AQSH prezıdenti Donald Tramptyń ákimshiligi eýropalyq sheneýnikterge Pasqa merekesine (20 sáýir) deıin Ýkraınada atysty toqtatýǵa qol jetkizgisi keletinin aıtty.

Agenttiktiń jazýynsha, Batys sheneýnikteri soǵys qımyldaryn 20 sáýirge deıin toqtatý josparyn tym ambısıaly jáne múmkin emes dep sanaıdy. Bloomberg aqparat kózderiniń biri bitimge kelýdiń naqty merzimi sáýir emes, 2025 jyldyń sońy bolýy múmkin ekenin atap ótti.

Aldaǵy kelissózder aıasynda Eýropa elderi Ýkraınaǵa áskerı kómektiń jańa aýqymdy paketin ázirlep jatyr. Bloomberg agenttiginiń habarlaýynsha, jospardyń egjeı-tegjeıleri 2025 jyldyń 23 aqpanyna deıin jarıalanbaıdy. Bul kúni Germanıada merziminen buryn parlament saılaýy ótedi. Osylaısha, saıasatkerler daýys berý aldynda daý-damaıdan aýlaq bolady, deıdi agenttik.

Eýropalyq kóshbasshylar Ýkraınadaǵy jaǵdaıdy talqylaý úshin kezdesedi

Qańtar aıynyń sońynda ýkraınalyq Strana.ua basylymy Donald Tramptyń Reseı-Ýkraına soǵysyn toqtatýǵa arnalǵan 100 kúndik josparyn jarıalady. Rastalmaǵan málimetterge sáıkes, atysty toqtatý 20 sáýirde jarıalanýy múmkin, al bitimgershilik konferensıasynyń deklarasıasy 9 mamyrda daıyndalady dep boljanǵan. Eshbir tarap bul qujattyń shynaıylyǵyn rastaǵan joq.

Ýkraınanyń Ulttyq qaýipsizdik jáne qorǵanys keńesi BAQ-ta soǵystyń aıaqtalýy men kelissózderdiń bastalýynyń naqty kúnderi týraly jarıalanǵan aqparat shyndyqqa sáıkes kelmeıdi dep málimdedi.