Qazaqstan Respýblıkasynyń Ulttyq banki bazalyq mólsherlemeni +/-1% dálizimen 10,5 paıyz deńgeıinde saqtaý týraly sheshim qabyldady, - dep habarlaıdy Qamshy.kz aqparattyq agenttigi banktiń baspasóz qyzmetine silteme jasap. Bank ókilderiniń aıtýynsha, jyldyq ınflásıa deńgeıi Ulttyq banktiń boljamdy baǵalarymen sáıkes keledi jáne nysanaly dáliz sheńberinde qalyp otyr, ınflásıalyq kútýler turaqty deńgeıde qalyptasqan.
«Inflásıalyq táýekelder jekelegen taýar naryqtarynda týyndaıtyn usynys faktorlary jáne syrtqy parametrlerdiń ekonomıkanyń damýynyń bazalyq senarıinen aýytqýy tarapynan bolýy múmkin», - delingen habarlamada. Soǵan qaramastan, boljamdy ınflásıanyń orta merzimdi kezeńdegi baıaýlaý traektorıasy naqty paıyzdyq bazalyq mólsherlemeniń ekonomıkanyń áleýetti qarqynyna sáıkes kelýin qamtamasyz etý maqsatynda qysqa merzimdi perspektıvada da, aldaǵy 12-18 aıda da bazalyq mólsherlemeniń tómendeý yqtımaldyǵyn arttyratyny aıtylady.
«2017 jylǵy maýsymda jyldyq ınflásıa 7,5% boldy jáne Ulttyq banktiń nysanaly dálizi sheńberinde (6-8%) saqtalyp otyr. Inflásıanyń aǵymdaǵy jylǵy 1-shi jartyjyldyqta (3,7 %) 2016 jylǵy 1-jartyjyldyqpen (4,6%) salystyrǵanda edáýir tómen bolýy, sondaı-aq jyldyń basynan beri aıtarlyqtaı baıaýlaıtyn jáne jalpy ınflásıamen salystyrǵanda aıtarlyqtaı tómen deńgeıde qalyptasatyn baǵa kúızelisteri men aýytqý quraýyshtary kirmeıtin bazalyq ınflásıa kórsetkishteri ınflásıanyń tómendeý úrdisiniń mańyzdy belgileri bolyp tabylady. Bazalyq ınflásıa maýsymda 6,8% (2016 jylǵy jeltoqsanda - 8,9%) boldy», - deıdi bank ókilderi.
Azyq-túlik naryǵynyń jekelegen segmentterindegi ahýal sońǵy aılardyń qysqa merzimdi ınflásıalyq táýekeli boldy, alaıda jańa ónim kezeńiniń bastalýy azyq-túlik baǵalarynyń jalpy serpinindegi jaǵymsyz úrdisterdi rettedi. Sondaı-aq, halyqtyń ınflásıalyq kútýleri 2017 jyldyń basynan beri turaqtylyqty saqtap otyr eken. Maýsymda ınflásıanyń bir jyl alǵa berilgen sandyq baǵasy 6,4% boldy jáne naqty ınflásıa deńgeıinen tómen, sondaı-aq ınflásıa dáliziniń 2018 jylǵa arnalǵan sheginde qalyp otyr.
«Syrtqy taýar naryqtaryndaǵy ahýal qubylmalylyǵymen sıpattalady. Munaı baǵasynyń bir barel úshin 50 dollardan tómen deńgeıde qalyptasýy jáne mamyr-maýsymda álemdik azyq-túlik naryqtaryndaǵy baǵa ındeksiniń ósýiniń, negizinen, sút ónimderi men dándi-daqyldardyń qymbattaýy saldarynan jyldamdaýy ınflásıalyq aıanyń kúsheıýine ákep soǵýy múmkin. Salymshylardyń valútalyq basymdyqtary teńgemen aktıvterdiń paıdasyna saqtalýda. Maýsymnyń aldyn ala derekteri boıynsha teńgemen depozıtter úlesiniń valútalyq depozıtter úlesinen asyp ketýi odan ári jalǵasýda. Teńgemen kredıtter úlesiniń ósýi de baıqalýda. Bul rette kredıttik resýrstarǵa degen suranys turaqty bolyp qalýda jáne mólsherlemelerdiń birtindep tómendeýimen qatar júrýde. Kredıtteýdiń qysqa merzimdi serpini bank sektoryndaǵy shoǵyrlaný prosesterimen shektelýde. Ekonomıkada iskerlik belsendilik jandanýyn jalǵastyrýda, ishki ekonomıkalyq kórsetkishter serpini qalypqa kelý úrdisiniń saqtalǵanyn kórsetip otyr. Máselen, maýsymda eldegi jıyntyq usynysty kórsetetin qysqa merzimdi ekonomıkalyq ındıkatordyń ósýi jyldyq kórsetkish boıynsha 107,4% boldy. Alaıda halyqtyń aǵymdaǵy jylǵy naqty kiristeri boıynsha baǵalaý derekterin statısıkalyq vedomstvonyń aıtarlyqtaı tómendeý jaǵyna qaraı qaıta qaraýy tutyný suranysynyń odan arǵy serpininiń belgisizdigine sebepshi bolýda. Aqsha-kredıt sharttary beıtarap kúıde qalýda. Artyq ótimdilik jaǵdaıynda aqsha naryǵynyń mólsherlemeleri paıyzdyq dálizdiń tómengi sheginde saqtalýda. Aǵymdaǵy jylǵy úshinshi toqsanda bank sektorynyń qarjylyq ornyqtylyǵyn arttyrý baǵdarlamasynyń iske qosylýyna baılanysty keıinnen onyń kredıttik belsendiliginiń qalpyna kelýi kútiledi», - delingen qarjy retteýshisiniń habarlamasynda.
