Germanıanyń Baden-Baden qalasy mańyndaǵy quny 71 mln dollar turatyn Schloss Seelach – Zeelah saraıy Tımýr Qulybaevqa tıesili bolyp shyqty.

Bul týraly Deutsche Welle málimdedi. ICIJ jáne Paper Trail Media basylymdary júrgizgen zertteýge sáıkes, Tımýr Qulybaev – HİH ǵasyrda Nıkolaı jáne Aleksandr İİ patshalar jazda demalysyn ótkizgen saraıdyń qojaıyny dep otyr. Al talaıǵa arman bolǵan záýlim saraıdy naǵyz múltımıllıoner, orys elshisi, patsha áýletine jaqyn bolǵan qupıa keńesshi Mıhaıl Hreptovıch salǵan. Saraıǵa Zeelah degen ataý berilgen. Aqsúıekter áýleti turǵyzǵan alyp saraıdy Qulybaevtar 2014 jyly 19,3 mln dollarǵa satyp alǵan. 

Mundaı tujyrymdy jasaýǵa korporatıvtik jáne jer qujattarynyń jazbasy negiz bolyp otyr. Onyń ústine, ǵımarat Qulybaevtyń iri bıznesteriniń biri bolyp sanalatyn Kipros LLP qazaqstandyq kompanıasy Verus Praedium International LLP-ǵa tıesili nemistiń Schloss Seelach Invest GmbH arqyly satylǵan.

Jańa qojaıyndar tarıhı vıllany qaıta jańartyp, saraı aýmaǵyna sýburqaq bar saıabaq saldyryp, onyń astyna aýmaǵy myń sharshy metr bolatyn saltanatty spa-aımaq jasatqan. 25 metrlik baseınniń ústindegi shyny kúmbez tipti, ǵaryshtaǵy sýretten de kórinedi.

Elıtalyq ǵımarattyń qurylysyna qojaıyndardyń qarajattaryn da aıamaǵany aıtyldy.

Olar aqshalaryn aıaǵan joq. Qurylysshylar jumystyń ár sátine esep berip, fotosýret jiberip otyrdy. Bir kúni tapsyrys berýshilerge freskalar (ǵımarat qabyrǵasyndaǵy sýret – red.) unamaı qalyp, sýretshige 150 myń eýro aqy tólenip qoıǵan jumysty qaıta jasatýǵa týra keldi, - dep jazdy DW.

Nemis BAQ-tary Zeelah saraıynan basqa, áýlettiń ıeliginde atalǵan óńirde birneshe jyljymaıtyn múliktiń baryn anyqtaǵan. Olarǵa jalpy somasy 100 mln eýrodan astam qarajat salynǵany aıtyldy.