Qazaqstan Prezıdenti Toqaevtyń Iordanıaǵa sapary qyzyq bir kezeńge sáıkesip qaldy. Eýropa men AQSH-tyń Ýkraınaǵa qatysty ustanymdarynyń arasynda qaıshylyq paıda bolǵan tus qazir. AQSH ókilderi men reseılikter keshe Saýd Arabıasynda kezdesken. Parıjde alashapqyn bolyp jatyr. Izraıl men «Hamas» álgi atysty toqtatý týraly kelisimdi áýpirimdep saqtap tur. Al Toqaev jumys saparymen baryp, kezdesken Abdalla II ótken aptada Tramppen jolyqqan. 

Árıne Qazaqstan basshysynyń sapary osy oqıǵalar qarsańynda ádeıi uıymdastyrylǵan joq. Jaı ǵana sáıkestik edi. Biraq Taıaý Shyǵysta bedeli birshama joǵary saıasatkermen kezdesýdiń bizge biraz paıdasy bolyp qala ma dep úmittenemin. Álbette prezıdenttiń jumys saparynda túrli kelissózder ótti. Biraz qujatqa qol qoıyldy. El basshylary ekonomıkadan bastap týrızmge, logıstıkadan sıfrlandyrýǵa deıin kóptegen mańyzdy máselelerdi talqylaǵpty. Ádettegideı eki jaq Qazaqstan men Iordanıanyń senimdi seriktester ekenin atap ótipti. Kezdesýde mańyzdy ekonomıkalyq máseleler de qaralǵan: ónerkásip, ınvestısıa men beıbit atom energetıkasy salalarynda birqatar kelisimderge qol qoıylypty. Biraq maǵan Aqorda taratqan málimetterdiń ishindegi: «Sonymen qatar Memleket basshysy men Iordanıa Koroli halyqaralyq jáne óńirlik qaýipsizdiktiń ózekti máseleleri jóninde pikir almasty»,-degen sóılem qyzyǵyraq. Álbette eshkim dál osy sóılemdi tarqatyp aıtpaıdy. Dıplomatıa degenniń ózinde qupıa kóp qoı. Sonyń biri bolar. 

Jalpy, biletinder Abdalla İİ Tramppen táýir baılanysta desedi. Gaza sektoryndaǵy atysty toqtatýda biraz róli bolǵanǵa uqsaıdy. Endi osy saıasatkermen bizdiń basshy ne máseleni sóz etti eken degen suraq qaldy kókeıde. Bálkim Qazaqstannyń syrtqy saıasattaǵy ustanymdaryn tanystyrǵan shyǵar. Daý-janjaldy tek kelisimder arqyly sheshý deıtin ustanymdy pysyqtaǵan bolar. Ol jaǵyn bilmeımin. Biraq arab álemindegi yqpaldy kúshpen aramyzdyń jaqsy bolǵanynan utyla qoımaspyz.