmmen kúres edi. Pýtın ádettegideı Sırıaǵa qatysty pozısıasyn baıandady: «Onsyz da ishki qıyndyqtardan japa shegip otyrǵan eldi memlekettiginen aıyryp, terorıstik qaýipti joıý múmkin emes».

Terorızmmen kúresýdi qolǵa alǵan Makron da únsiz qalmady: «Men Sırıaadaǵy terorızmmen soǵysta jeńiske jetkim keledi» dep aıtty ol.

Halyqaralyq isterden bólek, olar uzaq áńgimelesti. Fransıa Eýroodaq memleketi bolǵandyqtan, antıreseılik sanksıaǵa qosylǵan. Eki el arasyndaǵy kóptegen yntymaqtastyq mehanızmderi kesildi. Biraq qazirgi kezdegi saýdanyń ósýin aıtpasqa bolmaıdy. Onyń ústine, 500-ge jýyq fransýzdyq kompanıalardyń birde-biri Reseıden kete qoımady.

Sondaı-aq adam quqyǵy jaıynda da áńgime boldy. Makron batys qundylyqtary jaıynda sóz qozǵap, azshylyqtardyń quqyqtaryn qurmetteýdiń mańyzdylyǵyn tilge tıek etti.

Versal kórmesin aralap bolǵan soń Pýtın ótken jyldyń qazanynda Eıfel munarasynyń mańynan ashylǵan reseılik rýhanı-mádenı ortalyqqa da kirip shyqty. 

Sholýshy: Gúlim Jaqan