Elektrondy temekini elge ákelgeni úshin shetel azamaty bas bostandyǵynan aıyryldy.

Beıneý aýdanynyń soty shetel azamatyn elektrondyq tutyný júıelerin (veıpterdi) elge ákelgeni úshin QR Qylmystyq kodeksiniń 301-1-baby 2-bóligimen kináli dep tanyp, oǵan 1 jylǵa bas bostandyǵynan aıyrý jazasyn taǵaıyndady.

"Shekara beketin tekserý barysynda avtokóliktiń júk salǵyshynda 4 550 dana "WAKAsoPro20000" markaly elektrondyq tutyný júıeleri anyqtalǵan.

Zańdy kúshine engen sot úkimi boıynsha kórsetilgen taýarlar joıýǵa jiberildi", - delingen habarlamada.

Qylmystyq kodekstiń 301-1 jańa baby temeki buıymdarynyń, elektrondyq tutyný júıeleriniń (veıpterdiń), olarǵa arnalǵan hosh ıistendirgishter men suıyqtyqtardyń aınalymy úshin jaýapkershilikti belgileıdi.

"Quqyq buzýshylyqtyń aýyrlyǵyna baılanysty aıyppul salý, túzeý jumystary, qamaýǵa alý nemese eki jylǵa deıin bas bostandyǵynan shekteý ne aıyrý jazalary qarastyrylǵan.

Mańǵystaý oblysynyń prokýratýrasy elektrondy tutyný júıelerin satý jáne taratý qylmystyq jaýaptylyqqa ákep soǵatynyn eskertedi".