İshki ister mınıstrligi sottalǵan áıelderge raqymshylyq jasaý ıdeıasyn qoldaıtynyn málimdedi. Ondaı jaǵdaıda 2 myńnan astam adamnyń bostandyqqa shyǵýy múmkin ekenin jáne bul búdjet qarjysyn únemdeıtinin aıtty.

Qazaqstanda qylmystyq quqyqbuzýshylyq jasaǵany úshin 6399 áıel jazasyn ótep jatyr, onyń 2692-si túrmede, 3707-si probasıalyq baqylaýda.

İİM depýtat Qaraqat Ábdenniń sottalǵan áıelderge raqymshylyq jasaý ıdeıasy oıǵa qonymdy ekenin aıtady

"Mundaı raqymshylyq aktisi týraly usynys tujyrymdamalyq turǵydan qoldaý tapty. 2 myńnan astam sottalǵandy bosatý búdjet qarjysyn táýligine 5,8 mıllıon teńgege deıin únemdeýge múmkindik beredi”, – dedi İshki ister mınıstri Erjan Sádenov.

Bir sottalǵanǵa kúnine jalpy shyǵyn – 2,9 myń teńge, tıisinshe, jylyna 2,1 mıllıard teńge.

İİM málimetinshe, raqymshylyq qoldanylsa, jeńil jáne ortasha aýyrlyqtaǵy qylmysy úshin sottalǵan 1220 áıel jazadan bosatylýy múmkin. Sondaı-aq 2002 áıel zorlyq-zombylyqsyz qylmys jasaǵany úshin sottalǵan. Onyń ishinde 1766-sy birinshi ret qylmys jasaǵan, 150-i aýyr emes jáne aýyrlyǵy ortasha qylmys jasaǵan.

Sondaı-aq aýyr jáne asa aýyr qylmys jasaǵan 5055 áıeldiń jaza merzimi qysqartylýy múmkin.

Vedomstvo sottalǵandardyń áleýmettik jaǵdaıyn esepke alýdy usyndy. Sebebi onyń ishinde 29 múgedek áıel, 60 jastan asqan 243 adam, júkti 13 áıel, kishkentaı balalary bar 58 áıel, kópbalaly 226 ana bar.

3910 áıel materıaldyq/moraldyq talapty ótemegen. İİM basshysy olarǵa tolyq amnıstıa jarıalamaı, jazasyn jeńildetýge bolady deıdi.

İshki ister mınıstrligi Konstıtýsıa boıynsha barlyq azamat zań aldynda teń ekenin, bosatý týraly sheshim kezinde jábirlenýshilerdiń quqyǵy eskeriletinin basa aıtty. 

"Eshkim jynysy boıynsha eshqandaı kemsitýshilikke ushyramaýy kerek. Halyqtyń áleýmettik osal sanatyna jatatyn sottalǵan erler sany 920 adam. Oǵan İ jáne İİ toptaǵy múgedekter, UOS qatysýshylaryna teńestirilgender, múgedek balalardy tárbıelep otyrǵandar, zeınetkerler, tolyq emes otbasylar kiredi", – dep tolyqtyrdy Sádenov.