Memleket basshysy Joǵary aýdıtorlyq palatanyń tóraǵasy Álıhan Smaıylovty qabyldady. 

Kezdesýde Álıhan Smaıylov Joǵary aýdıtorlyq palatanyń byltyr atqarǵan qyzmetiniń qorytyndylary men osy jylǵa arnalǵan jospary jóninde málimet bergen. Onyń aıtýynsha, byltyr 214 nysanda quny shamamen 11 trıllıon teńgeni quraıtyn 27 aýdıtorlyq is-shara ótkizilgen. Sonyń nátıjesinde jalpy somasy 862 mıllıard teńge bolatyn túrli normalardyń buzylǵany anyqtalǵan. Tekseristerdiń qorytyndysy boıynsha búdjetke 135 mıllıard teńge qaıtarylǵan. Bul 2023 jyly ótelgen qarjydan bes ese artyq. 

Memleket basshysyna qurylys nysandaryndaǵy baǵa qalyptastyrý, óńdeý ónerkásibi jobalaryn qarjylandyrý, aýyl sharýashylyǵyn sýbsıdıalaý isinde olqylyqtar únemi baıqalatyny aıtylǵan. Joǵary aýdıtorlyq palata barlyq anyqtalǵan zań buzýshylyqty joıý úshin úkimetke usynym berip, jaýapty memlekettik organdarǵa nusqama joldaǵan. Álıhan Smaıylov bıyl 40-tan astam aýdıtorlyq is-shara ótkizý josparlanǵanyn jetkizdi. Memleket basshysynyń tapsyrmasy boıynsha Astana jáne Almaty qalalary, Soltústik Qazaqstan, Qostanaı jáne Jambyl oblystary, sondaı-aq "Samuryq-Qazyna" qory, "Qazatomónerkásip" ulttyq kompanıasy, KEGOC kásiporyny, Ulttyq bank, Tótenshe jaǵdaılar mınıstrligi búdjetteriniń oryndalýy tekseriledi. Sonymen qatar ǵylym, qorǵanys, quqyqtyq tártipti saqtaý, sport, áleýmettik qamtamasyz etý, orman sharýashylyǵy salalarynda aýdıtorlyq tekserister júrgiziledi. Kezdesý sońynda prezıdent memlekettik aýdıt júıesin jetildirý jónindegi jumysty jalǵastyrýdy tapsyrǵan. Sondaı-aq búdjet qarjysynyń ıgerilýin tıimdi baqylaý úshin zamanaýı sıfrlyq sheshimderdi engizýdiń mańyzyna nazar aýdarǵan.